Plattdeutsche Nachrichten Plattdüütsche Narichten vun'n 29. April 2025

Stroom in Spanien un Portugal binah överall wedder dor

Madrid: Achterna den massiven Stroomutfall in Spanien un Portugal normaliseert sik de Laag langsaam. De tostännige Nettbedriever maakt künnig, dat de Stroom meist wedder dor is. Ok in Portugal warrt de mehrsten Huusholte wedder versoorgt. Wat dor achter stickt is aver noch nich kloor. Dör den Stroomutfall hebbt güstern ünner annern dusende Minschen in Spanien un Portugal stünnenlang in Tögen, an Flegerhavens un Optöög fastseten. Telefon un Internett hett ok nich funktschoneert.

Elektroonsche Patschentenakte geiht bunnswiet an den Start

Berlin: In Düütschland gifft dat vun hüüt af an de elektroonsche Patschentenakte – kort ePA. De Akt bünnelt all Behannelnsinformatschoon vun den Patschienten un schall ünner annern hölpen to verhinnern, dat Dokters Ünnersökens duppelt maakt or Heelmiddel mit schäädlich Wesselwarken verschrievt.

Beleeftheitsweert för Börgermester Bovenschulte sackt daal

Bremen: Bremens Regeernsbaas Andreas Bovenschulte vun de SPD is twars wiederhen dat geernst sehen Senaatsliddmaat, man sien Beleeftheit sackt daal. Dat is ut de Ümfraag vun Infratest dimap in Opdrag vun Radio Bremen rutsuert. Dorna is goot de Hälft vun de fraagt Minschen mit Bovenschultes Arbeid tofreden, vör twee Johren weren dat noch knapp twee Drüttel.

Satellit mit Bremer Andeel start in´t All

Bremen: Vun den Weltruumbahnhoff Franzöösch-Guyana start üm Klock veertel na ölven en Satellit in dat All, wo ok Bremer Firmen mitarbeit hebbt. Dat is en Eerutforschenssatellit. Dat Programm schall Informatschoon över den Tostand un Verännerung vun Woolden op de Eer sammeln. An den Bo vun den Satelliten hebbt ok de Bremer Firmen Airbus Defence and Space , OHB, DSI Aerospace un dat ZARM an de Uni Bremen mitmaakt.

Bremer Abiturprövens hebbt anfungen

Bremen: In dat Land Bremen hebbt vunmorgen de schriftlichen Abiturprövens anfungen. As eerst Fach warrt Düütsch pröövt. De letzten Pröövens sünd för den 21. Mai plaant. An den apentlichen Schoolen in de Stadt Bremen sünd mehr as 1.900 Schölers för dat Abitur tolaaten. Dorto kaamt noch de Afsolventen vun de Fachbaverschool, de Beroopsschool un de privaaten Scholen.

Dat Weer

Un nu kiekt wi op dat Weer: In Bremen un Bremerhoben sünd dat 12 Graad, in Deefholt un Emm hebbt wi opstunns 13 Graad. Hüüt lacht de Sünn den ganzen Dag, man en poor lütte Wulken sünd ok dorbi. Dat blifft Dröög bi 18 bet 22 Graad in´t Binnenland un 15 bet 17 Graad an de Küst un op de Eilannen. In de Nacht licht wulkig, in´t Binnenland köönt wi liekers de Steerns funkeln sehen, hier un dor is ok Daak mööglich bi 10 Graad op de Eilannen un an de Küst, in´t Binnenland sackt dat Thermometer op 8 bet 5 Graad daal. Middeweken fangt mit fröhen Daak an, achterna lacht de Sünn, man ok lütte Wulken sünd an Heven, dat blifft aver dröög bi 20 bet 24 Graad in´t Binnenland un 16 bet 19 Graad an´ne Küst.

Dat weren de Plattdüütschen Narichten. Tohoopstellt vun Katrin Martens. Op platt torechtmaakt un vörleest vun Martina Brünjes.