Plattdeutsche Nachrichten Plattdüütsche Narichten vun'n 12. Juni 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 12. Juni 2024

  • Minister för´t Verdeffenderen will nee´t Wehrplichtmodell vörstellen
  • Ukraine-Opboe-Kunferenz geiht wieder
  • Seehaven-Arbeiders in Bremerhoben streiken
  • Truer üm franzöösch Sängesche Francoise Hardy
  • Holsteen-Anhänger fiert Pokal-Sieg gegen Bayern in Kiel
  • Dat Weer
Bild: Radio Bremen

Informationen zum Audio

Minister för´t Verdeffenderen will nee´t Wehrplichtmodell vörstellen

Berlin: Bunnsminister för´t Verdeffenderen Boris Pistorius will vunnamiddag siene Plaans för en nee´t Wehrplichtmodell vörstellen. Diskereert warrt ok över den Infall, dat Mannslüüd in Düütschland anschrieven warrt, sodennig se 18 Johr sünd, üm den en Fraagbogen uttofüllen. De den interessert sünd, köönt to en Mustern verplicht warrn. Dor achter steiht de russche Angreepskrieg in de Ukraine un dormit de Diskuschoon vunwegen en möögliche nee´e Wehrplicht.

Ukraine-Opboe-Kunferenz geiht wieder

Berlin: De Ukraine-Opboe-Kunferenz geiht hüüt wieder. Ünner annern geiht dat dorüm wo de Politik un Weertschop tohooparbeiden köönt, to´n Bispeel üm lütte un middelgrote Ünnernehmen in de Ukraine Stütt to geven. Blangenbi Bunnsophölpministersche Svenja Schulze reken de Liddmaten mit Kiews Börgermeister Vitali Klitschko. Alltohoop sünd um un bi 2000 Vertreder ut Politik un Weertschop bi dat Drepen.

Seehaven-Arbeiders in Bremerhoben streiken

Bremerhoben: Mehrere hunnert Arbeiders vun de Seehavens hebbt hüüt morgen ehr Arbeid rohen laaten. Dorto hett de Gewarkschop Verdi opropen, vunwegen de Tarifverhanneln nich wiedergaht. Verdi verlangt dat de Stünnenlohn üm dree Euro na baven sett warrt. Ehrder de Streik in Bremerhoben sünd de Havenarbeiders in Bremen un Hamburg op de Straat gahn.

Truer üm franzöösch Sängesche Francoise Hardy

Paris: De franzöösch Sängersche Francoise Hardy is sturven. Dat hett ehre Familie künnig maakt. Se wurr 80 Johr old. Hardy weer to Beginn vun de sösstiger Johren mit dat Leed „Tous le garcons e les filles“ op de ganzen Welt bekannt worrn un weer denn ok en Stil-Ikone. Laater hett se ok op Düütsch sungen. Dat Musikblatt „Rolling Stone“ meent de Künstlersche is en vun de 200 gröttsten Sängersche de dat geven hett.

Werder Bremen hett nee´e Plaans för Nawuss-Leistungszentrum vörstellt

Bremen: Football-Bunnsligist Werder Bremen hett güstern Avend en nee´n Plaan för dat Nawuss-Leistungszentrum vörstellt. De Anwahners weren mit de Plaans de betnu op´n Disch kemen nich inverstahn. Dorna is nu keen nee´t Stadion för den Nawuss plaant. Dorför schall de ole Speelsteed „Platz Ölben“ renoveert warrn. Plaant sünd nee´e Kabinen, en modern Elektrikanlaag un betere Gasthuus-Anbott.

Dat Weer

Un nu kiekt wi op dat Weer: In Emm hebbt wi ölven Graad, in Bremen, Bremerhoben un Möppen sünd dat opstunss twolf Graad. Hüüt wesseln sik Sünn un Wulken af, övern Dag kann dat jümmer mal Regen geven vun Middag af an ok Gewidder. Dat Thermometer wiest us 13 bet 14 Graad op de Eilannen un 15 bet 16 Graad in´t Binnenland. In de Nacht is de Heven meist vull Wulken, man hier un dor köönt wi ok mal de Steerns blinkern sehen. Dat kann an de Küst Schuer geven, de aver in´t Binnenland nalaaten, un dat bi 10 Graad op de Eilannen un 9 bet 5 Graad in´t Binnenland. Morgen meist Wulken, af un an lacht de Sünn, man Schuer sünd aver ok dorbi, meist an de Noordsee. In´t süüdliche Binnenland blifft dat meisttiets dröög un dat denn bi 15 Graad op Borkum un 16 bet 18 Graad in´t Binnenland.

Dat weren de Plattdüütschen Narichten. Tohoopstellt vun Michael Kück. Op Platt trechtmaakt un vörleest vun Martina Brünjes.

Bremen Eins Livestream & aktuelle Sendung.

Der Samstagabend mit Till Kohlwes

Der Samstagabend

Jetzt läuft:

Mina Richman Something To Rely On
  • Jetzt läuft:

    Mina Richman Something To Rely On