Plattdeutsche Nachrichten Plattdüütsche Narichten vun'n 15. Mai 2024

Bunnskabinett snackt över Krankenhuusreform

Berlin: Dat Bunnskabinett snackt vundaag över de Krankenhuusreform, de Gesundheitsminister Karl Lauterbach in Gang sett hett. So wüllt se nee regeln, woans de Krankenhüüs an jemehr Geld kaamt. Dat de Kliniken för jeedeen Patschent datsülvige kriegt, schall weg. Dorför kriegt de Krankenhüüs denn en Grundgeld. Ok will Lauterbach, dat en Klinik blots noch enige Saken kann – dat denn aver besunners goot. De Düütsche Krankenhuusgesellschap is bang, mit de Reform kunn dat mit de Versorgung knapp warrn, un de Patschenten müssen sik dor op inrichten, dat se wat länger töven mööt.

China will gegen den Extra-Toll vun de USA wat gegenansetten

Peking: Wo de USA künnig maakt hebbt, se wüllt den Toll hoochsetten, will China dor wat gegensetten. Dat Land warrt sik mit Macht för dat insetten, wat ehr Recht is un wat goot för jem is, hett dat chineesche Hannelsministerium vermellt. US-Präsident Biden harr güstern anseggt: Op en Reeg Woren ut China kummt Extra-Toll rop. Der Amerikaners smiet China vör: De Staat gifft veel Geld an Dele vun de Wirtschap, dat de mit Billigworen op den Weltmarkt kaamt. So schall de Toll op E-Autos vun 25 op 100 Perzent ropgahn.

Klocken vun Formel-1-Rennfohrer Michael Schumacher veraukschoneert

Genf: Acht Klocken vun den fröheren Formel-1-Rennfohrer Michael Schumacher sünd för 4,1 Millionen Euro veraukschoneert worrn. De düerste Klock is för 1,2 Millionen Euro weggahn. En Schweizer Manufaktur harr ehr extra för Schumacher boot. Op en root Wieserblatt sünd de Teken vun sövenmal Weltmeister op. Schumacher harr 2013 en bösen Schiunfall, vörher harr he mit Vermaak Klocken sammelt.

Meist jeder Twete hett Haatverbreken beleevt

Hannover: Meist jeder twete Minsch in Hannover hett al mal Haatverbreken beleevt. Dat is bi en Studie vun dat Lannskriminalamt Neddersassen rutkamen. Anschreven harrn se 50.000 Lüüd in Hannover. Mehr as 7.000 Antwoorten sünd trüchkamen. Haatverbreken, dat is, wenn böse Wöör op een smeten warrt, een minnachtig maakt warrt oder een sogoor an’t Liev to Schaden kummt. Dat richt sik faken gegen Frömde, Jöden, Butenlanners oder Minschen, de kene witte Huut hebbt.

Polizei söcht wedder na Arian

Bremervöör: De Polizei söcht in den Landkreis Rotenborg noch mal wedder twee Daag lang na Arian. De autistische Jung is söss Johr oolt. Dat is mehr as dree Weken her, dat he ut dat Wahnhuus vun sien Familie wegkamen is. In söss Dörper langs de Oost wüllt jümmers twee Schandarms tohoop an mehrere hunnert Huusdören pingeln un bi de Lüüd nafragen. Vör allen bi de, de bi de eersten Fraag-Akschonen nich to Huus weren. Morgen wüllt se denn de Oost sülvst un den Rand afsöken.

Dat Weer

Un woans süht dat mit dat Weer umto ut? Opstunns hebbt wi in Bremen un Emm 19 Graad, in Bremerhaven un Rotenborg sünd dat 20 Graad. Vundaag lachen Sunnschien. Blots in’t süüdliche Emsland un Ossenbrügger Land stiegt en poor dünne Wulken op. Dat Thermometer krabbelt op 26 bet 28 Graad, an de Küst un op de Inseln 22 bet 25 Graad. De Wind dorto weiht in Maten bet frisch vun de oosten bet süüdoosten Kant, mit starke bet deegte Böen. Tokamen Nacht kriegt wi Maand un Steerns to sehn, hier un dor ok mit en poor dünne Wulken. Dröög bi 15 bet 13 Graad. Morgen: Eerst Sunnschien un dröög. Pö a pö treckt aver mehr Wulken rin, un an’n Namiddag un Avend kann dat süüdwestlich vun Bremen en beten pladdern, mag ween ok mit Blitz un Dunnerslag un Gewaltschuer. Anners aver blifft dat dröög bi 24 bet 27 Graad, op de Inseln 20 bet 22 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Sven Weingärtner.