Plattdeutsche Nachrichten Plattdüütsche Narichten vun'n 7. Juni 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 7. Juni 2024

  • Missbruukvörholden gegen fröher Karken-Mitarbeiter in Bremen
  • Kuntrullen an de Grenzen bi Football-EM
  • Bunnsdag betert dat Cannabis-Gesetz na
  • Bremer Freebäder kriegen Sekerheitsdeenst
  • Stratenkunstfestival La Strada fangt in Bremen an
  • Dat Weer
Bild: Radio Bremen

Informationen zum Audio

Missbruukvörholden gegen fröher Karken-Mitarbeiter in Bremen

Bremen. De Staatsafkaatschop geiht gegen en fröher Mitarbeiter vun de Bremisch Evangelisch Kark vör. Em warrt sexuell Missbruuk vun Kinner vörsmeten. Vörher harr de Kark Straafanzeig mellt. De dat wen schall, arbeid vun 1993 bit 2013 in de St.-Martini Gemeend Lesum. He pass dor op de Konfirmanden op un hett jümmers mal wedder Freetietaktschonen för Kinner un junge Lüüd utricht. De bet nu bekannt wurren Vörfäll liggen in de Tiet 1997 bit 2000 un 2002/ 2003.

Kuntrullen an de Grenzen bi Football-EM

Berlin. Wegen de Football-EM kann de Bunnspolizei vun nu an an allen düütschen Grenzen för korte Tiet kuntrullieren. Dat hett dat Bunnsbinnenministerium vermellt. Dat gellt dorna ok för de bet nu nich bedrapen Grenzen na Däänmark, Frankriek un den Benelux-Staaten. De Kuntrullen sünd Deel vun dat Sekerheitskonzept vun de Football-EM, de in en Week anfangt.

Bunnsdag betert dat Cannabis-Gesetz na

Berlin. De Bunnsdag hett dat Gesetz to de Cannabis-Freegaav wat nabetert. De Regeln sehn nu en Grenzweert för Autofohrers vör. De liggt in Tokunft bi 3,5 Nanogramm THC per Milliliter Blootserum. As de Expertenkommischon vermellt, is düsse Weert as null Komma twee Promill Alkohol in´t Bloot. För Fohranfängers is Cannabis an´n Lenkrad heel un deel verbaden.

Bremer Freebäder kriegen Sekerheitsdeenst

Bremen. In de Freebäder vun de Stadt Bremen kaamt in düsse Saison to´n eersten Mal en Sekerheitsdeenst to´n Insatz. Dat kann een ut en Vörlaag för dat Drapen vun de Sportdeputation in de tokamen Week rutlesen. Utlöser sünd de velen Angrepen op Mitarbeiters vun Badeanstalten in düütschen Grootsteden. So wurren in dat Süüdbad vun Bremen in de verleden Week Mitarbeiters vun junge Minschen angrepen un hebbt dordörch ok wat afkregen.

Stratenkunstfestival La Strada fangt in Bremen an

Bremen. In Bremen fangt an´n Avend dat internatschonal Stratenkunstfestival „La Strada“ an. Bit Sünndag warrt mit 44 europäisch Künstlers rekend. Dat vermellt de Festivalleitung. All tohoop gifft dat 60 Shows rund üm den Marktplatz in Bremen, den Dom, in den Wallanlagen as ok in dat Viddel. Dat is de 30. Utgaav vun dat Festival. De mehrsten Veranstalten kosten kien Geld.

Dat Weer

Un nu noch en Blick op dat Weer: In Nienborg 15, in Bremen-Mitt un in Bremerhaben 14 un in Demorst sünd dat opstunns 17 Graad. Vundag gifft dat en Mischmasch ut dicken opstiegen Wulken un korten Afsnitten mit Sünnschien. In Dagsverloop kamen vun Oostfreesland enkelte Schuer un korte Gewidder. De Wind weiht vun de süüdwesten bit westen Kant en beten bit in Maten. Dat Thermometer wiest 16 bit 19 Graad. In de Nacht lösen sick de Regenschuer in´t Binnenland op. De Wulken lockern op un een kann hier un dor de Sterns sehn. An de Nordsee sünd Wulken ünnerwegens. Acht bit elven Graad stahn denn op dat Thermometer. Morn is de Heven vull vun Wulken. In Süüden schient af un an de Sünn. In´n Dagsverloop kaamt dat vun de Nordsee her natt vun baven. An Namiddag regent dat ok en beten hier un dor in´n Süüden vun Bremen. 16 bit 20 Graad stahn denn op dat Thermometer. Sünndag wesseln sick Sünn un Wulken bi 14 bit 18 Graad af.

Dat weern de Narichten op platt. Tohoopstellt hett se Elena Fortmann. Op Platt trechtmaakt un vörleest vun Markus Weise.

Bremen Eins Livestream & aktuelle Sendung.

Der Samstagabend mit Till Kohlwes

Der Samstagabend

Jetzt läuft:

Rockwell Somebody's Watching Me
  • Jetzt läuft:

    Rockwell Somebody's Watching Me