Plattdeutsche Nachrichten Plattdüütsche Narichten vun'n 16. Mai 2025

Drepen för en Wapenroh schall anfangen

Istanbul: En Dag laater as dacht, schall hüüt dat Drepen twuschen Russland un de Ukraine anfangen. Dorbi geiht dat üm en möögliche Wapenroh. Vunwegen russlands Präsident Wladimir Putin nich opdükert is, is ok de ukrainsche Präsident Wolodimir Selenskyj al afreist. Dorgegen nehmt ok Verhandlers ut de Türkei un de USA an düt Drepen deel.

FDP wählt nee´e Parteiböverste

Berlin: Achterna dat Fehlslaan bi de Bunnsdagswahl stellt sik de FDP bi en Parteidag nee op. Christian Lindner, de betnu Vörsitter weer, gifft sien Amt na darteihn Johren torüch. Nafolger will de fröhere Fraktschoonsvörsitter Christian Dürr warrn. De FDP weer in Harvst ut de Ampelkoalitschoon utstiegen. Se weer bi de Bunnsdagswahl in Februar bi blots 4,3 Perzent bi de Tweetstimmen lannt un is dormit ut den Bunnsdag flagen.

Röwekamp vorslaan för den Vörsitt in den Wehrutschuss

Berlin: De Bremer CDU-Afordnete Thomas Röwekamp schall nee´er Vörsitter vun den belangrieken Wehrutschuss vun den Bunnsdag warrn. As dat ARD-Hööftstadtstudio künnig maakt, hett de CDU/CSU-Fraktschoon den 58-Johrigen güstern Avend för düsse Positschoon opstellt. Sien Wahl gellt as seker, vunwegen de parlamentoorschen Geschäftsföhrers de Fraktschoon sik vörher op de Verdelung eenigt harrn.

Schölers in Bremen mööt vun Handys aflaten

Bremen: De Billungsbehöörd will vun Juni af an all Handys an Schoolen verbeden. Dat hett Billungssenatorsche Sascha Aulepp künnig maakt. Dat Verbott schall för de Scholen in de Stadt Bremen gellen un all Johrgäng bet to de teihnten Klass bedrepen. Aulepp meent, in den Ünnericht sünd Handys nich nödig un bringen Schölers meist blots vun´t lehren af.

Wiedere Freebäder maakt apen in Bremen

Bremen: Achterna dat Stadionbad opmaakt hett, sünd vun hüüt Middag af an ok de Freebäder Blomendool un Hoorn op. Dat Slottparkbad in Bremen-Hemeln un dat Freebad Gröönhöfe in Bremerhoben starten morgen in eene Week in de Sommersaison. In Achem, Weyhe un Söppmer sünd de Freebäder al siet en poor Daag open.

Dat Weer

Un nu kiekt wi op dat Weer: In Bremerhoben un Emm hebbt wi 12 Graad, in Bremen un Deefholt sünd dat opstunns 13 Graad. Övern Vörmiddag wesseln sik lütte Wulken un Sünn af. An Namiddag warrt de Wulken twuschen Werser un Elv kompakter un verenkelt kann dat dor ok mal lütte Schuers geven. Dat Thermometer wiest us 14 Graad op de Eilannen un 16 bet 19 Graad in´t Binnenland. In de Nacht meist wenig Wulken un wi köönt de Steerns blinkern sehen bi 11 Graad op de Eilannen un an de Küst, in´t Binnenland 9 bet 6 Graad. Sünnavend fangt eerst mit lachen Sünnenschien an, achterna överall veel Wulken un in´ne Hauptsaak sünd in´t Werser-Elv-Dreeeck verenkelt Schuer mööglich. Westlich de Werser meist dröög un mehr Sünnenschien as Wulken. Un dat bi 15 bet 16 Graad an de Küst un 18 bet 20 Graad in´t Binnenland. Sünndag wesseln sik Wulken un Sünn wiederhen af, Schuers sünd ok mööglich bi 14 bet 19 Graad.

Dat weren de Plattdüütschen Narichten. Tohoopstellt vun Sven Kuhnen. Op platt torechtmaakt un vörleest vun Martina Brünjes.