Plattdeutsche Nachrichten Plattdüütsche Narichten vun'n 8. Mai 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 8. Mai 2024

  • Nee’e Attacken op Politikers
  • Trump-Perzess um geheeme Dokumente verdaagt
  • Besinnen op Enn vun’n Tweten Weltkrieg
  • Bremerhabener Stadthall schall op Schick bröcht warrn
  • Borussia Dortmund in’t Champions-League-Endspeel
  • Dat Weer
Bild: Radio Bremen

Informationen zum Audio

Nee’e Attacken op Politikers

Berlin: Wenige Daag na de Attack op en SPD-Europaafordneten in Dresden sünd al wedder Politikers attackeert worrn. In Berlin is de SPD-Wirtschaftssenatersche Giffey bi en Attack licht versehrt worrn. In Dresden hebbt se an’n Avend en Grönen-Politikerin de Fuusten wiest. De Binnenministers vun Bund un Länner hebbt an Avend över de Kunsequenzen snackt. Na Utkunft vun Bunnsbinnenministersche Faeser ward över högere Strafen för düsse Attacken nadacht.

Trump-Perzess um geheeme Dokumente verdaagt

Washington: Een vun de Perzessen gegen den fröheren US-Präsident Trump is an’n Avend verdaagt worrn. Grund dorför is en Floot vun Andrääg, as dat Gericht vermellt, dat dorför tostännig is. Trump hett woll noch geheeme Dokumenten to Huus versteckt, nadat he ut sein Amt wählt worrn is. Dat Verfohren kann woll noch bet na de Präsidentschaftswahl duern.

Besinnen op Enn vun’n Tweten Weltkrieg

Bremen: An veele Orten in Düütschland besinnt se sik hüüt an dat Enn vun’n Tweten Weltkrieg in Europa. In Bremen leggt opstünns Börgerschaftspräsidentin Grotheer un Börgermeister Bovenschulte en Kranz bi’t Mahnmaal bi’n Bunker Valentin daal. Dormit wiest se op dat Schicksal vun Dusenden vun Arbeitern ünner Dwang hen. In Bremerhaben leggt Stadtverordnetenvörsteher un Stadtraat üm Klock fief an’n Namiddag ok en Kranz an de groden Kark daal as Teken för Freden un Demokratie.

Bremerhabener Stadthall schall op Schick bröcht warrn

Bremerhaben: De Stadthall in Bremerhaben schall wedder op Schick bröcht warrn. Dat hett de Wirtschafts- un Finanzutschuss vun de Stadtverordnetenversammeln güstern Namiddag beslaten. De Kosten ward opstünns op 20 Millionen Euro taxeert. De Stadthall hett blots noch bet Mitt vun’t tokamen Johr en Bedrievsverlööf, denn dat Dack is nich dicht un de Füersekerheit langt ok nich mehr.

Borussia Dortmund in’t Champions-League-Endspeel

Paris: Borussia Dortmund steiht in’t Endspeel vun de Football-Champions-League. De BVB hett ok dat Rückspeel ünner de letzten veer gegen Paris St. Germain mit 1:0 wunnen. Dat Tor hett Mats Hummels in de 50. Minuut koppt. Dat Champions-League-Endspeel findt an’n 1. Juni in’t Londoner Wembley-Stadion statt. Wokeen Dortmunds Gegner ward, stellt sik hüüt Avend twüschen Bayern München un Real Madrid rut.

Dat Weer

Un nu en Blick op dat Weer: In Deefholt 9, in Bremen 12, un in Bremerhaben un Leer sünd dat opstünns 13 Graad. Hüüt gifft dat vun‘t Elv-Werser-Dreeeck un de Lünborger Heid bet to de Werser meisttiets Sünnschien mit enkelte opstiegen Wulken. In Oostfreesland un dat Emsland hollt sik noch’n poor dichte Wulken, de hööchstens enkelte Druppen bringt. Later kummt ok hier de Sünn rut. De Temperaturen liggt bi 17 bet 20 Graad, an de Küst mit Seewind bi 14 bet 16 Graad. In de Nacht is dat meisttiets licht wulkig bet klaar un dröög. Later breedt sik vun’n Westen Feller mit Daak un hogen Daak ut, Regen gifft dat aver nich. Dat Thermometer sackt daal op 10 Graad op de Eilannen un an de Küst un 6 bet 4 Graad op’t Fastland. Morgen geiht dat in’n Westen mit dichten Daak in den Dag. In‘n Süüdoosten schient för längere Tiet de Sünn. Bet to’n Middag breedt sik de ok in’n Westen ut. Later schuuvt sik vun de Noordsee ut jümmer mehr Wulken vör de Sünn, aver dat blifft överall dröög un fründlich bi 17 bet 20 Graad un 14 bet 16 Graad an de Küst.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Marc Gelhart.

Bremen Eins Livestream & aktuelle Sendung.

Die Nacht

Die Nacht

Jetzt läuft:

Village People Y.M.C.A.
  • Jetzt läuft:

    Village People Y.M.C.A.