Plattdeutsche Nachrichten Plattdüütsche Narichten vun'n 12. Mai 2025

PKK künnigt Oplösen an

Istanbul – De verboden kurdsche Arbeiterpartei PKK lööst sik woll op. Dat vermellt een paar Narichtenagenturen, de för Kurdistan sünd. To de glieke Tied höört de PKK ok darmit op, mit Wapen gegen den türkschen Staat to kämpfen. De Grünner, de achter de Trallen sitt, Öcalan, harr all an’n Enn vun’n Februar darto opropen. De PKK kämpft siet Midde vun de 80er Johren gegen den türkschen Staat. Se wull een egenstännig Kurden-Rebeet, is aver vun de Türkei un de westlichen Frünnen as Terrororganisatschon ankeken worrn.

China un USA senkt gegensiedig Tölle

Genf – In’n Hannelsstriet hebbt China un de USA besluten, ehr gegensiedig Tölle dütlich daal to senken. As in een gemeensam Verklaren vermellt ward, gellt düsse Regel erstmal för 90 Daag. Dat heet, de US-Tölle op chinesisch Importe sinkt op 30 Perzent. Vördem weern se bi 145 Perzent. De Opslääg vun Peking gaat vun 125 op 10 Perzent trüch.

Dütschland un Israel fiert 60 Johr diplomatisch Kontakte

Berlin – Dütschland un Israel fiert vundaag, dat se siet 60 Johren diplomatische Kontakte hebbt. Bunnespräsident Steinmeier hett an’n Vörmiddag den israelschen Präsidenten Herzog mit militärischen Ehren begrööt. Morrn wüllt beid denn na Israel reisen. An’n 12. Mai 1965 hebbt beid Länner besloten, diplomatische Kontakte to plegen, rund 20 Johr na dat Enn vun’n 2. Weltkrieg.

Polizei ermiddelt wegen Füerpüsteree in Ollenborg

Ollenborg – Na söß mal Füerpüsteree an Autos un Müllcontainern hett de Polizei in de Stadt een paar Hüüs dörsöökt. Darbi hebbt se Saken sekerstellt, de villicht wat bewiesen köönt, vermellt de Polizei an’n Abend. Dar stickt woll dree junge Mannslüüd achter. Se schüllt in de Nacht to’n Sünndag veer Autos un twee Affallammers ansteken hebben.

Alkoholverbott in’n Bremer Hauptbahnhoff

Bremen – In’n Bremer Hauptbahnhoff gellt vun hüüt an een Verbott, Alkohol to drinken. In’n helen Bahnhoff un op de Bahnstiegen draff denn keeneen mehr to’n Bispill Beer or Kööm drinken. Blots in de Gaststäen in’n Bahnhoff kann een noch Alkohol to sik nehmen. Wokeen gegen dat Verbott verstött, draut, verwiesen to weern or sogar een Huusverbott.

Dat Weer

Un nu een Blick op dat Weer: op Wangerooge 10, in Bremerhaben 13, in Bremen 14 un in Deefholt sünd dat opstunns 15 Graad. Vundaag schient den helen Dag de Sünn, dar sünd blots mal een paar dünne Wulken darbi. Vun’n Middag an köönt mehr Wulken opkamen, de sik to’n Abend hen aver wedder oplööst. Dat blifft dröög bi 16 bit 18 Graad op de Eilanden un 19 bit 21 Graad in’t Binnenland. Tokamen Nacht is de Heben meist klaar, dat Thermometer sackt op 10 bit 8 Graad op de Inseln un 7 bit 4 Graad in’t Binnenland. Morrn ward de Dag ok fründlich un dröög. Dar treckt blots mal een paar dünne Wulken dör – bi 15 bit 18 Graad an de See un 20 bit 23 Graad in’t Binnenland. Middeweken Sünnschien un lockere Wulken bi 14 bit 20 Graad, an de Nordsee windig. Dat weern de Narichten op Platt. Anja Guse hett se tohoopstellt. Op platt trechtmaakt un vörleest hett se Heidi Jürgens.