Plattdeutsche Nachrichten Plattdüütsche Narichten vun'n 6. Juni 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 6. Juni 2024

  • Europawahl 2024 geiht vundaag in de Nedderlannen los
  • Hoochwater in Süüddüütschland löppt suutje af – dat süht jümmers noch leeg ut
  • Bunnsverwaltungsgericht to dat opsette Parken
  • Vele Dokters in Bremen finnt nüms, de de Praxis övernimmt
  • Füer in Heim för ole Lüüd in Verden: twee Minschen doot
  • Dat Weer
Bild: Radio Bremen

Informationen zum Audio

Europawahl 2024 geiht vundaag in de Nedderlannen los

Den Haag: In de Nedderlannen fangt vundaag de Europawahl an. Sowat 13 en half Millionen Börgerslüüd sünd de eersten, de jümehr Krüüz för de Afgeordneten vun dat Europaparlament maken dröfft. In de annern 26 EU-Staaten köönt de Minschen in de tokamen Daag wählen gahn. In Düütschland is Sünndag Wahldag.

Hoochwater in Süüddüütschland löppt suutje af – dat süht jümmers noch leeg ut

Regensborg: In Baden-Württembarg is de Pegel bilütten wedder bi „normal“ ankamen. Man in Gegenden vun Bayern süht dat jümmers noch eernst ut. In Regensborg hebbt de Behörden Kummer mit de waterweke Eer langs en Straat in de Ooltstadt. In Passau fallt de Pegel, dat aver teemlich langsam.

Bunnsverwaltungsgericht to dat opsette Parken

Leipzig: An dat Bunnsverwaltungsgericht geiht dat jüst nu um en Klaag vun Lüüd ut Bremen to dat Parken mit twee Rööd op den Kantsteen. De Fraag is: Mutt de Behöörd wat ünnernehmen, wenn en Auto to’n Deel op den Footweg afstellt is? Un wenn ja: Wo gau mööt se dat? In de Stratenverkehrsordnung steiht: Parken mit twee Rööd op den Kantsteen is nich rechtens. Liekers warrt dat in Bremen un anner Städte maakt un keeneen deit dor wat gegen. Nu wüllt Bremer Börgerslüüd mit de Klaag jemehr Recht op en freen Footweg dörsetten.

Vele Dokters in Bremen finnt nüms, de de Praxis övernimmt

Bremen: In’t Land Bremen hebbt in de verleden twee-en-half Johr mehr as 60 Dokters jemehr Praxen dichtmaakt. Se harrn nüms funnen, de de Praxis övernimmt. De Senat hett düsse Tahlen vun de Kassenärztliche Verenigung wiedergeven. Bavento is hier een Dokter vun veer över 60, un vele vun de gaht bald op Rente. För de Minschen gifft dat aver noch kene Nadele, meent de Senat: dat leep allens noch ganz goot.

Füer in Heim för ole Lüüd in Verden: twee Minschen doot

Oyten: In en Heim för ole Lüüd in den Kreis Veern hett dat brennt. Twee Froenslüüd sünd dorbi to Dode kamen. Noch dree Lüüd sünd an’t Lief böös to Schaden kamen. Noch weet se nich, woans dat Füer verleden Nacht in en Kamer dor opbluckt weer. Wegen den Rook müssen se en Reeg Minschen ut dat Huus bargen, sä en Mann vun de Füerwehr. An’t End hebbt se dat Füer utkregen.

Dat Weer

Un woans süht dat mit dat Weer umto ut? Opstunns hebbt wi in Bremen un Emm 12 Graad, in Bremerhaven un Rotenborg sünd dat 13 Graad. Vundaag: Eerst hell un kloor mit mal Sunnschein, mal en poor Wulken. Över Dag billt sik mehr un mehr dicke Wulken ut, un de bringt vun Middag op an Schuer mit. Dat kann ok mal deegt pladdern, mag ween ok mit Blitz un Dunnerslag. Twüschen de Hunte, de Aller un de Wumm blifft dat faken dröög. Dat Thermometer krabbelt op 15 bet 18 Graad. De Wind dorto weiht flau oder en beten mehr, an de See ok frisch. He dreiht vun Süüdwest op West. Wenn’t regent un an de Küst ok mit störmsche Böen. Tokamen Nacht: De letzten Schuer lööst sik gau op, un denn staht blots noch en Handvull Wulken an’n Heven, oder dat is kloor. Fröh an‘n Morgen köönt sik Placken mit Daak oder hogen Daak utbillen. Bi 10 bet 5 Graad. Morgen: Överall dröög, hier un dor mit restlichen Daak oder hogen Daak. Över Dag mal dicke opstiegen Wulken, mal Sunnschien. Gegen Middag kaamt vun Oostfreesland her de eersten Schuer op, de an’n Namiddag ok na Bremen treckt. Bi 16 bet 19 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Justus Wilke.

Bremen Eins Livestream & aktuelle Sendung.

Der Samstagabend mit Till Kohlwes

Der Samstagabend

Jetzt läuft:

Stefan Gwildis Wo Bist Du Grad
  • Jetzt läuft:

    Stefan Gwildis Wo Bist Du Grad