Plattdeutsche Nachrichten Plattdüütsche Narichten vun'n 16. April 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 16. April 2024

  • Israel hett Antwoort op Attack vun’n Iran ankünnigt
  • Scholz dreept Chinas Präsident Xi
  • Landgericht Ollenborg verhannelt över Bedregeree
  • Bremer Senat bringt nee’e Schullen op’n Weg
  • Ollenborg kriegt nee’et Footballstadion
  • Dat Weer
Bild: Radio Bremen

Informationen zum Audio

Israel hett Antwoort op Attack vun’n Iran ankünnigt

Tel Aviv – De israelsche Armee hett ankünnigt, op de iransche Attack to antern. Generalstabsbaas Halevi sä, dat wöör een Antwoort geven – mehr hett he nich vertellt. Israels Premier Netanjahu sä, dat mutt een klooke Antwoort sien, op de de Iran bang tööven mutt. Dat heet, Israel harr den USA toseggt, se vör een Gegenslag Naricht to geven. De Iran harr Israel an’n Wekenenn mit Raketen un Drohns angriepen.

Scholz dreept Chinas Präsident Xi

Peking – Bunneskanzler Scholz hett sik to’n Afsluss vun sien China-Reis mit Präsident Xi drapen. To’n Beginn sä Scholz, dat schall üm den Ukraine-Krieg, de Tosamenarbeit bi de Wertschupp un den Schutz vun’t Klima gahn. In’n Fall vun de Ukraine will Scholz dat henkriegen, dat China mehr op Russland insnackt. Präsident Xi sä to’n Optakt vun dat Drepen, China un Dütschland köönt de Welt tohoop stabiler un sekerer maken.

Landgericht Ollenborg verhannelt över Bedregeree

Ollenborg – Vör dat Ollenborger Landgericht fangt in düssen Minuten de Perzess wegen Bedregeree un dat Geven un Nehmen vun Smeergeld bi de Elsflether Warft an. Anklaagt sünd fief ehemalig Mitarbeiders un Vörstänne, as ok een Reknungspröfer vun de Dütsche Marin. Dör falsche Afreknungen bi dat Instandsetten vun’t Segelschuulschipp is dar woll een Schaden vun knapp een Veertelmillion Euro bi rutsuert. Blangen dat, geiht dat ok üm de dütlich högeren Kosten vun’t Trechtmaken vun de Gorch Fock op an’n Enn 135 Millionen Euro.  

Bremer Senat bringt nee’e Schullen op’n Weg

Bremen – De Senat will hüüt besluten, nee’e Schullen in Milliardenhöögde optonehmen. Tohoopnahmen geiht dat üm 1,3 Milliarden Euro. Mit dat Geld will dat Land Bremen ünner annern Minschen op de Flucht ünnerbringen, as ok de Bremer Stratenbahn AG un den städtisch Klinikverbund Gesundheit-Nord ünner de Arms griepen. 300 Millionen Euro sünd för den Ümboo vun de Wertschupp vörsehn, de denn kenen Schaden för dat Klima bringen schall. De Bremer CDU bekrittelt de nee’en Utgaven un foddert, dat Geld inspoort ward.

Ollenborg kriegt nee’et Footballstadion

Ollenborg – De Stadt hett den Neeboo vun een Footballstadion besluten. De Stadtraat hett to de Plaans an’n Abend „Jo“ seggt. Mit dat, wat se fastleggt hebbt, is een Debatt to Enn gahn, de mehr as 20 Johre duert hett. Dat Projekt kost mehr as 50 Millionen Euro. In dat nee’e Stadion ward meist de Football-Regionalligist VfB Ollenborg spelen.  

Dat Weer

Un nu een Blick op dat Weer: in Bremen, Bremerhaben un Deefholt 7 un op Wangerooge sünd dat opstunns 8 Graad. Vundag gifft dat vele Wulken un Aprilweer mit een paar Schuers. Dartwüschen kiekt ok mal de Sünn rut, meist an de Küst. Dar blifft dat bit to’n Abend ok länger mal dröög – bi 9 bit 11 Graad. Tokamen Nacht ward dat na dat Enn vun de Schuers för een länger Tied dröög, darbi klaart dat ok mal op. Bit to’n Morrn hen kummt denn aver wedder mehr Wulken op un dat kann pladdern. Dat Thermometer sackt 6 Graad op de Eilanden un 5 bit 1 Graad in’t Binnenland. Dat kann Boddenfrost geven. Morrn blifft dat Weer mal so, mal so: een Wessel vun velen Wulken un een beten Sünn. Darbi sünd Schuers ünnerwegens – bi 9 bit 12 Graad. Dat weern de Narichten op Platt. Michael Kück hett se tohoopstellt. Op platt trechtmaakt un vörleest hett se Heidi Jürgens.

Bremen Eins Livestream & aktuelle Sendung.

Der Abend mit Norbert Kuntze

Der Abend
Der Abend
  • Der Abend