Plattdeutsche Nachrichten Plattdüütsche Narichten vun'n 19. Mai 2025

Europä`sche Staaten stimmt sik mit Trump af

London: De Staats- un Regeerungsböversten vun Düütschland, Grootbritannien, Frankriek un Italien hebbt mit US-Präsident Donald Trump telefoneert. Dat hett een Spreker vun de brit`sche Regeerung mitdeelt. Dorbi güng dat woll üm den Krieg in de Ukraine un möögliche Sanktionen gegen Russland. Trump hett ankünnigt, dat he hütt mit Kremlboss Wladimir Putin telefoneeren will. He will mit em doröver snacken, wo man eenen Utweg ut dat Blootvergeten finnen kann, so Trump.

Pro-Europä`sche Politiker winnt Präsidentenwahl in Rumänien

Bukarest: In Rumänien is de nee`e Staatspräsident de pro-europä`sche Politiker Nicusor Dan. He liggt na dat Uttellen, vun fast all Wahllokalen, mit good 54 Perzent för den Rechtspopulisten George Simion. Simion kummt blots op rund 46 Perzent. EU-Kommissionspräsidentin von der Leyen hett na de Wahl seggt, dat de Rumänen sik, dör de Wahl vun Dan, för een apen Land in een starket Europa afstimmt hebbt.

Polen mööt in Prickwahl över nee`en Präsidenten afstimmen

Worschau: Bi de Präsidentenwahl in Polen hett keen vun de beiden Kandidaten de mehrsten Stimmen kregen. Dorüm kummt dat nu an`t 1. Juni to een Prickwahl. Dorto opstellt sünd de liberalkonservative Kandidat Rafal Trzaskowski un de nationalkunservative Kandidat Karol Nawrocki. In de eerste Rünn gistern is Trzaskowski mit 31 Perzent knapp vör  Nawrocki landt.

Autobahn 28 na Füerwehrinsatz jümmers noch sperrt

Hatten: De Autobahn 28 is twischen Hude un dat Krüz Ollenborg- Oost noch jümmers total sperrt. Na een Grootbrand op een Recycling-Hoff in Hatten mutt man nu eerst eenen groten Mobilfunkmast op dat Land vun den Hoff afboen. De Mast hett eenen Schaden bi dat Füer nahmen un drauht nu op de Autobahn to fallen. Luut Polizei kann sik dat Heel noch hentrecken, wiel man eenen Spezialkran dorför op dat Land bringen mutt. Dat Füer is an´t Freedag Avend op dat Land vun de Recyclingfirma utbroken. Un denn hett sik dat Füer ganz flink op vele Hunnerte vun Fahrtügen un allerhand Stapels mit Reifens verdeelt. Worüm dat Füer in Gang kamen is hebbt se noch nich rut.

Stephan Weil mit een Fier ut sein Amt tschüss seggen

Hannover: Na 12 Johren in´t Amt geiht hütt Avend för Neddersassens Ministerpräsident Stephan Weil mit een Fier siene Amtstied to Enn. De Bunnswehr speel för dat Nee`e Raathuus eene Serenade, de so üm een halve Stünn lang is. Mit vun de Partie is ok de Bundesverteidigungsminister Boris Pistorius, de een lange Tied ok Binnenminister vun Neddersassen wesen is. Weil harr Anfang April seggt, datt he dat Amt ut de Hand geven will. De Wahl för den nee`en Ministerpräsidenten is morrn. De SPD hett dorför den Wirtschaftsminister, bit nu,  Olaf Lies opstellt.

Dat Weer

Un nu een Blick op dat Weer: in Defhold un Neenborg 14, un in Bremen un Bremerhaben sünd dat opstünns 15 Graad. Hütt schient meist de Sünn un wi hebbt lichte un luckere Wulken an´t Heben. To´n Nomdag hen kummt mehr un mehr Wulken op, man dat blifft meist dröge. An de Küsst liggt de Temperaturen bi 16 bit 19 Graad. In´t Binnenland bi 19 Graad  bit 21 Graad. Tokamen Nacht lööst sik de Wulken meist op un de Heven is klar. Hier un dor hebbt wi Nevelfeller. An de See is dat milder bi 12 bit 11 Graad. In Neenborg  8, 7 Graad in Bremen un 5 in Bad Bederkesa. Morrn gifft dat enen Mix ut Sünn un Wulken. Besünners an de Noordsee hebbt wie veel Sünnenschien. Eerst an´t Avend kummt vele Wulken op. De Temperaturen liggt bi 17 Graad an de Küst bit  23 Graad in Sulingen. Middeweeken fründlich mit Sünnenschien un luckeren Wulken, de Wind pustet duller man dat is dröge, bi 14 bit 20 Graad. Dat weren de Narichten op Platt. Tohoopstellt hett se Anja Guse. Trechtmaakt un vörleest vun Antje Kruppa.