Plattdeutsche Nachrichten Plattdüütsche Narichten vun'n 10. Juni 2024

CDU un AfD in Bremen mit Europawahl tofreden

Bremen: CDU un AfD in Bremen sünd mit de Ergebnisse bi de Europawahl tofreden. CDU-Baas Strohmann snackt vun en goden Avend för de Union op Bunnsebene. CDU un CSU köönt mit Toversicht op de tokamen Wahlen kieken. De Landsvörsitter vun de Bremer AfD Minich freit sik, datt sien Partei so goot dorsteiht, besünners bi junge Wählers un bi Arbeiders. De Soziaaldemokraten blievt de stärkste Kraft in Bremen. Liekers is dat Ergebnis all tohoop bitter, säe de Landsvörsitter Wetjen. De Grönen hebbt ok düchtig verloren un sünd daalslahn. Wo de Minschen in de enkelten Stadtdelen vun Bremen un Bremerhaben wählt hebbt, steiht online bi butenunbinnen.de.

Rechte Parteien leggt europawiet to

Brüssel: För de rechten Parteien is dat bi de Europawahl in mehrere Länner goot lopen. In Italien hett de Partei Fratelli d’Italia vun de rechten Ministerpräsidentin Meloni de Nääs vörn. In Österriek hett de rechte FPÖ wunnen. Europawiet hebbt de beiden oolen rechtspopulistischen Partei-Maatschaften to’n Deel düchtig toleggt. All tohoop blifft dat proeuropääsche Lager in’t Europaparlament aver wieter mit Afstand dat gröttste.

Macron will Neewahlen in Frankriek na Europawahl

Paris: Frankrieks Staatspräsident Macron will de franzöös’sche Natschonaalversammeln oplösen un Neewahlen utropen. Dormit reageert Macron op den Sieg vun de franzöös’schen Rechtsmitsnacker bi de Europawahl in Frankriek un dat grode Minus bi sien egen Partei. De eerste Wahlgang schall in twee Weken ween.

Oppositschoonsföhrer Gantz geiht ut israeelsche Nootstandsregeern ruut

Tel Aviv: In’n Striet över en Nakriegsplaan för den Gazastriepen hett de Oppositschoonsföhrer Gantz de israeelsche Nootstandsregeern verlaten. De fröhere Minister för’t Verdeffendeern hett Ministerpräsident Netanjahu vörsmeten, datt he op Tiet speelt. Gantz will Neewahlen. Netanjahu hett aver wieterhen en Mehrheit in’t Parlament.

Windenergie-Kunferenz snackt över Stroom vun hoge See

Bremerhaben: An’n Namiddag fangt de Windenergie-Kunferenz „Windforce“ an. Se rekent mit mehr as 300 düütschen un internatschonalen Fachlüüd. Se snackt ünner annern över de Bedüden vun Hoochsee-Windenergie för de Energiewenn. Partnerland vun de „Windforce“ is in dütt Johr Däänmark.

Dat Weer

Un nu en Blick op dat Weer: In Bremen un Möppen 12, in Bremerhaben un Leer 13, un in Demhorst un Dörveern sünd dat opstünns 14 Graad. Hüüt Vörmiddag gifft dat noch’n poor Löcker twüschen de Wulken, aver de treckt sik gau tosamen. Denn fangt in’t Werser-Ems-Flach Regen för längere Tiet an. Düsse Regen breedt sik an’n Namiddag un Avend wieter to de Elv un de Lünborger Heid hen ut. Besünners twüschen Elv un Werser ward de Regen duller. Ok Gewidder kann dat hier un dor geven. Dat ward köhl bi 13 bet 15 Graad. In de Nacht gifft dat wietere deegte Regenschuers, to’n Deel ok mit Gewidder. Vun’t Emsland ward de Regen denn bilütten weniger, un af un an lockert de Wulken op. Dat Thermometer sackt daal op 11 bet 8 Graad. Morgen gifft dat en Gemengsel ut veele Wulken, af un an Sünnschien in’n Wessel mit Regenschuers un enkelte Gewidder. Dat blifft köhl bi 14 bet 16 Graad.

Dat weern de Narichten op platt. Tohoopstellt hett se Sven Kuhnen. Op Platt trechtmaakt un vörleest vun Marc Gelhart.