Plattdeutsche Nachrichten Plattdüütsche Narichten vun'n 13. Mai 2024

Gericht ordeelt över AfD as Verdachtsfall

Münster: Dat Bunnsamt för Verfatensschutz draff de AfD as rechtsextremistschen Verdachtsfall intaxeern. Dat Oberverwaltungsgericht in Münster hett hüüt Morgen de Klaag dorgegen trüchwiest. Dormit is dat sülvige rutkamen as bi dat fröhere Ordeel vun dat Verwaltungsgericht Köln in’t Johr 2022. Noch is dat Ordeel aver nich rechtens.

Agora: Verkehrswenn kost Düütschland 9,7 Billionen Euro

Berlin: Je länger dat mit de Verkehrswenn in Düütschland duert, desto dürer ward se. Dat is bi en Studie vun de Organisatschoon „Agora Verkehrswenn“ rutsuert. Wenn de Bunnsregeern allens so wieterlopen laten würr, ward de Verkehrswenn bet 2045 meist 9,7 Billionen Euro kosten. De Klimaziele in’t Verkehrsrebeet wörrn se liekers nich schaffen.

Streiks in’t Bogewarv un bi Telekom fangt an

Hannover: De Gewarkschaft IG Bau hett to Streiks in’t Bo-Gewarv opropen. De hebbt hüüt in Neddersassen anfungen. Morgen schall dat in heel Düütschland Streikakschonen geven. Ok bi de Düütschen Telekom laat se hüüt to’n Start vun de veerten Runn vun dat Tarifverhanneln de Arbeit liggen. Kunnen in heel Düütschland mööt mit Maleschen bi’n Service reken.

„Polarstern“ ut Oost-Antarktis trüchkamen

Bremerhaben: Dat Forschungsschipp „Polarstern“ is trüch ut de Oost-Antarktis. De Iesbreker vun dat Alfred-Wegener-Institut keem güstern Avend na de Expeditschoon an, de länger as en halv Johr duert hett. In düsse Tiet hett de Mannschaft Gletscher un den Stroom vun’t Meer ünnersöcht. Dat Utwerten vun Proven schall dorbi hölpen, datt se dat Anstiegen vun’n Meeresspegel beter vörutseggen köönt.

Börgerpark-Tombola is vörbi

Bremen: De Saison för de Börgerpark-Tombola is vörbi. Dorbi is dat tweetbeste Ergebnis rutsuert, sietdat de Euro inföhrt worrn is. De Tombola is güstern mit en Ümsatz vun meist 1,1 Millionen Euro to Enn gahn. Blots de Saison 2019 weer noch’n beten beter. Blangen den Börgerpark kriggt ok de Achterdiek-Park, de Stadtgoorn Fegebüdel un de Wätjens Park wat vun den Reinerdrag af.

Dat Weer

Un nu en Blick op dat Weer: In’t Wangerland 15, in Bremen 16, in Bremerhaben un Emmen 17, un in Leer un Cloppenborg sünd dat opstünns 18 Graad. Hüüt gifft dat eerst veel Sünnschien. Bet to’n Middag sünd meist keen Wulken in’n Weg. An’n Namiddag un Avend billdt sik’n poor opstiegen Wulken, de later Westen de Werser dichter ward. In’t Emsland köönt sik an’n Avend sogar enkelte Schuers oder Gewidder billen. Anners blifft dat dröög un warm bi 22 Graad op de Eilannen un 25 bet 27 Graad op’t Fastland. In de Nacht löst sik de opstiegen Wulken gau wedder op, denn is dat licht wulkig un hier un dor funkelt ok de Steerns an’n Heben. De Luft köhlt sik af op 14 bet 11 Graad. Morgen schient de Sünn vun Anfang an vun’n strahlend blauen Heben. An’n Namiddag kaamt besünners in’t Binnenland’n poor lütte opstiegen Wulken dorto, aver dat blifft överall dröög. Dat Thermometer kladdert op 26 bet 28 Graad, op de Eilannen op 22 bet 25 Graad.

Dat weern de Narichten op platt. Tohoopstellt hett se Justus Wilke. Op Platt trechtmaakt un vörleest vun Marc Gelhart.