Plattdeutsche Nachrichten Plattdüütsche Narichten vun'n 7. März 2024

Lockföhrer-Streik is anlopen

Berlin: Kunnen vun de Bahn mööt sik hütt un morrn wedder op Utfallen vun Töög, de later ankamt as plaant, instellen. De Gewarkschaft för de Lockföhrers GDL hett in den Tarifkunflikt mit de Düütsche Bahn, de jüst löppt, mit den nächsten Streik anfungen. In´t Personenverkehr löppt de Streik all siet Klock 2. He schall 35 Stunnen duern. Haupt-Verlangen vun de GDL is eene 35-Stunnen-Week bit 2028 bi vullen Lohnutgliek. Ok reisen Lüüd, de flegen willt, mööt mit Maleschen reken. Siet hütt hebbt bi de Lufhansa de Lüüd, de an de Eer arbeidt, ehre Arbeit liggen laten.

Buten-Amt maakt mehr Druck för Reisen na Russland

Berlin: Dat Buten-Amt maakt mehr Druck för Reisen na Russland un raadt nu nödig vun Reisen dorhen af. Op ehre  Homepage wohrschaut se vör de Gefohr, dat russ`sche Behörden Minschen willkörig fastsett. Dat kann ok Minschen drepen, de Düütsche sünd, un ok de de eene düütsch-russ`sche Staatsbörgerschaft hebbt. Besünners siet den Anfang vun den Angriffskrieg gegen de Ukraine geiht de russ`sche Regerung hard gegen Kritiker un Minschen de anners denkt vör.

Tesla mutt Bedriev na Anslag för länger anhollen

Grünheid: Na den Brandanslag op een Strommast staht bi den US-Elektro-Autobuer Tesla in´t brandenburgische Günheid de Bänner still. De Produktionsstopp duert woll noch bit to´n Enn vun de kamen Week, so seggt eene Sprekerin. Eerst harrn se dacht, dat se all in düsse Week wedder mit de Produktion anfangt. An´t Dingsdag harrn Lüüd, vun de se nich weet keen dat wesen is, een Füer an een Strom-Mast leggt. Düsse Mast is nich wiet weg vun dat Tesla Wark. To den Anslg hett sik eene linksextreme Grupp bekannt.

Kita-Drepen besnackt sik över knapp warrn vun Oppassen vun Kinner in Bremen

Bremen: Bi dat tweete so nömte Kita-Top-Drepen in Bremen besnackt sik all, de dormit to doen hebbt, hütt un morrn över de aktuelle Situation bi´t Oppassen vun Kinner. In de Stadt Bremen fehlt to Tied 1400 Stellen för Kinner bit 6 Johren. De Hauptgrund dorför is de Mangel an Fachlüüd, so seggt de Bildungsbehörd. Se willt besnacken wo man mehr Fachlüüd kriegen kann. Dat Bildungsresort un de Universität hebbt Kita-Mitarbeiters, Vertreder ut Politik un Wirtschaft, un ok Ollern inladen. Bi dat eerste Drepen , vör knapp een Johr, is nix bi rutsuert.

Perzess um umbrochten Jungen geiht in Bremen los

Bremen: In den Fall vun een 7-jöhrigen Jungen hett an´t Vomdag an´t Landgericht Bremen de Perzess gegen den Vadder vun den Jungen anfungen. De Mann schall sienen Söhn in´t verleden September mit mehr Messer-Steken umbrocht hebben. De Staatsanwaltschaft geiht dorvun ut, dat de 47-Jöhrige, as he dat maakt hett, verminnert schuldfähig wesen is. He schall to de Tied eene swore psychische Störung hatt hebben. Dat Jugendamt harr all vör de Daad mit de Familie Kuntakt.

Dat Weer

Un nu een Blick op dat Weer: In Defhold un Emm 1, in Bremen 3 un in Bremerhaben sünd dat opstünns 4 Graad. Hütt is de Himmel meist dicht mit Wulken, erst to´n Nomdag hen lockert dat vun de Elbe her op un wi kriegt de Sünn noch mal to sehn, bi 7 bit 10 Graad. Tokamen Nacht lockert dat wieter op. Hier un dor gifft dat een paar Nevelfeller. De Luft warrt köhler und dat kann Frost geven, bi -1 bit -2 Graad.  Blots an de Küst un op de Eilannen gifft dat Temperaturen bit to 3 Graad. Morrn is dat fründlich un de Sünn lacht us den ganzen Dag an. De Temperaturen liggt bi 7 bit 10 Graad. Sünnavend geiht dat eerst mit Sünnenschien los man later kummt vun de Nedderlannen her dichtere Wulkenfeller op.  Man dat blifft dröge, bi 8 bit 12 Graad. Dat weren de Narichten op Platt. Tohoopstellt hett se Anja Guse. Trechtmaakt un vörleest vun Antje Kruppa.