Plattdeutsche Nachrichten Plattdüütsche Narichten vun'n 14. Mai 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 14. Mai 2024

  • EU-Asylreform warrt fastleggt
  • Scholz stellt sik in Huusholtsstriet an Lindners Siet
  • Richter maakt woll Ordeel gegen den Thüringer AfD-Baas Höcke künnig
  • Datenschützer ut Bund un Länner kaamt in Bremerhoben tohoop
  • Orcars setten woll en Jacht vör marrokaanschen Küst op Grund
  • Dat Weer
Bild: Radio Bremen

Informationen zum Audio

EU-Asylreform warrt fastleggt

Brüssel: De Asylreform vun de EU warrt woll glieks över de letzten Unsekerheiten weg gahn . De Finanzminister vun de Liddmaatenstaaten sünd tohoopkamen, üm de strengeren Regeln as letzte tostännige Steed to besluten. In dat Papeer geiht dat in de Hauptsaak üm datsülvige Asylverfohren an de Butengrenz vun de EU. Minschen de keen Recht hebbt to blieven, köönt denn bats afschoven warrn.

Scholz stellt sik in Huusholtsstriet an Lindners Siet

Berlin: Bunnskanzler Olaf Scholz gifft Finanzminister Christian Lindner Stütt bi sien Position in den Huusholtsstriet. Ok Scholz hett sien Ministers opfordert to sporen. To dat Blatt „Stern“ see de Kanzler, dat weer afsnackt, dat Linder den Resoorts Grenzen nöömt. Ogenschienlich as Reaktschoon op stiegen Utgavenverlangen blockeert Linder just en Rentenpakeet, över dat sik de Regerung al eenig weer.

Richter maakt woll Ordeel gegen den Thüringer AfD-Baas Höcke künnig

Halle: As dat utsüht maakt dat Landgericht hüüt dat Ordeel in den Perzess gegen den Thüringer AfD-Baas Björn Höcke künnig. He hett woll, vör dree Johren bi en Wahlkampfoptritt in Sachsen-Anhalt, mit Weten en verbaden Nazi-Parool bruukt. Wenn he verordeelt warrt, mutt he hööchstens mit en Geldstraaf reken. Folgen för sien Toppkandidatur för de Landdagswahl in Thüringen harr dat nich.

Datenschützer ut Bund un Länner kaamt in Bremerhoben tohoop

Bremerhoben: Datenschützer ut Bund un Länner sünd in de Stadt to jümehr Fröhjohrskunferenz tohoopkamen. Bet morgen geiht dat ünner annern dorüm, wo man mit Patschientendaaten ümgeiht, wenn en Krankenhuus dichtmaakt. De rund 40 Deelnehmers snackt bavento över de Fraag, wo Daten vun digitalen Stroom-, Water un Heizungsklock beter verslöteln warrn köönt.

Orcars setten woll en Jacht vör marrokaanschen Küst op Grund

Kap Spartel: Vör de Küst Marokkos hebbt Orcars woll wedder en Segeljacht op Grund sett. Spaansche Medien mellen dat mit Verwies op den Seenootreddungsdeenst. Dorna hebbt de twee Jachtmaten vun dumpen Slääg gegen den Rump vertellt. Achterna weer dat Roderblatt ramponeert un Waater sickert rin. All beid wurrn rett, de 15 Meters lange Jacht is afbuddelt. Dat is al de söövte vergliekbore Vörfall siet 2020. Wat dor achter stickt is nich kloor.

Dat Weer

Un nu kiekt wi op dat Weer: In Bremen un Möppen hebbt wi 18 Graad, in Bremerhoben un Emm sünd dat opstunns 19 Graad. Hüüt lacht de Sünn den ganzen Dag, över namiddag sünd en poor lütte Wulken an Heven, man dat blifft aver överall dröög. De Wind weiht in Maaten bet stark böig, an de Küst frisch vun de süüdoosten Kant. Dat Thermometer wiest us 26 bet 27 Graad in´t Binnenland un op de Eilannen 23 bet 25 Graad. In de Nacht lösen sik de lütten Wulken op un wi köönt de Steerns blinkern sehn un dat bi 15 Graad op Wangeroog un 13 bet 12 Graad in´t Binnenland. Morgen is dat Weer just so as vundaag, veel lachen Sünnenschien, an Namiddag wedder en poor lütte Wulken un dat blifft wiederhen dröög, in´t Binnenland bi 26 bet 28 Graad un op de Eilannen bi 23 bet 25 Graad.

Dat weren de Plattdüütschen Narichten. Tohoopstellt vun Carsten Putz. Op Platt trechtmaakt un vörleest vun Martina Brünjes.

Bremen Eins Livestream & aktuelle Sendung.

Die Nacht

Die Nacht

Jetzt läuft:

Joan Osborne One Of Us
  • Jetzt läuft:

    Joan Osborne One Of Us