Plattdeutsche Nachrichten Plattdüütsche Narichten vun'n 12. März 2024

Mehr as 100 rechtsextreme Mitarbeiders bi de AfD in’n Bunnsdag

Berlin: För de Bunnsdagsafordneten vun de AfD arbeit as dat schient mehr Anhängers ut rechtsextreme Organisatschonen as betto bekannt weer. As de Bayrische Rundfunk vermellt, sünd dat mehr as eenhunnert, de bi de AfD-Bunnsdagsfrakschoon un ehr Afordneten anstellt sünd. Ünner düsse Mitarbeiders sünd ünner annern Aktivisten ut dat Ümfeld vun de „Identitären Bewegung“ un mehrere Neonazis.

Lokföhrers laat wedder de Arbeit liggen

Hannover: Siet de verleden Nacht leggt de Lokföhrergewarkschaft GDL wedder den Regionaal- un Fernverkehr vun de Düütschen Bahn lahm. De Streik schall 24 Stünnen duern. Dat gellt ok för Töög in’n Noordwesten. So ward twüschen Noorddiek Mool un Hannover jüst so as twüschen Ossenbrügge un Bremerhaben-Lehe blots enkelte Töög fohren.

Inflatschoon geiht wieter trüch

Berlin: De Inflatschoon in Düütschland is wieter trüchgahn. In’n Februar leeg de Inflatschoonsdeel na Angaven vun dat Statistsche Bunnsamt bi 2,5 Perzent. Dat is de sietste Weert siet Juni 2021. 

Verdi verhannelt mit Bremerhaben Bus

Bremerhaben: An’n Vörmiddag hett en wietere Runn för dat Verhanneln twüschen Bremerhaben Bus un Verdi anfungen. As de Gewarkschaft vermellt, will dat Ünnernehmen hüüt en nee’et Angebott vörleggen. Doröver schall denn an’n Avend en Versammeln vun de Liddmaten afstimmen. Verdi will ünner annern mehr Urlaub un högere Tosläg för de Busfohrers in Bremerhaben.

Bremer Koalitschoon ännert Plaans för Domshoff

Bremen: De Senaat hett sien Plaans för dat Umboen vun’n Domshoff in de Bremer Binnenstadt ännert. As de Werser Kurier vermellt, schall de veer Meter hoge Ramp an de Noordoostsiet vun’n Platz, to de dat mehrere Menen gifft, nich boet warrn. Ok de Plaans för en Fohrrad-Parkhuus ünner den Domshoff sünd nu vun’n Disch.

Dat Weer

Un nu en Blick op dat Weer: In Cuxhaben un Nordholt 5, in Bremerhaben 7, in Bremen un Leer 8, un in Demhorst sünd dat opstünns 9 Graad. Hüüt gifft dat den heelen Dag veele Wulken, un ok enkelte Schuers sünd mööglich. Aver nich jedeen ward natt. Blangenbi hett de Sünn besünners an’n Namiddag af un an mal Schangsen bi 8 bet 12 Graad. In de Nacht treckt de letzten Schuers över Oste un Elv af. Darna lockert de Wulken mal mehr, mal weniger op. An’n Morgen treckt vun de Nedderlannen her nee’e dichte Wulken op, de toeerst in dat Werser-Ems-Flach’n beten Regen bringt. De Luft köhlt sik af op 6 bet 3 Graad. Morgen gifft dat toeerst besünners in dat Werser-Elv-Dreeeck noch Schangsen op’n beten Sünnschien. De Wulken ward aver gau överall dicht, un vun dat Werser-Ems-Flach breedt sik af un an’n beten Regen oder Spütterregen ut bi 10 bet 13 Graad.

Dat weern de Narichten op platt. Tohoopstellt hett se Claudine Bimmermann. Op Platt trechtmaakt un vörleest vun Marc Gelhart.