Plattdeutsche Nachrichten Plattdüütsche Narichten vun'n 02. Mai 2025

EU sleiht vör, sik mit den USA eenig to warrn

Brüssel – De EU hett een Vörslag vörleggt, üm sik mit den USA in‘n Hannelsstriet to eenigen. As de Financial Times vermellt, schall mehr ut de Vereenigten Staaten inföhrt weern. Dat schall üm Waren in’n Wert vun 50 Milliarden Euro gahn – to’n Bispill Nattgas or Soja. De USA schüllt op de anner Siet Sünner-Tölle op EU-Waren strieken.

Reporter ahn Grenzen sütt gröttere Gefohr för de Freeheit vun de Press

Berlin – Op de hele Welt ward sik jümmer weniger schert üm de Freeheit vun de Press, wahrschaut de Reporter ahn Grenzen. De Laag för Schrieverslüüd is nu so slecht as noch nie nich. In 90 vun 180 Lännern hett de Organisatschon de Laag as „vigeliensch“ or „bannig ernst“ betekend. Blots in söben Lännern is se „goot“. Dütschland is in de List üm een Platz trüch op Rang olben afrutscht.

Scholz besöökt den evangelisch Karkendag

Hannober – Bunneskanzler Scholz, de nu noch de Geschäften föhrt, besöökt vundaag den 39. Evangelschen Karkendag. He will mit Lüüd över dat Thema „Toversicht in keddeligen Tieden“ snacken. För Scholz is dat een vun de letzten Male, dat he as Regeernbaas optreedt. De Evangelsche Karkendag in Hannober duert noch bit Sünndag.

Kulturfest Kültürale fangt in Bremen an

Bremen – Dat Kulturfest „Kültürale“ fangt vundaag an. Bit to’n Enn vun’n Mai wiest vele Veranstalten dat, wat dütsche, türksche un dütsch-türksche Künstlerinnen un Künstler so op de Been stellt. Dat Kulturspektakel gifft dat all to’n veerten Mal in Bremen.

Linie 1 bruukt wegen Booarbeiden nu länger

remen – Fohrgäst vun de Bremer Stratenbahnlinien 1 un N1 mööt sik an dütt Wekenenn darop instellen, dat de Fohrt länger duert. Darachter stickt, dat in’t Flach vun de Kirchbachstraat an de Gleise boot ward. Vun hüüt Abend bit Mondag fröh ward dar de hele Tiet arbeidt. Twüschen de Haltestäen Kirchbachstraat un Kurt-Huber-Straat fohrt denn Busse.

Dat Weer

Un nu een Blick op dat Weer: op Wangerooge 12, in Bremerhaben 18, in Bremen un Deefholt sünd dat opstunns 21 Graad. Vundag gifft dat blangen Sünnschien to’n Deel dicke Wulken un een paar Schuers. An’n Namiddag kann dat in’n Süden vun’t Bremer Ümland verenkelt dulle Grummelschuers mit Hagel un stürmschen Boijen geven – bi 15 bit 16 Graad op de Eilanden un 20 bit 26 Graad in’t Binnenland. Vun’n Middag an ward dat vun de Nordsee her köhler. Tokamen Nacht lockert de Wulken op, dat blifft dröög un in de Fröh kann Nevel opkamen. Dat Thermometer sackt op 10 bit 5 Graad. Morrn wesselt sik Sünn un een paar lockere Wulken af. An’n Namiddag treckt vun de See mehr Wulken över us weg un dat kann an de Nordsee Regen geven. To’n Abend hen lockert dat aver all wedder op – bi 13 bit 19 Graad. Dat weern de Narichten op Platt. Irene Lottes hett se tohoopstellt. Op platt trechtmaakt un vörleest hett se Heidi Jürgens.