Plattdeutsche Nachrichten Plattdüütsche Narichten vun'n 11. März 2024

Lokföhrers leggt morrn wedder de Arbeit daal

Berlin: De Lokföhrergewarkschaft GDL hett wedder to eenen Streik bi de Bahn opropen. Vun Morrn in de Fröh, vun Klock 2 an, schüllt de Lokföhrers vun de Bahn för 24 Stünnen in`t Personenverkehr de Arbeit liggen laten. Den Frachtverkehr willt se all vun hütt avend an lahm leggen. Bunnsverkehrsminister Wissing seggt, dat de nee`e Streik nich to verantwoorden is. So kann dat nich wieter gahn, meent he.

Baerbock seggt nich Nee to Taurus-Ringtuusch

Berlin: Bunnsbutenministersche Baerbock is open för dat Lefern vun nee´e Marschfleegerbomben, in eenen Ringtuusch, an de Ukraine. Ehr britische Kolleg Cameron hett vörslan, dat Düütschland an sien Land Taurus-Rateeten levert. Grootbritannien will denn dorför een paar Marschflegerbomben an de Ukraine afgeven. Bunnskanzler Scholz harr jümmer wedder een Taurus-Levern aflehnt.

Dokters an Uni-Krankenküüs leggt Arbeit daal

Berlin: De Marburger Bund hett Dockters un Dokterschen an Uni-Krankenhüüs to een Lawai för Wohrschau opropen. Bedropen sünd ok de Uni-Krankenhüüs in Hannober un Göttingen. In Göttingen is ok eene Demonstration plaant. De Marburger Bund verlangt 12,5 Perzent mehr Lohn. Ok willt se mehr Geld för Deenste in de Nacht, un för`t arbeiden an de Weekenenn un Fierdage kriegen.

Film „Oppenheimer“ winnt Oscar as beste Film

Los Angeles: De Film Oppenheimer is de Winner vun de Oskar-Gala in dütt Johr. Oppenheimer hett den Oskar in seven Kategorien wunnen. He is ok as beste Film wählt worden. Ok de Oskars för de beste Regie, den besten Hauptdarsteller un de beste Kamera gungen an Oppenheimer. De, as beste Schauspölerin nomeneerte Düütsche, Sandra Hüller gung leer ut.

Entscheden to den Volkswunsch in den Striet um de Plantanen in Bremen

Bremen: De Bremer Staatsgerichtshoff will an´t Vomdag sien Entscheden kund dahn, wat dat in Tokunft een Volkswunsch vun de Plantanen, an de Weser-Waterkant, geven draff. De Senat will de Bööm för den beteren Hoochwaterschutz daal maken. Eene Börger-Initiative will dat, mit een Volkswunsch, verhinnern. Se gaht dovun ut, dat de Diek, ok mit de Plantanen, sekerer is.

Dat Weer

Un nu een Blick op dat Weer: In Emm un in Bremerhaven 6, in Bremen 7 un in Neenborg sünd dat opstünns 8 Graad. Hütt hebbt wi eerst vele dichte Wulken an´t Heben, af un an kann dat mal so´n beten pieseln. An´t Nomdag lockert dat ok mal twischen de Weser un de Elb op un de Sünn kummt mal dör, bi 8 bit 11 Graad. Tokamen Nacht warrt de Wulken denn vun de Weser bit to de Elb wedder dichter. Twischen Ems un Weser is de Heben ok dicht un dor kann dat hier un dor ok mal lütte Schuers geven, bi 7 bit 4 Graad. Morrn blifft dat jüst so gries. Vele dichte Wulken an´t Heben, de hier un dor mal Schuers mit sik bringt. An´t Nomdag kummt ok de Sünn mal wedder dör. De Temperaturen liggt bi 10 bit 12 Graad. Middeweeken jümmer noch dichte Wulkenfeller, de Sünn kummt blots af un an mal dör un dat kann wedder mal pieseln, bi 10 bit 14  Graad. Dat weren de Narichten op Platt. Tohoopstellt hett se Katrin Martens. Trechtmaakt un vörleest vun Antje Kruppa.