Plattdeutsche Nachrichten Plattdüütsche Narichten vun'n 19. April 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 19. April 2024

  • Berichten över Exploschonen in´n Iran
  • USA gegen Palästinenser as Liddmaten in´n Sekerheitsraat
  • Scholz reageert op Snüffelee-Verdachtsfall
  • Noch söven Verfohren mehr gegen mööglich Rechtsextremisten in Behörden
  • Fishtown Pinguins vör tweeten Endspeel
  • Dat Weer
Bild: Radio Bremen

Informationen zum Audio

Berichten över Exploschonen in´n Iran

Teheran. Israel hett wohrschienlich en Angreep op den Iran anfungen. Dat vermellen Medien in den USA. Se weet dat vun US-Regerunsgvertreder. Dat schall Exploschonen in de Stadt Isfahan geven hebben. De Iran hett na egen Angaven över en poor Steden sien Flugafwehrsystem in Gang brocht. As de Iran vermellt, wurren Drohnen afschoten. Dat hett man kien groden planten Angreep geven.

USA gegen Palästinenser as Liddmaten in´n Sekerheitsraat

New York. De USA hebbt in den UN-Sekerheitsraat vör en Andrag vun de Palästinenser en P sett. De Palästinenser wüllt dor kumplett Liddmaat weern. Dat wichtigste Land op de Siet vun Israel hett bi de Afstimmung „Nee“ dorto seggt. Achtergrund is, dat de Regerung in Washington Bang is, dat mit so en Afstimmen en Palästinensisch-Staat würklich anerkennt warrt. So en Staat schall aver ut de Sicht vun de USA, ut de Verhanneln vun de Parteien, de dor mit to doon hebbt, opkamen.

Scholz reageert op Snüffelee-Verdachtsfall

Berlin. Bunnskanzler Olaf Scholz hett russ´sch Snüffelee in Düütschland as nich antonehmen betekent. An de Sekerheitssteden bi uns mutt man dorher grode Anspröök stellen, see de Kanzler na dat EU-Extra-Drapen in Brüssel. Ehrgüstern harr de Bunnsavkaatschaft twee Düütsch-Russen in Bayern hops nehmen laten. Se schüllt för russ´sch Geheemdeensten snüffelt hebben.

Noch söven Verfohren mehr gegen mööglich Rechtsextremisten in Behörden

Bremen. In Behörden vun Bremen gifft dat noch söven Verdachtsfallen vun Rechtsextremismus mehr. Dat hett de Senat op en Anfraag vun de Linken antwoorden. Dorna lopen Disziplinorverfohren gegen söss Mitarbeiters ut dat Binnenresort vun Bremen un en Mitarbeiter ut dat Justizressort. Dorto kamen negen Verdachtsfallen vun Rechtsextremismus ünner Bremer Schandarms, vun de se al weet. Gegen se warrt straafrechtlich vörgahn. So heet dat in de Antwoort vun den Senat.

Fishtown Pinguins vör tweeten Endspeel

Bremerhaben. De Fischtown Pinguins speelt vunavend dat tweete Endspeel üm de düütsche Ieshockey-Meisterschaft. De eerste Partie gegen de Iesboren Berlin harr de Mannschop ut Bremerhaven in de egen Hall mit veer to twee wunnen. Vundag warrt in Berlin speelt. Üm düütsche Meister to weern, sünd veer wunnen Spelen in düsse, as de nöömt warrt, „Best-of-seven-Serie“ nödig.

Dat Weer

Un nu noch en Blick op dat Weer: In Rodenborg Wümm söss, in Bremen-Mitt acht, in Bremerhaben negen un in Demorst sünd dat opstunns acht Graad. Vundag kaamt dat eerstmal natt ut de dichten Wulken. To´n Deel pladdert dat reell. Vun de Nordsee kaamt dat mal so mal so: Regen, Wulken, lockere Wulken or Sünnschien. Hier un dor is ok en kortet Gewidder mit Grisselgrussel möglich. De Wind weiht in Maten bit frisch. Un dat Thermometer wiest negen bit twölf Graad. In de Nacht gifft dat eerstmal noch en poor Regenschuer, de in den Verloop weniger weern. De Temperaturen gahn op een bit söss Graad rünner. Morn fangt de Dag mit Sünnschien an. Man denn schuven sick Wulken vör de Sünn un dat fangt an to pladdern. Thein bit elven Graad stahn denn op dat Thermometer. Sünndag: Unstadig mit Sünnschien, Wulken un en poor Schuern bi negen bit twölf Graad. Dat weern de Narichten op platt. Tohoopstellt hett se Sven Kuhnen. Op Platt trechtmaakt un vörleest vun Markus Weise.

Bremen Eins Livestream & aktuelle Sendung.

Der Abend mit Norbert Kuntze

Der Abend

Jetzt läuft:

Billy Joel Turn The Lights Back On
  • Jetzt läuft:

    Billy Joel Turn The Lights Back On