Plattdeutsche Nachrichten Plattdüütsche Narichten vun'n 3. Juni 2024

Scholz reist in’t Hoochwaterrebeet

Reichertshofen – Bunneskanzler Scholz ward sik hüüt sülfst een Bild vun de Hoochwaterlaag in Süddütschland maken. Tohoop mit Binnenministersche Faeser un den bayrischen Ministerpräsidenten Soeder besöökt he Reichertshofen in Oberbayern. Vör allens in Delen vun Bayern un Baden-Württembarg is de Hoochwaterlaag leeg. In een paar Oorten mussen de Lüüd ut ehr Hüüs rut.

FDP un CDU freit sik över Heils nee’e Plaans för de Rent

Berlin – Politiker vun CDU un FDP freit sik över Plaans vun Bunnesarbeitsminister Heil. He will dat henkregen, dat de Minschen länger arbeiden wüllt. De FDP-Bunnesdagsafordnete Kober snack in de Bild-Zeitung vun een wichtig Boosteen, üm dat aftofangen, dat de Lüüd jümmer öller ward. Heil will een Stüerbonus för all, de ut free’en Stücken länger arbeiden wüllt. Düsse Rentenreform will he noch vör de Sommerpaus op’n Weg bringen.

Steinmeier bedrapen över Dod vun Polizisten

Berlin – Vele Politiker hebbt sik deep bedrapen wiest na den Dod vun een Polizisten achter een Metz-Attack in Mannheim. Bunnespräsident Steinmeier is bang, dat politische Striets jümmer fakener mit Gewalt utdragen ward. „So draff dat nich wietergahn. Gewalt bringt dat in Gefohr, wat us Demokratie stark maakt hett“, sä de Bunnespräsident. De Attack vun Mannheim hett een nee’e Debatt över de Gefohren vun’n Islamismus utlööst.

Nee’e Sekerheitskrus an’n Bremer Hauptbahnhoff

Bremen – An’n Hauptbahnhoff geiht vun hüüt an een Kru vun veer Sekerheitslüüd tohoop loos. Blangen Polizisten sünd ok Mitarbeider vun’n Ordnungsdeenst un de DB-Sekerheit mit darbi. Dat de Lüüd dar tohoop rümgaht, schall darvör sorgen, dat de Reisenden sik sekerer föhlt un se gau op Probleems antern köönt. De Veer sünd jümmer twüschen Klock 7 un Klock 11 an’n Morrn un namiddags vun Klock 4 bit abends üm 8 ünnerwegens.

Füer in Huus in Bremerhaben

Bremerhaben – In Lehe is de Füerwehr in de Nacht to een Füer in een Mehrfamiljenhuus utrückt. As se ankamen is, stunn all de Front un een Kinnerzimmer in’t Parterr in Flamms. De Bewahner harrn sik dar all in Sekerheit bröcht. In dat Huus kann nu erstmal nümms mehr wahnen. Woso dat brannt hett ward noch ünnersöökt.

Dat Weer

Un nu een Blick op dat Weer: in Deefholt 13, in Bremen, Bremerhaben un op Wangerooge sünd dat opstunns 14 Graad. Hüüt sünd meist dicke Wulken an’n Heben un de Sünn schient blots mal kort hier un dar. Meist kummt wi dröög dör den Dag, man verenkelt kann dat een beten natt vun baben kamen – bi 15 bit 16 Graad op de Eilanden un 17 bit 19 Graad in’t Binnenland. Tokamen Nacht ward dat dull wulkig un dat lockert meist nich op. Vun de Nordsee her kann Regen opkamen. Dat Thermometer sackt op 14 bit 12 Graad. De Dag morrn fangt dick wulkig an, verenkelt ok mit een beten Regen. An’n Middag un Namiddag kann dat een beten oplockern un de Sünn kiekt rut, dat kann aver ok wedder orrig pladdern – bi 18 bit 21 Graad. Dat weern de Narichten op Platt. Birgit Sagemann hett se tohoopstellt. Op platt trechtmaakt un vörleest hett se Heidi Jürgens.