Plattdeutsche Nachrichten Plattdüütsche Narichten vun'n 25. April 2024

Baverstet US-Gericht verhannelt över Immunität vun Ex-Präsident Trump

Washington: Dat baverste Gericht in de USA snackt hüüt över de Immunität vun Ex-Präsident Donald Trump. Trump verlangt dat he afsluut Immunität gegen straafrechtliche Verfolgen kriggt. De Besluss warrt woll Enn Juni künnig maakt. Bet dorhen mutt de Perzess vör dat Bunnsgericht in Washington, de eegens Anfang März losgung, töven. Dorbi geiht dat üm den Versöök de Wahlnedderlaag gegen den hüütigen Präsidenten Joe Biden to kippen.

Möhlenrad vun Moulin Rouge tosamenbraken

Paris: Verleden Nacht is in de franzöösch Hauptstadt dat Möhlenrad vun dat Moulin Rouge instört. De Möhl vun dat Kabarett, wat op de ganzen Welt bekannt is, höört to de Wohrteken vun Paris. De Füerwehr maakt künnig, dat nüms to schaden kamen is. Woso dat Rad tosamenbraken is, is nich kloor.

Besöker brukt Billjet för Venedig

Venedig: Eerstmalig köst dat wat, üm Venedig to besöken. De italieensch Lagunenstadt höört to de leevsten Reistelen op de Welt. Daagsgäst de nich över Nacht in de Stadt blieven, mööt in en Versöökphasen twuschen Klock half negen an morgen un Klock veer an Namiddag fief Euro betahlen. De Testtietruum löppt eerstmaal bet to den föfften Mai un denn binah jedeen Wekenenn bet Mitt Juli – alltohoop negen-un-twintig Daag düt Johr.

Bunnsverfatensgericht verhannelt to Polizeikosten bi Risikospelen

Karlsroh: Dat Bunnsverfatensgericht snackt över den Striet twuschen Bremen un de düütschen Football Liga. Dorbi geiht dat üm de Fraag, of de DFL en Reken för de Polizeikosten bi Hoochrisikospelen kriegen dörv. Bremen hett en socke Regelung al siet twee-dusend-veerteihn un hett dorna faken Reken stellt. De DFL hett dorgegen Verfatensbesweer inbrocht.

Söök na sössjohrigen ut Bremführ löppt wieder

Bremführ: De Polizei söcht wieder na den söss Johr olen Arian ut de Oortschaft Elm. De Hölpslüüd hebbt wieldess Luftballons, wat Sööts un Wildkameras ophungen, se hööpt den autistisch Jung so to finnen. De sössjohrige is an Maandagavend ut sien Öllernhuus alleen rutgahn. En privaaten Oppasskamera hett em opnahmen, as he dör en Wahnveertel leep. Siet de Tiet fehlt vun em jedeen Spoor.

Dat Weer

Un nu kiekt wi op dat Weer: In Bremen hebbt wi veer Graad, in Bremerhoben fief Graad, in Möppen söss Graad un in Emm sünd dat opstunns acht Graad. Hüüt is wedder Aprilweer: Wulken, Regen af un an Grisselgrussel un de Sünn lacht ok mal kort dortwuschen un dat denn bi acht Graad op de Eilannen, negen bet teihn Graad in´t Binnenland. In de Nacht warrn de Schuers eerst weniger, aver von de Nedderlannen her rullen Regenwulken ran, de na Middernacht ok dat Werser-Ems-Rebeet tofaatkriegen. An Morgen lett de Regen in Ostfreesland un dat Emsland na, hier un dor kann dat aver noch schuern un dat denn bi fief bet dree Graad. An Freedag hebbt wi in de Hauptsaak in dat süüdliche Binnenland veel Wulken hier un dor ok Regen, de aver övern Dag nalaten. An de Küst wesseln sik Sünn un Wulken af, Schuers sünd roor. Dat Thermometer wiest us negen Graad op de Eilannen un ölben bet twolf Graad in´t Binnenland.

Dat weren de Plattdüütschen Narichten. Tohoopstellt vun Irene Lottes. Op Platt trechtmaakt un vörleest vun Martina Brünjes.