Plattdeutsche Nachrichten Plattdüütsche Narichten vun'n 5. Mai 2025

SPD maakt Kandidaten för Ministerposten künnig

Berlin – De SPD hett an’n Morrn ehr 7 Kanidaten för de Ministerposten bekannt maakt. Dat heet, dat de bitnu Bunnesdagspräsidentin Bärbel Bas Arbeits- un Sotschalministersche ward. Verdeffenderen-Minister Boris Pistorius blifft in’t Amt. De bitnu Ost-Beopdragte Carsten Schneider ut Thüringen kriegt dat Ümweltressort. Dat Flach Justiz geiht an de Bildenministersche ut Rheinland-Pfalz, Stefanie Hubig. Reem Alabi-Radovan övernimmt dat Entwicklungsressort – vördem weer se Integratschonsbeopdragte. Parteiböverste Saskia Esken geiht leer ut.

Rechtspopulist bi Wahl in Rumänien vörn

Bukarest – Dat EU- un Nato-Land Rumänien beleevt woll bold een Rechtsruck. Bi de Präsidentenwahl, de nochmal dörföhrt worrn is, hett de rechtsradikale Kandidat Simion de erste Runn mit een groden Afstand wunnen. In de Prickwahl geiht he nu gegen den Tweten, den liberalkonservativen, parteilosen Börgermeister vun Bukarest, Dan, in’t Rennen.

Trump will Alcatraz wedder open maken

Washington – US-Präsident Trump will dat ehemalig Kaschott Alcatraz wedder open maken. Trump hett ankünnigt, dat he de Anlaag ümboon un vergröttern laten will, üm dar Verbreker, de böös wat anricht hebbt, ünnertobringen. Alcatraz is een vun de striedigsten Kaschotts vun den USA, wo dat ruug togahn is. Bit 1963 hebbt op dat Eiland Verbreker as Al Capone inseten. Hüüt steiht de Insel ünner Denkmal- un Naturschutz, dar is een Museum op un se is een Brutstäe för vele Vagels.

Perzess wegen Moord fangt vör dat Bremer Landgericht an

Bremen – Vör dat Landgericht staht vun vundaag an twee Mannslüüd wegen Moord. Jem ward vörsmieten, dat se in’n verleden September een 40-jöhrigen Mann op den Waller Karkhoff angrepen un ümbröcht hebbt. Woso se dat daan hebbt, is noch nicht klaar. Beid Anklagte sünd siet den Enn vun’t verleden Johr achter de Trallen.

Lüüd gaht op de Straat för dat Gliekstellen

Bremen – Bunneswiet gaht vundaag Lüüd op de Straat för dat Gliekstellen vun Minschen mit Behinnerungen. Darachter stickt een Europäisch Protestdag. De is siet 1992 elkeen Johr an’n 5. Mai. Behinnertenverbännen maakt sik darbi stark för de Inkluschon in de Gesellschupp. In Bremen geiht üm Klock halvig 12 een Demonstratschon vör den Bremer Hauptbahnhoff loos, de mit een Versammeln op’n Marktplatz to Enn geiht.

Dat Weer

Un nu een Blick op dat Weer: op Wangerooge un in Deefholt 9, in Bremerhaben 10 un in Bremen sünd dat opstunns 11 Graad. Vundaag wesselt sik Sünn un lockere Wulken af, an’n Namiddag ward de Wulken ok mal dicker. Verenkelt kann dat een korten Schuer geven, man meist blifft dat dröög – bi 11 bit 14 Graad. Tokamen Nacht lööst sik de Wulken sinnig op. De Heben ward meist klaar, dat köhlt darüm orrig af. Vör allens to de Lüneborger Heid hen kann dat een beten Boddenfrost geven. Aver ok sünst ward dat frisch mit 8 bit 7 Graad an de Küst un 4 bit 2 Graad in’t Binnenland. Morrn fangt de Dag mit dicken Wulken an, de vun de Nordsee her optrocken sünd. Dat kann een beten schuern, man faken blifft dat dröög. Sünn un Wulken wesselt sik af, bi 12 bit 15 Graad. Dat weern de Narichten op Platt. Katrin Martens hett se tohoopstellt. Op platt trechtmaakt un vörleest hett se Heidi Jürgens.