Plattdeutsche Nachrichten Plattdüütsche Narichten vun'n 28. April 2025

Merz maakt Minister ut CDU künnig

Berlin: CDU-Baas Friedrich Merz hett hüüt Vörmiddag de designeerten Minister ut sien Partei för de swatt-rode Bunnsregeern künnig maakt. Dorbi schall de Bunnsdagsafordnete Johann Wadephul dat Butenministerium stüern. De Ex-Ümwelt- un Verkersstaatssekretärsche Katherina Reiche schall Weertschopsministerin warrn. Dat Rebeet Verkehr övernimmt de Bunnsdagsafordnete Patrick Schnieder, Billung geiht an Karin Prien ut Schleswig-Holsteen. Gesundheit stüert Nina Warken. Dat nee Ministerium för Digitaliseren un Staatsmoderniserung schall de Ünnernehmer Karsten Wildberger övernehmen.

SPD un CDU verleert na Infratest-Ümfraag in Bremen

Bremen: Wenn an Sünndag in Bremen de Börgerschop wählt würr, denn weer de SPD wiederhen starkst Kraft. Dat is bi en Ümfraag vun infratest dimap rutsuert, de Radio Bremen to de Halftiet vun de nu lopend Legislaturperiood, in Opdrag geven hett. Dorna kaamt de Sozialdemokraten op 25 Perzent, fief Punkte minner as bi de verleden Wahl in Bremen vör twee Johren. De CDU sitt achterna op Platz twee mit 22 Perzent, de AFD kriggt 15 Perzent. Gröne un Linke winnt dorto mit 14 un 13 Perzent. De FDP un Bündnis Düütschland fallt na de Ümfraag ünner de 5-Perzent-Mark.

Freedensforscher mellt mächtig Anstieg vun Rüstutgaven weltwiet

Stockholm: De Rüstutgaven op de ganzen Welt sünd verleden Johr mit binah 2,4 Billioon Euro mächtig na baven gahn, mellt dat Stockholmer Freedensforscherinstitut Sipri. Dat sünd meist 9 Perzent mehr as dat Johr dorvör. Siet Enn vun den kolen Krieg hett dat nienich so en düchtig Anstieg binnen een Johr geven. De USA, China un Russland hebbt an mehrsten utgeven, op Platz veer lannt Düütschland.

Dat tweete Nattgas-Schipp schall in Willemshoben ankamen

Willemshoben: In den Haven vun de Stadt kummt wohrschienlich gegen Middag en wieteres Spezialschipp, de „Excelsior“ an, dat Nattgas in Eerdgas ümwanneln kann, maakt dat staatlich Ünnernehmen „Düütsche Energy Terminal“ künnig. Över dat Schipp schall dorna noch düt Johr twee Milliarden Kubikmeters Eerdgas in dat düütsche Nett inleid warrn.

Halve Millioon Minschen besöökt Bremer Oosterwischen

Bremen: De Oosterwischen hett ok düt Johr wedder meist en halve Millioon Minschen anlockt. Dat hett Weertschopssenatorsche Kristina Vogt seggt. De Polizei snackt von en meist verdreeglich Familienfest. Na den Schaustellerverband leep de Hannel twaars an männich Daag slepig, hett aver an dat letzte April-Wekenenn nochmal antrocken. Güstern Avend is dat Volksfest denn na rund twee Weken to Enn gahn.

Dat Weer

Un nu kiekt wi op dat Weer: In Bremen un Bremerhoben sünd dat 11 Graad, in Möppen un Emm hebbt wi opstunns 12 Graad. Hüüt lacht de Sünn den ganzen Dag, man en poor lütte Wulken sünd aver ok dorbi. Dat blifft Dröög bi 15 Graad op de Eilannen un 18 bet 21 Graad in´t Binnenland. In de Nacht blifft dat wiederhen dröög un wi seht de Steerns blinkern bi 10 Graad op de Eilannen un an de Küst, in´t Binnenland bi 8 bet 4 Graad. Morgen evenso as hüüt, Sünn, lütte Wulken un dat blifft dröög bi 18 bet 22 Graad in´t Binnenland, an de Küst un op de Eilannen kriggt wi 15 bet 17 Graad.

Dat weren de Plattdüütschen Narichten. Tohoopstellt vun Anja Guse. Op platt torechtmaakt un vörleest vun Martina Brünjes.