Plattdeutsche Nachrichten Plattdüütsche Narichten vun'n 5. Juni 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 5. Juni 2024

  • Jümmers noch leeg: Hoochwater in’t ööstliche Bayern
  • Kabinett: Mehr Stütt för billig Wahnen
  • Dat Water in de Noordsee weer noch nie so warm
  • Konferenz vun de Justizministers snackt över Geld ut Straafdelikten
  • Moord an Süster: Ordeel kummt
  • Dat Weer
Bild: Radio Bremen

Informationen zum Audio

Jümmers noch leeg: Hoochwater in’t ööstliche Bayern

Regensborg: Bi dat Hoochwater in Süüddüütschland sünd bet nu fief Minschen to Dode kamen, na annern söökt se noch. Leeg süht dat jümmers noch in den Oosten vun Bayern ut. Vör allen in Regensborg is de Laag eernst. De Pegel steiht böös hooch un geiht blots ganz suutje daal, sä en Sprekersch vun de Stadt vunmorgen. De Hoochwater-Narichtendeenst vermellt: Dat Water in de Donau steiht wiet över söss Meter hooch – normaal sünd sowat dree Meter. In Baden-Württembarg süht dat al wat beter ut.

Kabinett: Mehr Stütt för billig Wahnen

Berlin: De Bunnsregerung will mehr Fördergeld dorför geven, dat dat Wahnen nich so düer is. Inrichten wüllt se en „Ne’e Wahngemeennützigkeit“. So steiht dat in de Stuttgarter Zeitung un de Stuttgarter Narichten. Soziale Ünnernehmen köönt denn billige Wahnungen an gemeennützige Stiftungen geven un mööt dorför weniger an Stüern betahlen.

Dat Water in de Noordsee weer noch nie so warm

Helgoland: Dat Water in de düütsche Noordsee is verleden Johr so warm ween as noch nie, so lang as se dat opschrieven doot. Dat hett dat Bremerhavener Alfred- Wegener-Institut rutfunnen. De Forschers meent: Dat liggt an den Klimawannel. Över dat hele Johr 2023 weer de Noordsee 11,9 Graad warm. Een Dag in’n September-Maand weren dat 19,5 Graad. Bi so’n Warms müss een sik Sorgen maken. Nu al ännert sik de Deerten un Planten in de See.

Konferenz vun de Justizministers snackt över Geld ut Straafdelikten

Bremen: Bremen un Neddersassen wüllt dor op daal, dat de Behörden eenfacher an Geld ut Straafdelikten rankaamt. De Reform hett Bremens Justizsenatersch Schilling anstött. De Justizministers vun den Bund un de Länner wüllt dat vundaag bi jemehr Konferenz in Hannover op’n Weg bringen.

Moord an Süster: Ordeel kummt

Bremen: In den Perzess um den Dood vun en junge Fro rekent se vunnamiddag mit dat Ordeel. Beklaagt warrt vör dat Bremer Landgericht de Broder. De Staatsanwaltschap seggt: Dat weer gemenen Moord. Se is seker: De Mann ut Somalia weer mit ehr Oort, in Düütschland to leven, nich inverstahn, un dorüm hett he sien Süster umbröcht. Mit den Moord wull de Mann vun 24 Johr de Ehr vun de Familie wedder op fasten Grund stellen.

Dat Weer

Un woans süht dat mit dat Weer umto ut? Opstunns hebbt wi in Bremerhaven un Ollenborg 13 Graad, in Bremen un Achem sünd dat 14 Graad. Vundaag: Eerst kann dat mal um mal pladdern, ok mal duller, man dat treckt gau na Süüdoosten af. Achteran lockert dat op un wi kriegt ok de Sünn to sehn. An’n Namiddag un Avend schuert dat blots noch af un an mal. Dat Thermometer krabbelt op 15 bet 19 Graad. De Wind dorto weiht in Maten, an de See ok frisch vun de westen Kant, un dat mit starke Böen. Tokamen Nacht: De letzten Schuer lööst sik op, un denn staht blots noch en Handvull Wulken an’n Heven, oder dat is kloor. Fröh an‘n Morgen treckt an de See en poor Wulkenplacken op. Bi 11 Graad op de Inseln un 9 bet 5 Graad in’t Binnenland. Morgen: Eerst hell un kloor mit Sunnschien un en poor Wulken. Över Dag billt sik mehr un mehr dicke Wulken ut, un de bringt an’n Namiddag Schuer mit. De köönt ok mal deegt daalkamen, mag ween ok mit Blitz un Dunnerslag. Bi 15 bet 18 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Katrin Martens.

Bremen Eins Livestream & aktuelle Sendung.

Der Samstagabend mit Till Kohlwes

Der Samstagabend

Jetzt läuft:

Rod Stewart Maggie May
  • Jetzt läuft:

    Rod Stewart Maggie May