Plattdeutsche Nachrichten Plattdüütsche Narichten vun'n 13. Mai 2025

Binnenminister verbüddt Vereen „Königreich Deutschland“

Berlin: Bunnsbinnenminister Alexander Dobrindt hett en Grupp vun so nöömten Rieksbörger un Sülvstverwalter verbaden, de sik „Königreich Deutschland“ nöömt. Dormit is de gröttste Vereenigung vun de Szene verbaden, de siet Johren jümmer grötter ward, so Dobrindt. De Liddmaten hebbt en Gegenstaat in Düütschland un wirtschaftskriminelle Strukturen opboet. Na Angaven vun’t Binnenministerium hett de Polizei an’n Morgen Hüüs un Wahnungen vun den Vereen in söben Bunnslännern ünnersöcht, ünner annern ok in Neddersassen.

US-Präsident Trump besöcht Gulfstaaten

Riad: US-Präsident Donald Trump reist in de tokamen Daag dör den Negen Oosten. Eerst Saudi-Arabien, denn Katar un opletzt de Vereenigten Arabischen Emirate. Bi sien eerste grode Reis in’t Butenland in sien nee’e Amtstiet geiht dat nich blots üm den Striet in’n Negen Oosten, sünnern besünners ok üm’t Geschäft. Weeswark geev dat vör sien Reis al wegen en düren Luxusfleger, den Katar de US-Regeern schenkt hett un den Trump as Präsidentenmaschin bruken will. De US-Verfaten hett den Präsident dat Annehmen vun Geschenken verbaden.

Israel juuchheit över Wedderkamen vun Hamas-Geisel

Tel Aviv: Na 584 Daag achter de Trallen as Geisel bi de islamistischen Hamas is de US-Israeli Edan Alexander wedder trüch in Israel. Dor stünnen veele Minschen mit Fahnen un Plakaten an de Straten, üm den Konvoi mit den 21-Johrigen to begröten. To glieke Tiet hebbt sik veele Minschen in sien Heimatstadt Tenafly in’n US-Bunnsstaat New Jersey daröver freit, datt de junge Mann wedder free is.

Grode Ünnerscheden bi Schangsen för junge Lüüd to’n Deelnehmen an’t gesellschaftliche Leven

Berlin: De Schangsen vun junge Minschen to’n Mitmaken an’t gesellschaftliche Leven hangt düchtig dorvun af, wo se leevt. Dat gifft grode Ünnerscheden bi Schoolbildung, Freetietanbotten, Gesundheitsversorgung un de Infrastruktur in heel Düütschland. Dat kann en ut den „Teilhabeatlas Kinder un Jugendliche“ rutlesen. Bremen höört to de Städer mit legere Schangsen. Dat liggt ok doran, datt meist 29 Perzent vun de Kinner ut Huusholden mit wenig Inkamen kaamt. Ok gifft dat dor besünners veel junge Lüüd ahn Arbeit.

Linke, Gröne un AfD winnt in Bremen Liddmaten dorto

Bremen: Siet dat de nee’e Bunnsregeern an de Macht is, hebbt de Linken, de Grönen un de AfD in Bremen düütlich mehr Liddmaten dortowunnen. Bi de Linken hett sik de Tall vun Liddmaten meist verduppelt op meist 1.700. De Grönen hebbt 17 Perzent toleggt op 1.800 Liddmaten. De AfD hett nu 250 Liddmaten. Bi SPD un CDU hebbt sik de Tallen dör In- un Uttreden meist gor nich verännert. De SPD hett mit 3.500 de mehrsten Liddmaten, de CDU liggt mit 1.850 op den tweten Platz.

Dat Weer

Un nu en Blick op dat Weer: In Leer un Cuxhaben 12, in Bremen un Bremerhaben 13, un in Deefholt un Möppen sünd dat opstünns 14 Graad. Hüüt schient den heelen Dag de Sünn, un dat gifft meist keen Wulken an’n Heben. An’n laten Namiddag un Avend treckt vun de Noordsee un Elv her dünne Wulken op, aver dat blifft dröög bi 15 bet 17 Graad op de Eilannen un 19 bet 23 Graad in’t Binnenland. In de Nacht sünd eerst dünne Wulken an’n Heben. Vun Middernacht an ward dat wulkiger, sodatt Maand un Steerns meist gor nich to sehn sünd. Dat gifft keen Regen bi 11 bet 9 Graad an de Noordsee un 8 bet 7 Graad in’t Binnenland. Morgen is dat fründlich un dröög mit en Mix ut Sünnschien un lockere Wulkenfeller. Dorto blifft dat dröög bi Temperaturen vun 14 bet 16 Graad an de Küst un 19 bet 20 Graad in’t Binnenland. An’n Dünnersdag gifft dat en Wessel ut Sünnschien un lockere Wulken. Dat blifft dröög bi 13 bet 19 Graad.

Dat weern de Narichten op platt. Tohoopstellt hett se Sven Weingärtner. Op Platt trechtmaakt un vörleest vun Marc Gelhart.