Plattdeutsche Nachrichten Plattdüütsche Narichten vun'n 24. Mai 2024

Veer Minschen bi tohoopfallen Gasthuus op Mallorca dootbleven

Palma. Bi den Tosamenfall vun en Gasthuus an de Playa de Palma, dat vull mit Minschen weer, sünd an´n Avend tominnst veer Minschen dootbleven. As de Polizei vermellt, hebbt 16 Minschen böös wat afkregen un wurren in Krankhüüs brocht. Söven dorvun sünd in en legen Tostand. Bi de Doden hannelt sick dat üm dree Froens un een Mann. Dat vermellden de Behörden. De Lüüd, de dootbleven sünd, harrn verscheden Natschonalitäten. En möglichen Grund vun den Tosamenfall, kann na eersten Angaven, en Överlast vun de eerste Etaasch ween.

Justizminister roop na pro-palästinensischen Uni-Protsten to Ornen op

Berlin. Wegen de pro-palästinensisch Protesten an düütschen Universitäten hett Bunnsjustizminister Buschmann de Lüdd, de dor mitmakt, to Ornen repen. Dat draff kien Gefohr, kien Schimp un kien Verlööf vun Straafdelikten geven, see de FDP-Politiker to de Zeitungen vun de Funke-Mediengrupp. In Berlin hett de Polizei an´n Avend en Huus vun de Humboldt-Universität rüümt. Rund 150 pro-palästinensisch Aktivisten harrn dat twee Dag lang besett.

Berlin fiert 75 Johr Grundgesetz mit Demokratiefest

Berlin. In de Hauptstadt warrt wieder de 75. Johrsdag vun dat Verkünnen vun dat Grundgesetz fiert. Na den Staatsakt güstern fangt vundag en Demokratiefest för dree Dag an. Neven Konzerten un noch mehr kunstsinnigen Opföhrens gifft dat ok Drapen mit Bunnskanzler Olaf Scholz un annern Politikern. In Bonn, wo dat Grundgesetz an´n 23. Mai 1949 künnigt makt wurr, findt to glieke Tiet dorto morgen en „Fest vun de Demokratie“ in dat fröher Bunnsviddel statt.

Bremen will bi Vörslag för Verkööpverbott vun Lachgas mitmaken

Bremen. Lachgas is, as dat Gesundheitsressort vermellt, ok in Bremen as Partydroog op den Vörmarsch. Bremen will dorüm gegen den Verkoop an junge Lüüd ünner 18 gegenan stüern. Dat Land Bremen will dorüm bi en Bunnsratvörslag dorför mitmaken. Opstunns würrn de Bunnslänner gemensam doröver snacken, wo sick de Verkoop an junge Lüüd verbeden lett. Al siet Maanden wohrschauen Doktors vör lege Schadens an de Gesundheit dör Lachgas.

Bremer lannsprogramm to´n Heizungstuusch warrt grötter makt

Bremen. Dat Land Bremen ünnerstütt in Tokunft ok den Uttuusch vun olen Gasheizungen mit en egen Förderprogramm. Dat hett de Ümwelt- un Klimadeputatschoon fastleggt. All tohoop schüllt dorför in dat Johr twee Millionen Euro praatstellt weern. Bitto wurr blots de Uttuusch vun olen Öl- un Elektroheizungen mit Lannsmiddeln fördert. Andrääg könen Huuseegner as dat lett af Anfang vun den tokamen Maand stellen.

Dat Weer

Un nu noch en Blick op dat Weer: In Ollenborg 17, in Bremen-Mitt 19, in Bremerhaben 18 un in Weyherbarg sünd dat opstunns 19 Graad. Vundag schient faken de Sünn. In´n Dagsverlop kamen lockere, hier un dor ok dichte opstiegen Wulken op. An´n Namiddag kann dat ok mal Natt vun baven kamen. An de Küst blifft dat länger hell un kloor. De Wind weiht en beten. An´n Namiddag in Maten. Dat Thermometer wiest 18 bit 24 Graad. In de Nacht sünd vele Wulken an´n Heven un vun de süden Kant fangt dat an to pladdern. Blitz un Donnerslag könen ok dorbi ween. De Temperaturen liggen bi 12 bit 15 Graad. Morn fangt dat mit dichten Wulken un Regen an. Hier un dor schafft dat ok de Sünn dör de Wulken. Aver Schuer und Gewidder sünd ok an´n Namiddag möglich. 18 bit 21 Graad wiest dat Thermometer. Sünndag: Sünnschien, to´n Deel dichte Wulkenfeller, viellicht mal en Gewidderschuer an´n Namiddag un Avend bi 19 bit 24 Graad.

Dat weern de Narichten op platt. Tohoopstellt hett se Anja Guse. Op Platt trechtmaakt un vörleest vun Markus Weise.