Plattdeutsche Nachrichten Plattdüütsche Narichten vun'n 16. Mai 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 16. Mai 2024

  • Na Anslag: Extra-Sitten vun de slowaaksche Regerung
  • Na Anslag: Extra-Sitten vun de slowaaksche Regerung
  • Nordrheinwestfalen sett Koppel, de woll de Hamas stütt gifft, op de rode List
  • Utbildungszentrum för den Öffentlichen Deenst maakt in Bremen op
  • TSG Bremerhaven lööst Latiendanzkoppel op
  • Dat Weer
Bild: Radio Bremen

Informationen zum Audio

Na Anslag: Extra-Sitten vun de slowaaksche Regerung

Bratislava: Wo güstern op Ministerpräsident Robert Fico schaten worrn is, kummt de Regerung in de Slowakei an’n Vörmiddag to en Extra-Sitten tohoop. Ok de natschonale Sekerheitsraat schall över de Laag snacken. Robert Fico weer enige Stunnen lang opereert worrn. Nu is he wedder waak un dat geiht nich mehr um Leven un Dood. Dat sä Viez-Ministerpräsident Tomas Taraba vunmorgen. Na en Kabinetts-Sitten weer güstern op Fico schaten worrn. Maakt hett dat woll en Mann ut de Slowakei vun 71 Johr. Em hebbt se fastnahmen.

Stüern warrt taxeert

Berlin: Finanzminister Christian Lindner maakt an’n Namiddag bekannt, mit wat för Stüern Bund, Länner un Gemeenden reken köönt. Wat dor taxeert warrt, is en wichtige Grundlaag för allens, wat mit den Bunnshuusholt för dat tokamen Johr tohoophangt. Wo dat in de Wirtschaft aver eher mau utsüht, rekent se nich mit betere Tallen.

Nordrheinwestfalen sett Koppel, de woll de Hamas stütt gifft, op de rode List

Duisborg: Dat Binnenministerium in Nordrhein-Westfalen hett vunmorgen de Koppel Palästina Solidarität Duisborg verbaden. Se smiet de Liddmaten vör: Se geevt de islamistische Terrorkoppel Hamas Stütt. De Polizei hett sik in veer Hüüs umkeken, de wat mit de Koppel to doon hebbt.

Utbildungszentrum för den Öffentlichen Deenst maakt in Bremen op

Bremen: Finanzsenater Björn Fecker maakt vundaag de Dören apen för en Zentrum för Ut- un Fortbilden för den Öffentlichen Deenst in’t Land Bremen. Op den „Innovatschoons-Campus“ hebbt ok de IT-Deenstleister Dataport un de Bremer Butensteed vun de Noorddüütsche Akademie för Finanzen Quarteer funnen. Ok Delen vun dat Finanzressort warrt dor unnerbrocht.

TSG Bremerhaven lööst Latiendanzkoppel op

Bremerhaven: De Koppel för latienschen Danz bi de TSG Bremerhaven hett sik oplööst un geiht nich mehr in de 1. Bunnsliga an den Start. De Vereen is so ut den Topsport rut. Se hebbt nich mehr noog Dänzerinnen un Dänzers. Enige harrn ophöört. Dor kunn de Vereen nich mehr gegenanstüern.

Dat Weer

Un woans süht dat mit dat Weer umto ut? Opstunns hebbt wi in Deefholt 18 Graad, in Bremen sünd dat 19 un in Bremerhaven un Weyerbarg 20 Graad. Vundaag: Eerst Sunnschien un dröög. Pö a pö treckt aver mehr Wulken rin, un an’n Namiddag kaamt vör allen vun dat Emsland un dat Ossenbrügger Land Schuer op, gewiddern kann dat ok, hier un dor is ok en Gewaltschuer dorbi, ok mit lütten Hagel. Gegen Avend treckt de Grummelwulken na Noorden. Dat Thermometer krabbelt op 24 bet 27 Graad, op de Inseln 20 bet 23 Graad. De Wind dorto weiht in Maten bet frisch vun de süüdoosten bet oosten Kant, mit starke bet deegte Böen. Tokamen Nacht: Vun de Noordsee bet na de Elv un de Lümborger Heid blots en poor Wulken un dröög. Süüdwestlich dorvun mehr Wulken, ut de dat ok mal pladdern kann. Bi warme 15 bet 13 Graad. Morgen: Vun de Küst bet na de Elv Sunnschien un dröög. Anners schuuvt sik mehr un mehr Wulken vör de Sunn, un twüschen Werser un Ems kann dat ok schuern un gewiddern. Bi 22 bet 25 Graad, an de Küst 19 bet 21 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Irene Lottes.

Bremen Eins Livestream & aktuelle Sendung.

Die Nacht

Die Nacht

Jetzt läuft:

Natasha Bedingfield Soulmate
  • Jetzt läuft:

    Natasha Bedingfield Soulmate