Plattdeutsche Nachrichten Plattdüütsche Narichten vun'n 6. März 2024

Ministerpräsidenten un Kanzler snackt över Asylpolitik

Berlin: De Böversten vun de Länner snackt vunnamiddag noch mal wedder mit Kanzler Scholz över Asylfragen. Na Hessens Ministerpräsident Rhein geiht dat ok dorum, wat de Asylafloop ok buten vun Europa mööglich is. De Ministerpräsident vun Nordrhein-Westfalen, Wüst, harr güstern in de ARD verlangt: Gegen dat ungesetzliche Inwannern müss gauer wat in Gang sett warrn.

Kabinett snackt över Bafög-Reform

Berlin: In’t Bunnskabinett snackt se vundaag ok um ne’e Bafög-Regeln. Gellen schüllt de vun’t tokamen Wintersemester op an. Mehr Bafög schall dat nich geven. Man se wüllt en Studienstart-Hölpsgeld ansetten: eenmal dusend Euro to’n Bispeel för Studenten, de Wahngeld kriegt. Un ok dat stüerfre’e Geld för de Öllern wüllt se 5 Perzent hoochsetten. Un jeedeen, de studeert, dröfft denn ok mehr dortoverdenen.

Streik bi de Bahn geiht los bi den Frachtverkehr

Berlin: Bi de Düütsche Bahn löppt vunavend wedder en Streik an – eerstmal blots bi den Frachtverkehr. De Gewarkschap vun de Lokföhrers hett en Streik vun 35 Stunnen ansett. Un de geiht vunavend Klock 6 los. Morgen fröh Klock 2 streikt ok de Personenbahnen. De Düütsche Bahn hett en Nootfohrplaan op de Been stellt.

Equal Pay Day: Froen un Mannslüüd verdeent nich datsülvige

Bremen: Vundaag is Equal Pay Day. Denn warrt dorop keken, dat Froens un Mannslüüd nich datsülvige verdeent. In Bremen kriggt en Fro in’n Dörsnitt sowat 5 Euro weniger as en Mann. In ganz Düütschland liggt de Ünnerscheed bi 19 Perzent. In Neddersassen sünd dat 18 Perzent.

Bremen: De ne’e Statschoon för Bussen na wiet weg geiht in Bedriev

Bremen: An’n Vörmiddag nimmt Bremens ne’e Statschoon för Bussen na wiet weg ehren Bedriev op – een Johr later as na Plaan. De ole Affohrtpunkt an’n Bredenweg gellt denn nich mehr. Elektroonsche Boostücken kunnen se nich to rechter Tiet rankriegen, un dorum mussen se den Start tweemal rutschuven. Kost hett dat Boowark 15 Millionen Euro.

Dat Weer

Un woans süht dat mit dat Weer umto ut? Opstunns hebbt wi in Bremen 3 Graad, in Bremerhaven un Kneten sünd dat 4 un in Bevers 5 Graad. Vundaag: Wulken, de eerst över Dag en beten oplockert. Denn wiest sik ok mal de Sunn, an’n meisten vun de Oostfreeschen Inseln bet hen na de Elv. Dat Thermometer krabbelt op 7 bet 10 Graad. De Wind dorto weiht flau vun de oosten bet noordoosten Kant. Tokamen Nacht: Mal mehr, mal weniger Wulken, dröög. Eerst na Middernacht treckt vun de Elv mehr dichte Wulken rin, de an’n Morgen na de Werser kaamt. Bi 4 Graad över bet knapp unner 0 Graad. Morgen: De dichten Wulken ööstlich vun de Werser loopt ok na Westen. Bet Namiddag lockert dat denn aver vun de Elv her al wedder op, un mag ween, dat de Sunn noch dör de Wulken dörpliert. Dröög bi 7 bet 10 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Irene Lottes.