Plattdeutsche Nachrichten Plattdüütsche Narichten vun'n 26. April 2024

Bunnsdag stimmt över Klimaschutzgesetz af

Berlin. De Bunnsdag will glieks över en nejet Klimaschutzgesetz afstimmen. En dringlichen Andrag ut de CDU gegen dat Gesetz weer güstern vör dat Verfatensgericht aflehnt wurren. Mit de nejen Klimaschutz-Regeln ännern sick de Oplagen, wo de Bunnsregerung dat makt, dat dat in de Luft blasen vun Drievhuusgasen na ünnen sett warrt. So schall in Tokunft för all Ressorts en eenzig Klimafohrplan gellen un nich för jeed Rebeet för sick.

Bunnsrat snackt över Betahlkort för Asylbewarvers

Berlin. De Betahlkort för Asylbewarvers nimmt vundag wohrschienlich dat letzte Hinnernis. De Bunnsrat stimm döröver af, of de besünnere Geldkort in dat Asylbewarverleistensgesetz opnahmen waart. Dat wöör Lännern un Kommunen möglich maken, all Leistens för Minschen op de Flucht op de Betahlkort to boken. Överwiesens in de Länner, ut de se kaamt, sünd mit de Kort nich möglich.

Twee Opmarschen in de Binnenstadt vun Bremen

Bremen. De Gewarkschop verdi hett de Mitarbeiters in´n Eenzel-, un Groot- un Butenhannel to´n Warnstreik opropen. Siet Klock thein is en Demonstratschoon in´n Gang. Mit 250 Lüüd warrt rekend. Se wüllt vun den Bahnhoffsvörplatz bit to´n Marktplatz vun Bremen lopen. An´n Namiddag plant de Koppel „Fridays for Future“ en Klimastreik op den Doms´hoff. En Protesttog treckt dör de Neestadt un torüch.

Nejet Sparrwark för Bremerhaben

Bremerhaben. En nejet Sparrwark schall Bremerhaben beter vör Stoormfloten un den stiegen Waterspegel afsekern. De Bo fangt aver later an as bet nu dacht: Nich vör 2027 schall dat los gahn. Dat seggt de Havensellschop Bremenports. Se hett de aktuellen Plans för dat Grootprojekt an de Geest nu vörstellt.

Söök na autistisch Jungen wieder ohn Erfolg

Bremführ. Ok in de verleden Nacht hebbt vele Hölpslüüd na den söss Johr old Arian in Bremführ sökt. Neven den velen Freewilligen sünd noch mehr as 300 Bunnswehrsuldaten to Hölp dorto kamen. Üm den autistisch Jungen ut en möglich Versteck to locken, wurren an´n Avend un in de Nacht Kinnermusik afspeelt un en groden Lichtkegel in den Heven strahlt. Siet Mondag Avend is de söss Johr old Jung verswunnen.

Dat Weer

Un nu noch en Blick op dat Weer: In Nienborg söven, in Bremen-Mitt, in Bremerhaben un in Hooksiel sünd dat opstunns söss Graad. Vundag gifft dat vele Wulken un af un an Regen. In´n Dagsverloop hört dat op to regen. An de Nordsee stellt sick en Wessel ut Sünnschien un Wulken in. De Wind weiht blots en beten un dat Thermometer wiest thein bit 13 Graad. In de Nacht trecken an´n Anfang vele Wulken dör, de hier un dor ok Schuer bringen könen. Meist blifft dat aver dröög. Dat Thermometer wiest twee bit söven Graad. Morn gifft dat an´n Morgen un Vörmiddag en Wessel ut Sünnschien un Wulken. An´n Middag un Namiddag kann dat hier un dor natt vun baven kamen. Enkelte Gewidder mit Hagel un störmschen Böen könen ok dorbi ween. De Temperaturen kladdern op 14 bit 18 Graad. Sünndag: Sünn un Wulken in´n Wessel. Dorto Schuer bi 17 bit 22 Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Markus Weise.