Plattdeutsche Nachrichten Plattdüütsche Narichten vun'n 2. Mai 2024

Hunnertdusende an’n 1. Mai op de Straat

Hannover: Enige hunnertdusend Lüüd sünd güstern in ganz Düütschland to’n 1. Mai op de Straat gahn. Ok in Bremen, Bremerhaven un anner Städte in den Noordwesten hebbt mehrere Dusend demonstreert. Opropen harr de Düütsche Gewarkschapsbund. Bi dat gröttste Drepen in Hannover verlang DGB-Baas Yasmin Fahimi sekere Arbeitssteden un goden Lohn. In en poor Städte weren linksextreme Koppels op de Straat. De Polizei seggt: dor is nix bi passeert.

EU will Flüchtlings-Kuntrakt mit den Libanon

Beirut: De Präsidentin vun de EU-Kommischoon Ursula von der Leyen will vundaag in den Libanon över de Flüchtlingslaag snacken. Wo de Europääsch Union op daal will: En Kuntrakt schall för weniger Flüchtlinge sorgen. Vör allen Zypern harr toletzt bekriddelt, dat to vele Lüüd ut Syrien över den Libanon in’t Land rinkaamt. De Düütsche Press-Agentur hett to weten kregen: Dat geiht üm ene Milliarde Euro an Hölpsgeld. Rinsteken wüllt se dat in Gesundheit un Bildung.

Steden för Breefwahlen bi de Europawahl maakt apen

Bremen: In Bremen un Bremerhaven maakt vundaag söven Steden för Breefwahl apen. De sien Wahlschien kregen hett, kann dor foorts afstimmen. In Bremen hebbt se Steden för Breefwahl in de Oortsämter Huchten, Hemeln, West un Veesack inricht. In Bremerhaven kann een in’t Börgerbüro Nord un in’t Hanse Carrè afstimmen. De Europawahl löppt an’n 9. Juni.

Trainer vun de Fishtown Pinguins geiht na Krefeld

Bremerhaven: De Ieshockey-Trainer Thomas Popiesch höört bi de Bunnsliga-Kru Fishtown Pinguins op. He geiht na Krefeld. Dat hett he güstern Namiddag in Bremerhaven anseggt – jüst as de Pinguins mit dusende Fans de beste Speeltiet in ehr Vereensgeschicht fiert hebbt. De Bremerhaveners sünd de düütsche Vize-Meister in Ieshockey worrn.

Champions League: Borussia Düörpm hett de Nees vörn

Düörpm: Borussia Düörpm hett dat eerste Speel ünner de letzten Veer in de Football Champions League wunnen. Güstern Avend hebbt se Paris Saint-Germain mit 1:0 na Huus schickt. Dat Tor hett de fröhere Bremer Niclas Füllkrug schaten. Dat twete Speel is in söss Daag in Paris. Vunavend speelt Bayer Leverkusen ünner de letzten Veer in de Europa League bi AS Rom.

Dat Weer

Un woans süht dat mit dat Weer umto ut? Opstunns hebbt wi op Börkum 15 Graad, in Bremerhaven sünd dat 17 un in Bremen un Nienborg 18 Graad. Vundaag: Sunnschien vun Oostfreesland över Bremen bet na de Elv to. Süüdlich: Mal Sunnschien, mal Wulken, un gegen Avend kann dat wat pladdern, mag ween, ok mit Blitz un Dunnerslag. Dat Thermometer krabbelt op 23 bet 26 Graad, an de See 18 bet 22 Graad. De Wind dorto weiht in Maten un mit Böen vun de oosten Kant. An de See frisch ut Oost bet Noordoost. Tokamen Nacht lööst sik de restlichen Wulken gau op. Denn blenkert de Steerns oder an’n Heven versammelt sik blots en ganz poor Wulken. Dröög bi 14 bet 12 Graad. Morgen: Eerst Sunnschien. Denn treckt vun’t Emsland un Ollenborger Mönsterland mehr un mehr Wulken rin. Achteran kann dat pladdern, hier un dor ok mit Blitz un Dunnerslag. An’n Avend wedder fründlicher un dröög. Dat Ganze bi 16 bet 21 Graad, wenn‘t regent ok unner 15 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Kück.