Plattdeutsche Nachrichten Plattdüütsche Narichten vun'n 14. Juni 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 14. Juni 2024

  • Paapst is to´n ersten Mal bi G7-Drapen dorbi
  • Bunnsrat snackt över Cannabis un Rente
  • Faeser is bi Truerfier för ümbrochen Polizist in Mannheim dorbi
  • Havenmitarbeiters in Emden gaht op de Straat
  • Düütschland drapt in dat eerste Football-EM-Speel op Schottland
  • Dat Weer
Bild: Radio Bremen

Informationen zum Audio

Paapst is to´n ersten Mal bi G7-Drapen dorbi

Bari. In Italien geiht dat G7-Drapen wieder. Dat Drapen warrt vundag üm rund twölf Staats- un Regerungsböverste ut annern Lännern grötter makt. Op de Inladung vun de Gastgeversche Giorgia Meloni is to´n eersten Mal en Paapst bi dat Drapen vun de söven gröttsten Industrienatschonen dorbi. Se rekend an´n Middag mit Paapst Franziskus. He makt ünner annern bi en Snackrunn to de Brägenplietschmaschin mit.

Bunnsrat snackt över Cannabis un Rente

Berlin. De Bunnsrat snackt vundag bi en Drapen ünner annern över den Anbo vun Cannabis. De Länner schüllt mehr Möglichkeiten bi den Verlööf vun Anboflachen kriegen. Noch en Thema is dat Hoochsetten vun de Renten üm 4,57 Perzent to´n eersten Juli. Bavento geiht dat üm en Reeg vun Lännervörslääg. Een kaamt dorbi ut Neddersassen üm gegen Verbreken mit Messen antogahn.

Faeser is bi Truerfier för ümbrochen Polizist in Mannheim dorbi

Mannheim. Twee Weken na den Angreep mit en Mess in Mannheim warrt an Vörmiddag en Truerfier för den ümbrochen Schandarm utricht. Dorto warrt mit rund 2.000 Gäst rekend. Ok Bunnsbinnenministersch Nancy Faeser un de Ministerpräsident vun Baden-Württembarg Winfried Kretschmann sünd dorbi. De Truerfier warrt op en Platz för all Lüüd överdregen.

Havenmitarbeiters in Emden gahn op de Straat

Emden. In den Haven vun Emden laat de Havenmitarbeiters siet den Morgen de Arbeit liggen. Achtergrund sünd de Drapen to de Tarife twüschen de Gewarkschup verdi un den Zentralverband vun de düütschen Seehavenbedrieven. Verdi verlangt ünner annern, den Stünnenlohn üm dree Euro na baven to setten. Warnstreiks geev dat ok al in Hamborg, Bremen un Bremerhaben.

Düütschland drapt in dat eerste Football-EM-Speel op Schottland

München. An´n Avend fangt de Football Europameisterschaft in Düütschland an. Na en korten Anfangsfier speelt de düütsche Natschonalmannschaft in de Münchner Arena gegen Schottland. Ünner den 67.000 Tokiekers warrt ok Bunnspräsident Frank-Walter Steinmeier ween. Bit to´n Endspeel an´n 14. Juli geev dat alltohoop 51 Spelen an thein Steden.

Dat Weer

In Hude un in Bremen-Mitt 16, in Bremerhaben 15 un in Hooksiel sünd dat opstunns 14 Graad. Vundag trecken vun de westen Kant jümmer wedder dichte Wulken dör. Mennigmal drüppelt dat ok en beten un af un an kiekt ok de Sünn dör de Wulken. De Wind weiht en beten bit in Maten. Dat Thermometer wiest 18 bit 21 Graad. In de Nacht lockern eerstmal de Wulken op. Vun dat Emsland trecken man wedder dichte Wulken op un dat gifft Regenschuer. Ok enkelte Gewidder könen dorbi ween. De Temperaturen liggen bi 13 bit 14 Graad. Morn fangt de Dag mit dichten Wulken un to´n Deel deegten Regenschuern an. Af den Middag warrt dat vun dat Emsland dröger un af un an kiekt de Sünn dör de Wulken. Enkelte Schuer sünd möglich. 17 bit 20 Graad stahn denn op dat Thermometer. Sünndag: Neven en beten Sünnschien to´n Deel dichte Wulken un Schuer. Hier un dor Gewidder bi 18 bit 20 Graad.

Dat weern de Narichten op platt. Tohoopstellt hett se Irene Lottes. Op Platt trechtmaakt un vörleest vun Markus Weise.

Bremen Eins Livestream & aktuelle Sendung.

Der Samstagabend mit Till Kohlwes

Der Samstagabend

Jetzt läuft:

Shakespears Sister Hello (Turn Your Radio On)
  • Jetzt läuft:

    Shakespears Sister Hello (Turn Your Radio On)