Plattdeutsche Nachrichten Plattdüütsche Narichten vun'n 13. Juni 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 13. Juni 2024

  • G7-Topp-Drepen in Süditalien
  • Tahl vun Verdrevenen kladdert na dat UN Flüchtlingshölpswark op nee´en Hööchstweert
  • Bunnsdag stimmt över mehr Tiet för Breeftostellung af
  • Ünnersökensutschuss befraagt Ministerpräsident Weil
  • Stadtdeelbiraat verlangt mehr Akschonen gegen Rotten
  • Dat Weer
Bild: Radio Bremen

Informationen zum Audio

G7-Topp-Drepen in Süditalien

Bari: De Grupp vun de söven grooten Industrienatschoon drapen sik as jeed Johr to ehr Topp-Drepen dütmal in dat süüditaleensch Apulien. Se snackt denn ünner annern över dat russche Geld wat fastsett wurr, de Zinsen dorut un of dat för de Ukraine as Stütt bruukt warrn köönt. Dorto wüllt Düütschland, Frankriek, Italien, Grootbritannien, de USA, Kanada un Japan tohoop mit de EU-Vertreder över den Krieg in den neihen Oosten un dat Verhältnis to China snacken.

Tahl vun Verdrevenen kladdert na dat UN Flüchtlingshölpswark op nee´en Hööchstweert

Genf: De Tahl vun Verdrevenen kladdert op de ganzen Welt na UN-Angaav mit 120 Millioon Minschen op en nee´en Hööchststand. De Tahlen sünd dormit to´n 12. mal achternanner hooch gahn. Dorachter sticken nee Konflikten aver ok Krisen de al lang duern, vermellt dat Flüchtlingshölpswark vun de Vereenten Natschoon UNHCR.

Bunnsdag stimmt över mehr Tiet för Breeftostellung af

Berlin: De düütsche Bunnsdag stimmt an Middag över de Reform vun dat Postgesett af. De letzte Ännerung vun düsse Regeln geev dat 1998. Middelwiel sünd Breefen aver dör digitale Kommunikatschoonsweeg faken nich mehr so wichtig. De Koalitschoon will dorüm de Tietnoot för de Post afwennen. Betnu mööt tominns 95 Perzent vun Breefen op laatste twee Warkdag achter de Breef afgeven wurr, bi den Adressat ankamen. In Tokunft schall de Post een Dag mehr Tiet hebben.

Ünnersökensutschuss befraagt Ministerpräsident Weil

Hannober: In den neddersässchen Landdag dröppt sik de Ünnersökensutschuss vunwegen den Gehaltstowass för en Mitarbeitersche vun Ministerpräsident Weil, wo nich all mit inverstahn weren. Stephan Weil warrt hüüt dorto fraagt. Bavento is en Mitarbeitersche vun de Staatskontor as Tügin inlaad. In den Utschuss geiht dat üm de Fraag, of höögersetten vun dat Gehalt verlöövt weer.

Stadtdeelbiraat verlangt mehr Akschonen gegen Rotten

Bremen: De Stadtdeelbiraat för Bremen-Gröpeln verlangt dat Stück för Stück wat gegen Rotten maakt warrt. In dat Oortsamt West sünd verleden Weken vun Bewahners mehr un mehr mellen över Rotten ingahn. De Biraatsliddmaaten verlangt dorüm en betere Tosaamenarbeit mit dat tostännige Amt. Dat Gesundheitsressort seggt, dat de Tahlen vun Mellens in Bremen nich na baven kladdert sünd.

Dat Weer

Un nu kiekt wi op dat Weer: In Bremerhoben, Möppen un Emm hebbt wi 11 Graad un in Bremen sünd dat opstunns 12 Graad. Hüüt sünd meist Wulken an Heven, af un an lacht de Sünn, an de Küst kann dat ok mal schuern. In´t süüdliche Binnenland is dat länger mal dröög un ok fründlich. Dat Thermometer wiest us 15 bet 18 Graad. In de Nacht sünd eerst weniger Wulken ünnerwegens, man an de Küst jümmer noch verenkelte Schuer. Na´n Morgen hen wedder mehr Wulken, westen de Werser wedder mehr Regen, un dat bi 12 bet 10 Graad. Freedag trecken dicke Wulken dör´t Land, aver dat pladdert blots noch af un an. De Sünn speelt ok wedder mit, un kickt hier un dor dör de Wulken. Dat Thermometer wiest us 18 bet 21 Graad.

Dat weren de Plattdüütschen Narichten. Tohoopstellt vun Irene Lottes. Op Platt trechtmaakt un vörleest vun Martina Brünjes.

Bremen Eins Livestream & aktuelle Sendung.

Der Samstagabend mit Till Kohlwes

Der Samstagabend

Jetzt läuft:

Shakespears Sister Hello (Turn Your Radio On)
  • Jetzt läuft:

    Shakespears Sister Hello (Turn Your Radio On)