Plattdeutsche Nachrichten Plattdüütsche Narichten vun'n 4. Juni 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 4. Juni 2024

  • Protest gegen Afboo vun Jobs bi de Meyer-Warft
  • Städer foddert mehr Geld för Hoochwaterschutz
  • Faeser prööft Afschuven na Afghanistan
  • Nee’e Sportanlaags schüllt 32 Millionen Euro kosten
  • Chinesisch Ruumfleger start vun’n Mond trüch to de Eer
  • Dat Weer
Bild: Radio Bremen

Informationen zum Audio

Protest gegen Afboo vun Jobs bi de Meyer-Warft

Papenborg – Vör de Warksdören vun de Meyer-Warft hebbt an’n Morrn rund 2.000 Arbeiders protesteert. Se wehrt sik dargegen, dat 400 Arbeitsstäen wegfallen schüllt. Dat Ünnernehmen seggt, anners geiht dat nich, se wörrn anners pleite gahn. De Gewarkschuppen seht dat anners.

Städer foddert mehr Geld för Hoochwaterschutz

Regensburg – Wegen dat dulle Hoochwater in Bayern un Baden-Württemberg foddert de Dütsche Städtedag, sik beter för sowat praat to maken. Darför bruukt dat mehr Geld vun Bund un Lännern. Hauptgeschäftsföhrer Dedy sä, dat weer een Duer-Opgaav för de Kommunen, sik an den Klimawannel antopassen un darop intorichten. Bunnesümweltministersche Lemke harr all güstern een nee’et Gesett för beteren Hoochwaterschutz ankünnigt.

Faeser prööft Afschuven na Afghanistan

Mannheim – Nadat een Polizist na een Metzattack sturven is, lett Bunnesbinnenministersche Faeser pröfen, woans dat Afschuven na Afghanistan mööglich weern kann. Bi slimm Kriminellen or Lüüd, de een Gefohr sünd, mutt dat Recht op Sekerheit för de Minschen hier swarer wiegen as dat Recht vun de Bedrapenen, hier to blieven. Dat glieke gellt ok för Minschen mit een syrischen Pass. De vermoden Metzsteker vun Mannheim kummt ut Afghanistan.

Nee’e Sportanlaags schüllt 32 Millionen Euro kosten

Bremen – De Senat befaat sik vundaag mit den Neeboo vun Sportanlaags an de Universität. Tohoopnahmen 32 Millionen Euro will dat Wetenschuppsressort dar rinsteken. Ünner annern schüllt een lüttje un een grode Hall, een Kraftruum un een Tribüün boot weern. Dar achter stickt ünner annern, dat vun’n Wintersemester an de Sportstudiengang in Bremen wedder loosgeiht, de 2018 instellt worrn weer. De olen Sportruums sünd rott un öllerhaftig.

Chinesisch Ruumfleger start vun’n Mond trüch to de Eer

Peking – Een Deel vun‘n chinesischen Mond-Fleger hett mit Erfolg vun’n Mond wedder afhoben. Dat vermellt chinesische Staatsmedien. He hett Proven vun de Rücksiet vun’n Mond bi sik. De Fleger weer ehrgüstern dar landt. Wetenschuppler verspreekt sik veel vun’t Ünnersöken vun de Rücksiet, wiel dar nich so veel Lava is.

Dat Weer

Un nu een Blick op dat Weer: in Deefholt un op Wangerooge 15, in Bremen un Bremerhaben sünd dat opstunns 16 Graad. De Dag hüüt fangt gries an, to’n Deel ok mit een beten Niesel. An’n Namiddag un Abend maakt de Wulken mal Platz för de Sünn. Dat gifft man ok gau nee’e Schuers, de hier un dar buterdem dull ward – bi 18 bit 20 Graad. Tokamen Nacht mal mehr, mal weniger Wulken, verenkelt ok Schuers. Later in de Nacht ward dat natter, to’n Morrn hen lockert dat ok mal wedder op. Dat Thermometer sackt op 14 bit 12 Graad. Morrn geiht de Dag mit dicken Wulken un ok veel Regen loos, later an’n Morrn sett sik ok fakener mal de Sünn dör. Den Dag över wesselt sik Sünn un Wulken af un dat ward meist dröög. Blots in’n Noorden vun Bremen kummt an’n Namiddag un Abend nee’e Schuers op – bi 15 bit 19 Graad. Dat weern de Narichten op Platt. Sven Kuhnen hett se tohoopstellt. Op platt trechtmaakt un vörleest hett se Heidi Jürgens.

Bremen Eins Livestream & aktuelle Sendung.

Grüße und Musik mit Ansgar Langhorst

Grüße und Musik

Jetzt läuft:

Queen Bohemian Rhapsody
  • Jetzt läuft:

    Queen Bohemian Rhapsody