Plattdeutsche Nachrichten Plattdüütsche Narichten vun'n 8. März 2024
Standdatum: 8. März 2024.
Informationen zum Audio
- Verfügbar bis: 7. März 2029 Informationen zur Verweildauer
All Footballspelen in Bremen wegen Gewalt afseggt
Bremen. Meist all Amateur-Footballspelen in dat Land Bremen sünd för düt Wekenenn afseggt. Grund is de scharpe Regel vun den Footballverband vun Bremen, wiel dat jümmer mehr Vörkamen mit Gewalt gifft. Vun de D-Jugend an dörven vun vundag bit Sünndag kien Punkt-, Pokal- un Fründschopspelen lopen. Bedrapen sünd mehr as 1.200 Mannschaften ut 88 Footballverenen in dat Land Bremen un umto. De afsetten Spelen weern nahaalt.
Biden süht Demokratie in de USA bedrauht
Washington. US-Präsident Joe Biden hett in sien Anspraak to de Laag vun de Natschon dorto opropen, de Demokratie in de USA mit all Kraft to verdeffenderen. To glieke Tiet stellde Biden de Situatschon in den Gaza-Striepen ruut: Israel draff humanitäre Hölp för de Palästinsener nich as Druckmiddel bruken. De US-Präsident verlangde, dat dat Scheten ophöört un sekerde noch mehr Hölpen för palästinensisch Börgerslüüd to.
Bremen will Integratschon vun Lüüd, de na Düütschland kaamt zentraal maken
Bremen. För de Integratschoon in den Beroop vun Lüüd, de na Düütschland kaamt, schall dat Land Bremen en zentraal Anloopsteed kriegen. De Regerungsfraktschonen vun SPD, Grönen un Linken hebbt en Andrag dorför för de Börgerschaft trecht makt. De Plaan löppt ünnen den Naam „Welcome Center“. Dat schall ok Butensteden in Bremen-Noord un Bremerhaben geven.
Havens spören de Streiks
Bremerhaben. De Streik bi de Bahn wiest sick nu ok bi den Ümslag in de Havens vun Bremen. As dat Logistik-Ünnernehmen BLG vermellt, duert dat Leverns vun Autos mit de Bahn in den Autoterminal Bremerhaben länger. Bavento behinnert de dicht maken A27 LKW-Fohrten vun un na Bremerhaben. Ok in den Haven Neestadt in Bremen wiest sick de Streik bi de Bahn.
Bremerhaben ünnersökt Niveau in de Bildung
Bremerhaben. De Magristrat vun Bremerhaben stellt an´n Vörmiddag en neje Bildungstudie vör. Dorin geiht dat üm de Leisten vun Schoolkinner an darthein Scholen vun de Stadt. De Afsicht weer, de Folgen vun de Coronapandemie för den Lernspood to beoordelen. De sülven Schoolkinner weern al vör twee Johr testen wurren.
Dat Weer
Un nu noch en Blick op dat Weer: In Bassen een , in Bremen-Mitt, in Bremerhaben un in Hooksiel sünd dat opstunns twee Graad. Vundag gift dat veel Sünnschien un an´n Namiddag en poor opstiegen Wulken. De Wind weiht in Maten vun de Oosten Kant. Un de Temperaturen liggen bi söven bit thein Graad. In de Nacht funkeln de Sterns an´n Heven ohn Wulken. Dat blifft dröög bi minus een bit plus twee Graad. Morn fangt de Dag mit Sünnschien an. In´n Verloop trecken jümmer mehr Wulken dör dat Land, so dat de Sünn nich to sehn is. Regen gifft dat aver nich. Dat Thermometer wiest acht bit twölf Graad. Sünndag: Wulken, an´n Namiddag af un an Sünnschien un dröög bi acht bit veerthein Graad. Dat weern de Narichten op platt. Tohoopstellt hett se Gerrit Busch. Op Platt trechtmaakt un vörleest vun Markus Weise.