Plattdeutsche Nachrichten Plattdüütsche Narichten vun'n 23. April 2024

Bunnsverfatensgericht kickt sik dat ne’e Wahlrecht an

Karlsruh: Bi dat Bunnsverfatensgericht snackt se siet vunmorgen över de letzte Reform vun dat Wahlrecht. Gegen de neen Regeln harrn de Unionsfrakschoon in den Bunnsdag, de Bayrische Regerung un de Partei De Linke klaagt. Dat Gericht mutt nu anseggen: Sünd de neen Regeln mit de Verfaten övereens oder nich. Mit dat ne‘e Wahlrecht wüllt se vör allen dor en P vör setten, dat de Bunnsdag grötter un grötter warrt. Na de neechste Wahl schüllt dor blots noch 630 Stöhl in stahn, um un bi hunnert weniger as nu. Wegfallen schüllt ok Posten för Överhang un Utgliek.

EU-Parlament will Recht op Repareren

Brüssel: Dat EU-Parlament will vundaag fastleggen: Dat gifft en Recht op Repareren. De Minschen schüllt Maschinen un Instrumenten länger bruken. Dorför schall de Garantie bet tweemal länger lopen. Ok mööt de Maschinen so boot warrn, dat se överhaupt wedder instand sett warrn köönt. Dele to’n Uttuuschen mööt beter to Hand ween, jüst as de Boo-Teeknungen.

Hölpsbrüch över de Hunte bi Elsfleth kummt vundaag

Elsfleth: In’n Februar weer de Iesenbahnbrüch över de Hunte tweigahn. Vundaag kummt nu en Hölpsbrüch. En swömmen Kraan schall twee 24 Meter lange Delen vun en Hölpsbrüch insetten. Vör twee Maand weer en groot Binnenschipp gegen en Pieler vun de Brüch fohrt. De ole Dreihbrüch un dat Gleiswark sünd so ranponeert worrn, dat siet de Tiet keen Bahn mehr över de Brüch fohren kann. So köönt se vun de Havens Braak un Ollenborg nich na de Noordsee henkamen. Mit de ne’e Brüch schall vun Maandag op an de Bahn wedder fohren, un ok lüttere Binnenscheep schüllt wedder dörkamen.

Twete Gedenksteed för Högel-Dode in Delmorst

Delmorst: Vunnamiddag warrt bi dat Delme-Klinikum en Gedenksteed inricht för Minschen, de de Verbreker Niels Högel umbrocht hett. Verwandte vun Minschen, de dor umkamen weren, harrn sik veer Johr lang dorför stark maakt, dat jüst dor, woneem Högel de Minschen dootmaakt hett, en Gedenksteed henkummt. 2016 weer al en eerste Gedenksteed in en Park in Delmorst inricht worrn. An’t Ollenborger Klinikum gifft dat keen Gedenksteed – ok wenn Högel ok hier Minschen mit Gift umbrocht hett. 2019 harr en Gericht 85 mal Moord nawiest un Högel levenslang achter Trallen schickt.

Scholz hollt de Festreed bi den Stoppelmarkt in Vechte

Vechte: Bunnskanzler Scholz hollt in’n August de Festreed op den Stoppelmarkt. De Stadt Vechte hett anseggt: Scholz is de eerste Bunnskanzler, de op de Maandags-Fier vun de Stadt de Festreed övernimmt. Scholz meen, dat weer en wunnerbore Opgaav, op de he sik bannig frei. Stoppelmarkt is düt Johr vun den 15. bet to’n 20. August. Johr för Johr kaamt dor mehr as 800.000 Lüüd tohoop.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven un Nordholt 5 Graad, op Börkum sünd dat 7 Graad. Vundaag: Wenn sik de Daak oplööst hett: Sunnschien mit de een oder anner opstiegen Wulk. An’n Namiddag kann’t in’t süüdliche Binnenland ok wat pladdern, un an’n Avend kaamt an de See Wulken rin, de ok Regen mitbringt. Dat Thermometer krabbelt op 8 bet 10 Graad. De Wind dorto weiht flau vun de westen Kant. An de See ok en beten mehr un mit deegte Böen. Tokamen Nacht treckt Wulken mit Regen vun de See över dat hele Bremen-Een-Land weg. Gegen Middernacht weniger Wulken un weniger pladdern schall dat ok. Bi 5 bet 1 Graad. Morgen: Mehr Wulken as Sunnschien, mal um mal pladdert dat, ok mit Grisselgrussel un Blitz un Dunnerslag. Eerst an‘n Namiddag pliert wedder de Sunn dör de Wulken. Dat Ganze bi 8 bet 10 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.