Plattdeutsche Nachrichten Plattdüütsche Narichten vun'n 11. Juni 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 11. Juni 2024

  • Ukraine-Konferenz in Berlin geiht mit Selenskyi un Scholz los
  • UN-Sekerheitsraad stütt Plaan, dat dat Scheten in´t Gazastriepen ophört
  • FDP verlangt na EU-Wahl vun Koalitionspartnern en ganz annern Kurs to stüern
  • Streik bi Anstellte in´t Haben un ok bi Deepköhlkost-Herstellern
  • Bremen will Erzieherinnen in Tokunft Kitasteden för egen Kinner toseggen
  • Dat Weer
Bild: Radio Bremen

Informationen zum Audio

Ukraine-Konferenz in Berlin geiht mit Selenskyi un Scholz los

Berlin: In de Hauptstadt geiht de drütte Wedderopboe-Konferenz för de Ukraine los. Dorför is de ukrain`sche Präsident Selenskyi na Berlin kamen. Tosamen mit Bunnskanzler Scholz geevt se in düsse Minuten dat Start-Teken. Bi de Konferenz willt se keen Geld sammel, lever willt se Projekte planen un verschede Partner tosamen bringen. An´t Nomdag will Selenskyi eene Reed in´t Bunnsdag hollen. Dat is sein drütte Besöök in Berlin, siet de russ`sche Invasion vör mehr as twee Johren.

UN-Sekerheitsraad stütt Plaan, dat dat Scheten in´t Gazastriepen ophört

New York: De UN-Sekerheitsraad hett sick dorför utspraken, dat dat Scheten in´t Gazakrieg ophört. 14 vun 15 Liddmaaten, vun den Utschuss, hebbt an´t Avend de Resolution annahmen, de de USA inbrocht hett. Blots Russland hett sik enthollen. US-Präsident Biden harr den Plaan vör knapp twee Weeken vörstellt. Dorna mutt de Terrormiliz Hamas de Geisels, de noch bleven sünd, free laten. Dorför schall sik de israel´sche Armee ut de Gegenden mit Wahnhüüs  trüchtrecken.

FDP verlangt na EU-Wahl vun Koalitionspartnern en ganz annern Kurs to stüern

Berlin: Dat Minus maken vun de Ampel-Koalition, bi de Europawahl, sorgt för Arger in de Koalition. FDP-Vize Kubicki smitt de Grönen vör, dat ehre Politik de Minschen bemeiern will un se sik dorüm vun ehr afwennt. In de Stuttgarter Zeitung fordert he de SPD un Gröne op, sik op siene Partei to tobewegen. Kanzler Scholz vun de SPD hett de Koalitionspartner ok opropen sik mehr antostrengen. Dat Wahlergebnis is för all dree Regeerungsparteien slecht utfallen. Keen is dormit hulpen eenfach so wieder to maken.

Streik bi Anstellte in´t Haben un ok bi Deepköhlkost-Herstellern

Bremen: In den Neestädter Haben in Bremen löppt siet den fröhen Morrn een Lawei för Wohrschau vun de Anstellten. Na Angaven vun de Gewarkschaft verdi sünd 100 Mitarbeiders mit vun de Partie. Verdi will mit de Aktion den Druck för de drütte Runn bi dat Tarifverhannel hoch setten. Lawai för Wohrschau gifft dat ok bi de Industrie, de Fisch verarbeidt, in Bremerhaben. De Gewarkschaft Nahrung-Genuss-Gasthüüs hett to´n Streik bi de Deepköhlkost-Bedrieve Frosta un Iglo opropen.

Bremen will Erzieherinnen in Tokunft Kitasteden för egen Kinner toseggen

Bremen: De Stadt will Kinner vun Froens un Mannslüüd, de as Erzieher arbeidt, flinker (noch vör annere) eenen Kita-Platz geven. Dat will de Senat ut SPD, Gröne un Linke an´t Vomdag in een Gesetzvörslag fastmaken. Dormit willt se verhinnern, dat Erzieherinnen un Erzieher nich arbeiden könnt, wiel se för ehr egen Kind keenen Kitaplatz hebbt. Dordör kann de Mangel an Kita-steden noch enger warrn. Dat Gesetz kann nich vör Harvst gellen.

Dat Weer

Un nu een Blick op dat Weer: in Ollenborg un in Bremen 10, in Emm un in Bremerhaben sünd dat opstünns 11 Graad. Hütt is dat een Mix ut Sünn un Wulken. Dat gifft jümmers wedder Schuers. Ok mööt wi jümmers wedder hier un dor mit Gewidder reken, bi 14 bit 16 Graad. Tokamen Nacht sünd hier un dor noch Schuers mööglich. To de Küst hen gifft dat mehr Natt vun baven, bi 11 bit 7 Graad. Morrn is dat jüst so wesselhaft. An´t Vomdag gifft dat wedder mehr Schuers, later kummt noch hier un dor Blitz un Dunnerslag dorto. De Temperaturen liggt bi 13 bit 16 Graad.  Dunnerstag vele Wulken, blots af un an kummt de Sünn mal dör. An de Küst kann dat ok wedder pladdern, bi 14 bit 17 Graad. Dat weren de Narichten op Platt. Tohoopstellt hett Anja Guse. Trechtmaakt un vörleest vun Antje Kruppa.

Bremen Eins Livestream & aktuelle Sendung.

Der Samstagabend mit Till Kohlwes

Der Samstagabend

Jetzt läuft:

Dexys Midnight Runners Come On Eileen
  • Jetzt läuft:

    Dexys Midnight Runners Come On Eileen