Plattdeutsche Nachrichten Plattdüütsche Narichten vun'n 27. Februar 2024

US-Präsident Biden meent dat bold en Füerpaus mööglich is

Washington: US-Präsident Joe Biden is toversichtlich, dat bold en wiedere Füerpaus in den Gazakrieg mööglich is. He hööpt dat de Verhanneln bet Maandag en gooden Afsluss bringen, see Biden in Nee York. Man bi dat Drepen is keen vörankamen, mellen dorgegen israelsche Medien.

Förderandrääg för Heizungstuusch vun hüüt af an mööglich

Berlin: Minschen de in ehren Eenfamilienhuus de Heizung tuuschen, köönt vun hüüt af an Förderandrääg stellen. Stütt warrt de Tuusch vun oolen fossilen Heizungen gegen klimafründlichen Anlaagen mit en Toschuss vun tominnst 30 Perzent. Höögere Fördersätz gifft dat, wenn jichtenseen en oole Heizung besünners gau tuuscht or för Huusholden mit minner Inkaamen.

Bremer Uni treckt vör dat Bunnsverfatensgericht

Bremen: De Universität Bremen klaagt vör dat Bunnsverfatensgericht gegen Lannsoplagen för experimenteren mit Deerten. Se wehrt sik dormit gegen de strengeren Regeln bi dat Bremer Hoochschoolgesett. Dat stimmt, mellen Uni un dat Gericht buten un binnen. Man dat geiht ok üm de Vörschrift, dat de Uni vun Deerten nalaten schall, de extra för de Lehr dootmaakt wurrn.

Plan för Behölpsbrüch för A27 vun Disch

Bremerhoben: De A27 twuschen Uthlede un Hagen blifft nu doch bet Enn März ganz un gor dicht. De Infall vun een provisoorsche Brüch över dat marode Deelstück, hett de Autobahn GmbH wedder torüchnahmen, vunwegen dat Saneren den länger duert. Nu schall de Afsnitt, wo Water ünnerweg spöölt, so gau as dat geiht repareert warrn. So lang warrt de Verkehr wieder över Lanns- un Bunnsstraaten leit.

Perzess üm Grootfüer in Emder Freebad fangt an

Auerk: Vör dat Lannsgericht fangt hüüt Middag de Perzess üm den groten Brand in dat Emder Van-Ameren-Bad an. Anklaagt sünd dree Minschen twuschen 18 un 26. De Staatsafkaatschop smitt em vör, dat twee dorvun verleden Juli in dat Freebad inbraken sünd, mehr as 1.000 Euro Boorgeld klaut un achterna en Füer leggt hebbt, üm de Spooren wegtomaken. Dat Füer hett en Schaden vun üm un bi twee Millioon Euro anricht.

Dat Weer

Un nu kiekt wi op dat Weer: In Ollenborg hebbt wi twee Graad, in Bremen un Bremerhoben dree Graad un in Veern sünd dat opstunns veer Graad. Hüüt blifft dat dröög, Sünn un Wulken wesseln sik af. De Wind weiht meist flau eerst vun de noordoosten bet noorden Kant, laater den ut verscheeden Richten, an Avend is de Wind hier un dor meist still. Dat Thermometer wiest us fief bet acht Graad. In de Nacht eerst minner wulkig, vun de Noordsee her schuven sik dicke Wulken in´t Binnenland, wenn dat en poor Druppen gifft denn an de Küst, aver ok dor blots as Utnahm, un dat denn bi dree bet een Graad op de Eilannen un null bet minus dree Graad in´t Binnenland. Morgen gifft dat mehr Wulken as Sünn, hier un dor fangt de Dag daakig un gries an, an de Küst kann dat Regen or Spütterregen geven. De Temperaturen liggen bi söven bet acht Graad op de Eilannen un negen bet teihn Graad in´t Binnenland.

Dat weren de Plattdüütschen Narichten. Tohoopstellt vun Irene Lottes. Op Platt trechtmaakt un vörleest vun Martina Brünjes.