Plattdeutsche Nachrichten Plattdüütsche Narichten vun'n 6. Mai 2025

Wahl to`n Bundskanzler för Fiedrich Merz is in`t erster Anloop fehlslaan

Berlin: Bi de Wahl vun´t nee`en Bundskanzler is in de eerste Wahlrunn an´t Vomdag , de Wahl för Friedrich Merz fehlslaan. He hett 310 Ja-Stimmen kregen. Dat sünd 6 minner as he för de afslute Mehrheit bruukt. 307 Afordnete hebbt mit „Nee“ stimmt. In düsse Stünn loppt een wietere Wahlgang. Egens schull in düsse Minuten Bundspräsident Frank-Walter Steinmeier den nee`en Bundskanzler de Ernennungsurkunn övergeven. Dat treckt sik nu noch hen.

Scholz seggt tschüss mit groten Tappenstriek

Berlin: Den Ex-Bunnskanzler Olaf Scholz hett man an´t Avend mit eenen groten Tappenstriek vun de Bunnswehr ut sien Amt tschüss seggt. De Musikkapell vun de Trupp hett een paar Leder speelt, de Scholz sik utsöcht harr. De SPD-Politiker hett dorbi de Demokraten in´t Land opropen, dat se tosamen hollt. He seggt ok, datt dat in düsse Tieden heel nich normal is, dat een Wessel in´t Amt so anstännig un liedsaam as in Düütschland afloppt.

Brem`sche Börgerschaft stimmt över AfD-Verbodd af

Bremen: In de Brem`sche Börgerschaft stimmt se an´t Nomdag över eenen Andrag för een Verbodd vun de AfD af. De Regeerungsfraktionen vun Bremen SPD, Gröne un de Linkspartei willt den Senat upfordern, sik in´t Bund för een flinket AfD-Verbodd intosetten. Grund dorför is, dat de Verfatensschutz meent, dat de AfD „gesekert rechts-extremistisch“ intostufen is. Vör good een Johr harr sik Bremen in´t Budesrat ok all för een AfD-Verbodd insett, man dor is nix bi rutkamen.

Keen Föhrerschien-Tuusch för de Ollen in de Stadt Bremen

Bremen: In de Stadt Bremen gifft dat wieder keen Föhrerschien-Tuusch för de Ollen. Anners as in Bremerhaben. Dor kann man sienen Föhrerschien gegen een Ticket för Stratenbahnen un Bussen, för umsünst, intuuschen. Den Andrag vun de CDU hett gistern de Börgerschaft mit de Stimmen vun de rot-grön-rote Koalition aflehnt. Se seggt, datt dat to düür is. De CDU will, dat all Bremerinnen un Bremer vun 70 an de Mööglichkeit hebbt, ehren Föhrerschien intotuuschen.

Wangerooge: Vele willt dat Amt vun´t Börgermeester

Wangerooge: Bi dat Söken na eenen Kandidaten för dat Amt vun´t Börgermeester op dat Eiland Wangerooge, in de Noordsee, hebbt se all mehr as 400 Lüüd, de den Posten willt. Dat seggt de Grönen. Se harrn tosamen mit CDU un SPD Anzeigen in de regionalen Zeitungen sett. De Parteien sünd daarher toversichtlich, datt se eene Kandidatin or eenen Kandidaten bit Midde August finnt. Denn is de Börgermeesterwahl plaant. De Posten is siet Harvst 2023 nich besett.

Dat Weer

Un nu een Blick op dat Weer: in Bremen, Bremerhaven un Defhold 8, un in Cuxhaben sünd dat opstünns 11 Graad. Hütt geiht dat eerst mit dicke Wulkenfeller los. Man denn lockert dat up un wi hebbt eenen fründlichen Mix ut Sünn un Wulken, dat blifft meist dröge, bi 11 bit 15 Graad. Tokamen Nacht meist luckere Wulken un deels klar. Vun de Noordsee her treckt dichtere Wulken up de na Süden treckt. Dor kummt aver nix vun baven rünner, bi 5 bit 2 Graad. An de Küst is dat milder bi 9 bit 7 Graad. Morrn wesselt sik de Sünn un de Wulken af. Hier un dor kummt ok mal Natt vun baven rünner. De meiste Sünn schient in Oostfreesland. De Temperaturen liggt bi 13 bit 18 Graad. Dunnersdag is dat jüst so wesselhaft. Mit Sünn un opstiegende Wulken, man meist överall dröge, bi 13 bit 18 Graad. Dat weren de Narichten op Platt. Tohoopstellt hett se Michael Kück. Trechtmaakt un vörleest vun Antje Kruppa.