Plattdeutsche Nachrichten Plattdüütsche Narichten vun'n 30. April 2025

US-Präsident Trump maakt Toll-Plaans för Autoboers weker

Washington: US-Präsident Donald Trump kummt de Autoboers in Amerika in de Mööt un maakt sien Plaans för de Töll in dütt Wirtschaftsfeld weker. Autoboers, de al 25 Perzent Töll op Autoimporte betahlt, mööt keen wieteren Toll betahlen. So gifft dat keen wietere Afgaven, to’n Bispill op Stahl un Aluminium, dormit dat keen Duppelbelasten gifft. Düsse Regeln gellt ok für butenländische Autoboers, de in de USA produzeert.

Trump mit sien eersten 100 Daag Amtstiet bannig tofreden

Washington: Siet Januar leggt Donald Trump jümmer wedder Saken fast, mit de veele nich inverstahn sünd. De Republikaner sülbens findt sien Bilanz besünners goot. Sietdat sien twete Amtstiet anfungen hett, sünd dat de besten eersten 100 Daag in de Geschicht vun’t Land, as he sien Anhängers in’n Bunnsstaat Michigan verklaart hett. Leege Ergevnisse in de Ümfragen to de eersten 100 Daag in’t Amt betekent he as fälscht. Kritikers vun Trump wohrschaut vör Schaden an Wirtschaft, Rechtsstaat un Gesellschaft för en lange Tiet.

Tokamen Kanzleramtsbaas Frei maakt strengere Migratschoonspolitik künnig

Berlin: Thorsten Frei, de woll Kanzleramtsminister warrn schall, hett künnig maakt, datt de Migratschoonspolitik vun’n eersten Dag vun de nee’e Regeern an strenger ward. Jedeen, de versöcht, illegal na Düütschland to kamen, mutt vun’n 6. Mai an dormit reken, datt an de düütschen Grenz Sluss is, säe de CDU-Politiker to de Funke Mediengrupp. De Asylandrag mutt na europääschen Recht dor stellt warrn, wo een to’n eersten Mal en Foot in de Europääsche Union sett. Dat is meisttiets nich Düütschland.

Kooperatschoonsverdrag twüschen Bremen un Neddersassen för Versörgen mit Drinkwater

Bremen: Dormit dat ok in de tokamen Johrteihnten noog Drinkwater ut dat Ümland gifft, hett Bremen en Kooperatschoonsverdrag mit de neddersäss’schen Waterversörgern slaten. Bremen un Neddersassen ward dor in Tokunft noch enger tosamenarbeiden, as Bremens Ümweltsenatersche Kathrin Moosdorf vermellt. Dat is wichtig bi den Verbruuk, de jümmer höger ward. Bremen un Bremerhaben kriggt jüst 20 Perzent vun dat, wat an Drinkwater bruukt ward, ut Bremer Borns. De Rest kummt vun ümto.

Naturschutzbund fordert to Mai ahn Meihen op

Hannover: De Natuurschutzorganisatschoon NABU Neddersassen fordert Lüüd mit Goorn dorto op, in’n Maimaand weniger to meihen. De Akschoon „Mähfreier Mai“ schall Insekten as Immen un Hummeln dorbi hölpen, datt se mehr to‘n Freten findt. Wenn nich meiht ward, köönt ok Wildblomen as Mageriten un Klatschmohn blöhen. Denn köönt Insekten Nektar un Pollen för sik un den Nawuss ernten. De Akschoon kummt egentlich ut England, wo de Rasen besünners kort is un Wildblomen meist keen Schangs hebbt.

Dat Weer

Un nu en Blick op dat Weer: In Ollenborg 10, in Leer 11, in Cloppenborg 14, un in Achim sünd dat opstünns 15 Graad. Hüüt gifft dat en Mix ut veel Sünnschien un en poor lockere oder dünne Wulkenfeller. Hier un dor gifft dat af un an för längere Tiet veel Sünnschien. Dat blifft dröög bi 19 bet 24 Graad in’t Binnenland un 15 bet 18 Graad an de Küst. In de Nacht is dat licht wulkig oder de Steerns funkelt an’n Heben. Dorbi blifft dat dröög. An de Küst un op de Eilannen fallt dat Thermometer op 11 bet 10 Graad, un in’t Binnenland op 7 bet 5 Graad. Morgen geiht dat mit veel Sünnschien un dünne, lockere Wulken dröög wieter. Dat ward bannig warm mit 23 bet 28 Graad op’t Fastland un 20 Graad op de Eilannen. Freedag gifft dat blangen Sünnschien vun Tiet to Tiet dichtere Wulken, enkelte Schuers un korte Gewidder bi 16 bet 25 Graad.

Dat weern de Narichten op platt. Tohoopstellt hett se Sven Weingärtner. Op Platt trechtmaakt un vörleest vun Marc Gelhart.