Plattdeutsche Nachrichten Plattdüütsche Narichten vun'n 18. April 2024

Habeck besöcht to´n 2. Mal in de Ukraine

Kiew: Vizkanzler un Weertschopsminister Robert Habeck is na de Ukraine reist. Vunmorgen keem he in de Hauptstadt Kiew an. Mit sien Besök wullt he wiesen, dat Düütschland de Ukraine op Duer Stütt gifft, see de Minister kort nadem he dor weer. Mit dorbi is en Grupp Ünnernehmer, ünner annern ut Energiewertschop un Rüstindustrie. Tohoop wüllt se sik informeren, wo de Ukraine Stütt bruukt.

EU-Top-Drepen will Strafen gegen den Iran utwieden

Brüssel: De Staats- un Regerensbaas vun de EU hebbt bi jümehren Top-Drepen in Brüssel fastmaakt, de Sankschoon gegen den Iran uttowieden. De Strafen schüllt gegen iransche Ünnernehmen gahn, de bi de Produktschoon vun Drohnen un Raketen mitmaakt. De EU reageert dormit op den iranschen Angreep op Israel verleden Wekenenn. Man ok de russche Krieg gegen de Ukraine keem op´n Disch, de Staats- un Regeerensbaas hebbt Kiew toseggt, sik mehr Möög to geven bi Wapenfrachten.

Höcke vör Gericht vunwegen NS-Parolen

Halle: Vör dat Landgericht hett an Vörmiddag en Perzess gegen den Thüringer AfD-Vörsitter Björn Höcke anfungen. Anklaagt is he, wiel he Kennteken insett harr, de gegen de Verfaten sünd un ok terroristscher Organisatschoon tohöört. Höcke schall op en AfD-Versammeln en Richtwoort bruukt hebben, de vun de SA weer – de Kamporganisatschoon vun de NSDAP. Annerletz hett de Ex-Geschichtslehrer eerst afstrieden, dat he wusst hett, dat sik dat bi sien Wöör üm en verbaden Parool hannelt.

Bremsche Börgerschop snackt över Plaan vör Dubbelhuusholt

Bremen: De Börgerschop snackt siet hüüt Vörmiddag över den Huusholtsplaan för düt un tokamen Johr. Düt Johr plaant dat Land Bremen mit Utgaven vun 5,6 Millarden Euro, tokamen Johr mit wiederen 5,8 Millarden Euro. Finanzsenator Fecker meent, düsse Summen langen nich, üm all Vörhebben to betahlen. Dingsdag hett de Senaat fastsett, dat he nee´e Kredite vun 1,3 Millarden Euro opnehmen will. För dat Halve Geld will he en Nootlaag vermellen.

Bremer Gesundheitsamt bekriddelt Hygiene in´t Krankenhuus Mitt

Bremen: Dat Gesundheitsamt hett woll to´n Deel de Hygiene an´t Krankenhuus Bremen Mitt bekriddelt. Konkret schall dat üm de Desinfektschoon vun Patschientenstuven gahn. Dat vermellt de Werser Kurier un beröppt sik op en Schrieven vun dat Gesundheitsamt. Dor binnen steiht, dat Amt hett den Krankenhuus-Tostännigen mitdeelt, dat hygienisch bi se dat Reinmaaken nich in Ornung is. Enn März keem dat op ene Statschoon to en Kolibakterien-Utbreken, bi en Termin vör Oort hett dat Gesundheitsamt den Hinwies op Hygienfehlers funnen.

Dat Weer

Un nu kiekt wi op dat Weer: In Möppen sünd dat 6 Graad, in Bremen hebbt wi 7 Graad, in Bremerhoben un Emm sünd dat opstunns 8 Graad. Hüüt fangt de Dag mit lachen Sünnenschien an, en poor Wulken sünd aver ok dorbi. Övern Vörmiddag warrn de Wulken mehr un hier un dor kann dat kort mal pladdern, meist is dat aver dröög. Hüüt weiht de Wind flau bet in Maaten, an de Küst frisch vun de nordwesten Kant. Dat Thermometer wiest us 9 bet 12 Graad. In de Nacht warrn de Wulken mehr, an de Noordsee kann dat Regen geven un dat bi 7 bet 4 Graad. De Freedag fangt mit dicke Wulken un deegt Regen an, vun de Noordsee her süht man ok mal Blau mang de Wulken un af un an kiekt ok mal de Sünn dör de Wulken, dor wesselt de Regen in Schuers. Un dat ganze bi 9 Graad op de Eilannen un 11 bet 12 Graad in´t Binnenland.

Dat weren de Plattdüütschen Narichten. Tohoopstellt vun Anja Guse. Op Platt trechtmaakt un vörleest vun Martina Brünjes.