Plattdeutsche Nachrichten Plattdüütsche Narichten vun'n 22. April 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 22. April 2024

  • Steinmeier besöcht de Törkei
  • Militärutgaven op de heelen Welt so hooch as noch nie
  • Mehr Daag mit grode Hitten in Europa
  • Gröttste Industrie-Mess in Hannover hett anfungen
  • Autobahn 27 to’n Deel blots eensporig
  • Dat Weer
Bild: Radio Bremen

Informationen zum Audio

Steinmeier besöcht de Törkei

Berlin: Bunnspräsident Steinmeier is jüst op’n Weg in de Törkei. Dat is sien eersten Besöök, sietdem dat he dat Amt övernahmen hett. Grund för de Reis is dat Jubiläum vun de diplomaatschen Kontakten twüschen Düütschland un de Törkei. In Istanbul ward he an’n Middag den jüst wedderwählten Börgermeister Imamoglu drapen.

Militärutgaven op de heelen Welt so hooch as noch nie

Stockholm: De Utgaven för’t Militär op de heelen Welt sünd 2023 op en nee’en hööchsten Stand kamen. Dat kann en ut den nee’en Bericht vun dat Fredensforschungsinstitut Sipri rutlesen. Darna sünd meist 2,3 Billionen Euro för Wehr un Wapen utgeven worrn. Dormit sünd de Utgaven 6,8 Perzent höger as in’t Vörjohr.

Mehr Daag mit grode Hitten in Europa

Paris: In’t verleden Johr sünd in Europa so veel Daag mit grode Hitten noteert worrn as noch nienich vörher. Bavento starvt jümmer mehr Minschen an de Folgen. So steiht dat in en gemeensam Bericht vun’n EU-Klimadeenst Copernicus un de Weltorganisatschoon för Meteorologie. De verleden teihn Johr weern na Angaven vun de UN op de heelen Welt dat heetste Johrteihnt, sietdat de Temperaturen optekent ward.

Gröttste Industrie-Mess in Hannover hett anfungen

Hannover: Bunnskanzler Scholz hett an’n Avend dat Start-Teken för de Hannover Mess geven. Scholz säe, datt Energie, de’n betahlen kann un mehr nee’e Ideen de besten Grundlagen sünd, üm Produktivität un Wasstum mehr Stütt to geven. Dorüm sett de Mess mit Themen as denken Rekenmaschinen un Ideen för de Energiewenn den richtigen Kurs. De Hannover Mess gellt as de gröttste Industrie-Schau op de Welt. Meist 4000 Utstellers ut 60 Länner sünd dorbi.

Autobahn 27 to’n Deel blots eensporig

Bremen: Op de A27 bi Bremerhaben kann en vun hüüt an över Dag to’n Deel blots op een Spoor fohren. Dat liggt doran, datt de Bodden twüschen de Opfohrt Bremerhaben-Överseehaben un Geestmünn ünnersöcht ward. Dorbi ward na Utkunft vun de Autobahn GmbH bet Freedag mitrekent mehrere Moorbrüchen kontrolleert.

Dat Weer

Un nu en Blick op dat Weer: In Bremen un Cloppenborg 3, in Bremerhaben 4, un in Emmen sünd dat opstünns 6 Graad. Hüüt geiht dat Aprilweer wieter. Veele Wulken bringt eerst hier un dor över Dag Regen un Grisselgrussel. Af un an schient aver ok de Sünn. An’n wenigsten regent dat in Oostfreesland un in’n Süüden vun Bremen. De Temperaturen liggt bi 7 bet 10 Graad. In de Nacht klaart de Heben twüschen’n poor Wulkenfeller jümmer wedder op. An de Küst gifft dat noch’n poor enkelte swacke Regenschuers, in’t Binnenland meist gor nich. Later billt sik hier un dor Daak. De Luft köhlt sik af op -1 bet -3 Graad, op de Eilannen un direktemang an de Küst gifft dat bi 5 bet 0 Graad meist keen Frost. Morgen schient to’n Deel de Sünn, to’n Deel is dat ok dakig oder wulkig, an de Küst mit enkelte Schuers. Över Dag wesselt sik Sünnschien un opstiegen Wulken af. An’n Namiddag swacke Schuers in’t süüdliche Binnenland un avends Regen in Oostfreesland. Dat blifft köhl bi 8 bet 10 Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Marc Gelhart.

Bremen Eins Livestream & aktuelle Sendung.

Der Abend mit Norbert Kuntze

Der Abend

Jetzt läuft:

Ace Of Base All That She Wants
  • Jetzt läuft:

    Ace Of Base All That She Wants