Plattdeutsche Nachrichten Plattdüütsche Narichten vun'n 15. April 2024

Guterres wahrschaut, dat dat in’n Oosten Blangenbi leger ward

Nee York – UN-Generalsekretär Guterres hett den Iran un Israel darto opropen, de Fööt still to hollen. De Oosten Blangenbi steiht an’n Afgrund, sä Guterres bi een Drepen vun’n UN-Sekerheitsraat. Dat Flach dar as ok de Welt köönt nich noch een Krieg bruken. De UN-Generalsekretär hett all Sieten darto opropen, de Fööt still to hollen. Jüst sowat vermellt de söben gröttsten Industriestaaten. Bunnesbutenministerin Baerbock foddert in de ARD, strengere Strafen gegen den Iran antosetten.

Israelisch Kriegskabinett hett noch nix entscheden

Tel Aviv – In Israel is noch nix entscheden, woans dat Land op de Attack ut’n Iran antern ward. Na een Drepen vun’t Kriegskabinett sä Ministerpräsident Netanjahu, se weern sik eenig, dat dat een Antwoort geven ward - wann un wo dull, daröver ward aver noch snackt. Ok Butenminister Katz draut mit een Gegenslag. Mehr sä he aver nich.

Se sünd bang vör antisemitisch Straafdelikten

Berlin – De Antisemitismus-Beopdragte vun de Bunnesregeern, Felix Klein, hett wegen de iranische Attack op Israel vör mehr antisemitisch Straafdelikten wahrschaut. Klein sä to dat Redaktschonsnettwark Dütschland, all de Anslag vun de Hamas an’n 7. Oktober harr to orrig mehr antisemitisch Straafdelikten in Dütschland föhrt. Dat Angriepen vun’n Iran schall Krawallmakern un Rabauken nu nich in de Karten spelen.

Erster Straafperzess gegen Trump fangt an

Nee York – In den USA fangt hüüt de erste Straafperzess gegen een ehemalig Präsidenten vun’t Land an. Donald Trump mutt sik in Nee York wegen namaakt Papeeren in’n Tosamenhang mit Swiegstillgeld, dat he an een Pornodarstellerin tahlt hett, verantwurten. Trump sä, he harr nix mit de Froo harrt, hett aver togeven, dat se Geld vun em kregen hett. Em ward vörsmieten, dat dat Geld nich op de rechte Oort över de Konten gaan is, darmit dat allens nich vördag kummt.

Stadtraat in Ollenborg entscheedt över Neeboo vun’t Stadion

Ollenborg – De Raat vun de Stadt will an’n Abend över den Boo vun een nee’et Football-Stadion entscheden. Dat schall blangen den Bahnhoff stahn – för woll 50 Millionen Euro. Meist schall dar de VfB Ollenborg spelen, de in de veerte Liga is. Wenn de Vereen villicht in de drütte Liga hoochgeiht, köönt se in dat nee’e Stadion de Oplagen vun’n DFB inhollen. Dat geiht in’t Marschweg-Stadion nich. Se rekent darmit, dat de Stadtraat „Jo“ to den Neeboo seggt.

Dat Weer

Un nu een Blick op dat Weer: op Wangerooge un in Bremerhaben 9, in Bremen un Deefholt sünd dat opstunns 11 Graad. Vundaag kiekt an’n Vörmiddag noch af un an de Sünn rut, an de Küst kann dat all Schuers geven. Vun’n Middag an kummt dat denn mit dickeren Wulken mehr un mehr natt vun baben, an’n Namiddag regent dat denn meist överall. Verenkelt kann ok een Grisselgrussel-Grummelschuer darbi ween – bi 11 bit 14 Graad. In’n Regen üm 10 Graad. Tokamen Nacht mal mehr, mal weniger Wulken mit Schuers. Faken regent dat an de Küst. Dat Thermometer sackt op 6 bit 4 Graad. Morrn gifft dat Aprilweer mit velen Wulken un Schuers. Dartwüschen kiekt ok mal de Sünn rut, meist an de Küst. Twüschen Dümmer un Steinhuder Meer hollt sik meist dicke Wulken, bi 9 bit 11 Graad.  Dat weern de Narichten op Platt. Anja Guse hett se tohoopstellt. Op platt trechtmaakt un vörleest hett se Heidi Jürgens.