Plattdeutsche Nachrichten Plattdüütsche Narichten vun'n 15. Mai 2025

Putin is bi mööglichen Freedensdrepen in Istanbul nich dorbi

Moskau: De russche Präsident Wladimir Putin is hüüt bi de Ukraine-Verhanneln in Istanbul nich dorbi. Dat steiht in de Delegatschoonslist, de de Kreml kort vör Middernacht rutgeven hett. Dorna warrt de Koppel vun Putins Berader Wladimir Medinski anföhrt. Bovento staht Viez-Minister, Vertreder vun den Generalstaff un Fachlüüd dorop. Na de US-Regeern is ok Präsident Donald Trump nich dorbi. Wo de Ukraine dorop reageert, dat Putin nich kummt, is noch nich kloor.

Wieder Minister maken in´n Bunnsdag ehr Programm künnig

Berlin: In den Bunnsdag stellt just wiedere Minister vun de nee´en Regeern ehre Programmen vör. Toeerst snackt Bunnsfinanzminister Lars Klingbeil över de Huusholtsplaans vun de swatt-roode-Regeern. Achteran folgt wiedere Ressorts, as Verkehr, Arbeid un Bo. Klingbeil maakt an Namiddag ok de nee´e Kalkulatschoon vun de Stüerinnahmen bit to dat Johr 2029 künnig.

Tahl vun Angrepen op Flüchtlingshüüs is so hooch as toletzt 2017

Ossenbrügge: De Tahl vun politsch motiveerten Straafdaaten gegen Flüchtlingshüüs is op den hööchsten Weert siet 2017 kladdert. Dat maakt dat Nee´e Ossenbrügger Blatt künnig un beröppt sik op Antwurten vun de Bunnsregeern op Anfraag vun de Linken. Dorna wurrn in dat verleden Johr twee-hunnert-fief-un-foftig Straafdaaten in Tosamenhang mit Flüchtlingshüüs faststellt – meist 80 mehr as in dat Johr dorvör. Na de Medien hett ok de Tahl vun politsch motiveerten Straafdaaten gegen Flüchtlinge buten ehr Quarteer tonahmen.

CDU bekriddelt sleepend Utbo vun Gewarfflachen in Bremen

Bremen: De CDU betwiefelt, dat de Bremer Senaat sien Afsichten bi den Utbo vun Gewarfflachen tofaatkriegt. Dat is güstern bi den Fachutschuss vun dat Lannsparlament düütlich rutsuert. Plaant weer eegens, bet to dat Johr 2027, 60 Hekter nee´e Gewarfflachen in dat Land Bremen to schaffen. Aver blots en föfftel keem betnu würklich tostann.

Wohrschaustreiks bi dat Entsorgungsünnernehmen Nehlsen geiht wieder

Cuxhoben. De Wohrschaustreik bi dat Entsorgungsünnernehmen Karl Nehlsen duert woll bet Enn vun düsse Week. Dat maakt de Gewarkschopp Ver.di un Nehlsen künnig. In den Kreis Cuxhoben heet dat ünner annern, dat de geelen Säck liggen blievt, in Bremerhoben blifft Glasaffall un in Bremen de Bedriefsmüll liggen. Nehlsen versöcht över Subünnernehmer en Deel optofangen. Ver.di will mit düssen Streik en Tarifverdrag bi Nehlsen dörsetten.

Dat Weer

Un nu kiekt wi op dat Weer: In Bremen, Bremerhoben, Möppen un Emm hebbt wi opstunns överall 14 Graad. Hüüt lacht de Sünn den ganzen Dag, man en poor lütte Wulken sünd ok dorbi. Dat blifft dröög bi 13 bet 14 Graad op de Eilannen un 17 bet 19 Graad in´t Binnenland. In de Nacht blifft dat wiederhen dröög un wi seht de Steerns blinkern, eerst an morgen treckt dicke Wulken op, liekers blifft dat dröög bi ölven bet acht Graad an de Küst un söss bet fief Graad in´t Binnenland. Freedag fang an de Küst gries un mit dicke Wulken an. Övern Vörmiddag wesseln sik Sünn un Wulken af, an´n Namiddag warrn de Wulken mehr un dat künnt lütte Schuers geven un dat denn bi 14 Graad op de Eilannen un 15 bet 19 Graad in´t Binnenland.

Dat weren de Plattdüütschen Narichten. Tohoopstellt vun Anja Guse. Op platt torechtmaakt un vörleest vun Martina Brünjes.