Plattdeutsche Nachrichten Plattdüütsche Narichten vun'n 14. Mai 2025

Minschen schüllt den Noorden vun den Gazastriepen verlaten

Tel Aviv. Israel hett an´n Morgen wedder Telen in´n Noorden vun den Gazastriepen angrepen. Ünner annern wurr en Lager mit Flüchtlingen mit Bomben angrepen – tominnst 29 Minschen sünd na palästinensisch Angaven to Dode kamen. Vörher hett dat israelisch Militär de Minschen opropen, de bedrapen Landstücken to verlaten. Güstern harr de israelisch Ministerpräsident Benjamin Netanjahu en neje Grootangreep ankünnigt, de in de tokamen Dag anfangen schall. Dorbi schall de Terrororganisatschon Hamas heel un deel kaputt makt weern.

Krankenkassen kriegen Millionen-Toschuss vun den Bund

Berlin. Wegen de lege Finanz-Situatschoon kriegen de gesettlich Krankenkassenen en Millionen-Toschuss vun den Bund. Dat hett dat Bunnsgesundheitsministerium to dat Hannelsblatt seggt. Dorna schüllt in de Mitt vun Mai 800 Millionen Euro an de Krankenkassen lopen. Vörher geev dat en Övereenkamen mit dat Finanzministerium. Achtergrund weer, dat dat Geld vun den Gesundheitsfonds in de Achterhand ünner en gesettlich fastleggten Weert fullen weer.

Selenskyj reist na Ankara

Kiew. De ukrainisch Präsident Wolodymyr Selenskyj is na Angaven vun sien Botschaft op den Weg na Ankara. Selenskyj harr ankünnigt, dat he dor eerstmal den törksch Präsidenten Tyyip Erdogan drapen un mit em snacken deit. Denn will he na Istanbul wiederreisen üm dor op Putin to töven. Of de würklich morgen to en Fredensdrapen kamen deit, is noch nich kloor.

Naverkehr in Delen vun Neddersassen warrt lahmleggt

Hannover. In Neddersassen weern vundag wedder vele Busse in ehr Garagen blieven. Grund is en Warnstreik över den ganzen Dag. To den hett de Gewarkschop Verdi de Mitarbeiters vun de Verkehrsbedrieven in Neddersassen opropen. Dat gellt  to´n Bispill in den Landkreis Osterholt för dat Ünnernehmen vun Ahrentschild. Streikaktschonen sünd ünner annern ok in den Kreisen Vern un Cuxhaben plant. Ok Schoolbusse weern nich fohrn.

Minschen in Neddersassen maken jümmer weniger Müll

Hannover. De Minschen in Neddersassen maken jümmer weniger Müll. Na Angaven vun dat Lannsamt för Statistik vun Neddersassen is de Mengde 2023 noch mehr na ünnen gahn – ok wenn de Inwahnertall na baven gahn weer. Mit 547 Kilogramm per Kopp hebbt de Neddersassen dorna in dat Johr 2023 so wenig Müll makt as noch nienich siet dat Inföhren vun de Lannsmüllbilanz in dat Johr 2004. Dat Müllopkamen is dormit in dat drütte Johr na´nanner daal gahn, so de Behöörd.

Dat Weer

Un nu noch en Blick op dat Weer: In Hude 14, in Bremen-Mitt 15 , in Bremerhaben 13 un in Hooksiel sünd dat opstunns 12 Graad. Vundag gifft dat en Mischmasch ut Sünnschien un meist lockeren Wulkenfeller. Dorbi versteekt sick de Sünn af un an achter de Wulken. Man dat blifft dröög. De Wind weiht in Maten un dat Thermometer wiest 14 bit 20 Graad. In de Nacht sünd dichte Wulkenfeller ünnerwegens. Regen gifft dat woll nich. Söss bit elven Graad stahn denn op dat Thermometer. Morn veel Sünnschien un en poor lockere Wulken. Dat blifft dröög bi 14 bit 19 Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Markus Weise.