Plattdeutsche Nachrichten Plattdüütsche Narichten vun'n 24. April 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 24. April 2024

  • USA will Ukraine al düsse Week Wapen levern
  • AfD-Mitarbeider vunwegen Spionageverdacht insparrt
  • Amnesty International süht Menschenrechten op de ganzen Welt in Gefohr
  • Jung ut Bremführ warrt wiederhen söcht
  • Richtfest an dat Ex-Bunsswehr-Hoochhuus
  • Dat Weer
Bild: Radio Bremen

Informationen zum Audio

USA will Ukraine al düsse Week Wapen levern

Washington: De USA will düsse Week al nee´e Wapenfrachten för de Ukraine op den Weg bringen. Dat hett US-Präsident Joe Biden künnig maakt, ehrder ok de Senaat en millardendicket Hölpspaket tostimmt hett. 69 vun 100 Senatoren hebbt düsse Stütt vun rund 61 Millarden US-Dollar mööglich maakt.

AfD-Mitarbeider vunwegen Spionageverdacht insparrt

Karlsroh: En Mitarbeider vun den AfD-Europaafordneten Maximilian Krah sitt, vunwegen en Spionageverdacht för China, achter Trallen. Vörsmieten warrt em, dat he as Snüffler för en butenlännschen Geheemdeenst in besünners asigen Fall arbeid hett. Na de Generaalbunnsafkaat warrt den fastnahmen Minsch försmieten, dat he Informatschoon ut dat EU-Parlament wiedergeven hett.

Amnesty International süht Menschenrechten op de ganzen Welt in Gefohr

London: In den Johrsbericht vun Amnesty-International prangert de Organisatschoon an, dat op de ganzen Welt de Menschenrechte böös vun den Kurs afgahn. De Rechtsstaatlichkeit is weltwied woll so bedrauht as lang nich mehr. In den Gaza-Krieg smiet Amnesty de islamistisch Hamas un den israeelschen Strietkräft Kriegsverbreken vör. Düütschland warrt ok bekriddelt, vunwegen de Bunnsregeern nix to düsse Kriegsverbreken seggt un dormit jümehr Reputatschoon verspeelt.

Jung ut Bremführ warrt wiederhen söcht

Bremführ: De sössjohrige Jung, de in Bremführ misst warrt, is jümmers noch nich wedder opdükert, hett de Polizei vunmorgen künnig maakt. Dat Insatzrebeet wurr güstern Avend grötter maakt. Blangenbi hunnerte Freewillige, gifft nu ok en Bunnswehrfleger mit en Warmbildkamera stütt. De autistisch Arian is sieht Maandag verswunnen.

Richtfest an dat Ex-Bunsswehr-Hoochhuus

Bremen: In Bremen-Mitt warrt glieks Klock twolf dat Richtfest an dat Ex-Bunnswehr-Hoochhuus fiert. Dat Huus warrt wiet umboot un kriggt dorto twee blangenanliggen Neeboten. In dat Huus nöömt „Q45“ sünd mehr as 160 Wahnungen plaant, man ok Geschäftsflachen un en Kinnergoorn. In um un bi twee Johren schall dat Projekt fardig ween.

Dat Weer

Un nu kiekt wi op dat Weer: In Bremen un Möppen sünd dat veer Graad, in Bremerhoben fief Graad un in Emm hebbt wi opstunns söss Graad. Hüüt mehr Wulken as Sünn un Regen is ok dorbi. An Namiddag kann dat Grisselgrussel, Blitz un Donnerslag geven, an Avend schafft de Sünn dat ok mal an de Wulken vörbi. Dat Thermometer wiest us acht Graad op de Eilannen un negen bet teihn Graad in´t Binnenland. In de Nacht warrt de Regen weniger un wi köönt ok mal de Steerns blinkern sehn. An Morgen sünd wedder mehr Wulken an Heven un dat kann daakig warrn bi söss Graad op de Eilannen un plus veer bet minus een Graad in´t Binnenland. Morgen pladdert dat faken, af un an lacht aver ok mal de Sünn, even Aprilweer. Namiddags warrn de Schuers eerst weniger, aver an Abend schicken us de Nedderlannen wedder Regen. Dat Thermometer wiest us acht Graad op Spiekeroog un negen bet teihn Graad in´t Binnenland.

Dat weren de Plattdüütschen Narichten. Tohoopstellt vun Katrin Martens. Op Platt trechtmaakt un vörleest vun Martina Brünjes.

Bremen Eins Livestream & aktuelle Sendung.

Der Nachmittag mit Dirk Böhling

Der Nachmittag

Jetzt läuft:

The Hollies Long Cool Woman In A Black Dress
  • Jetzt läuft:

    The Hollies Long Cool Woman In A Black Dress