Plattdeutsche Nachrichten Plattdüütsche Narichten vun'n 5. März 2024

Bunnsregerung will Aktien för de Rentenkass inköpen

Berlin: De Bunnsregerung maakt hüüt Vörmiddag ehren Plaan för de Renten bekannt. Bunnsarbeitsminister Heil un Finanzminister Lindner wüllt dor en P vörsetten, dat dat in de tokamen Johren weniger Rentengeld gifft. Un se wüllt ok: Bi de Rentenkass kummt noch en Standbeen dorto. Mit Kredite wüllt se Aktien inköpen. Wat de an Gewinn inbringt, schall in de Rentenkass ringahn.

Düütschland sekert sik gegen Utspioneren

Berlin: Vunwegen den Taurus-Afluuster-Schandaal hett de Verfatensschutz mehr Akschonen gegen dat Utspioneren in Gang sett. Bunnsbinnenministersch Faeser hett de „Funke Mediengrupp“ vertellt: Gegen dat Utspioneren sett se nu kloor mehr Lüüd un Technik in. Wat dor achter stickt: Russland harr en Kunferenz vun düütsche Offizere opnahmen un Freedag öffentlich maakt.

Europa geiht wieder gegen Inpackmüll an

Brüssel: Op den Weg hen na weniger Affall schüllt in de EU kloor mehr Verpackungen mehr as eenmal bruukt warrn. Dat hebbt Verhandlers vun dat Europaparlament mit de EU-Staaten fastleggt. En Reeg Verpackungen ut Plastik schüllt heel un deel weg. Dat gellt för Tüten för frische Appeln un Grööntüüch oder lütte Portschonen för Zucker oder Rahm, de dat vör allen in Weertschaften un Cafés gifft.

Bremen: Koalitschoon un CDU snackt över Huusholt

Bremen: De Lannsregerung sett sik an’n Vörmiddag wedder mit Top-Lüüd vun de Bremer CDU tohoop. Dat geiht um den Huusholt. De Senat versöcht nu al dat drüdde Mal, de gröttste Oppositschoonspartei mit an den Disch to halen, wenn dat dorum geiht, dat wenige Geld goot optodelen. So is noch nich kloor, woneem de Lannsandeel vun 250 Millionen Euro herkamen schall, den Bremen bruukt, wenn dat Stahlwark op Watergas umboot warrn schall.

Andrag A27: Körtere Bootiet

Bremen: Mit en Extra-Andrag will de CDU in Gang bringen, dat de Reparaturen an de Autobahn A 27 twüschen Hagen un Uthlede noch düssen Maand trecht sünd un de Autobahn denn ok nich mehr heel un deel dicht is. In den Andrag steiht: De Senat schall sik dorför bi den Bund stark maken. De Straat is afsparrt. En Stahltunnel unner de Autobahn is rott, un de Fohrbahn kunn daalsacken.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven un Rotenborg 5 Graad, in Cloppenborg sünd dat 6 Graad. Vundaag: Vele Wulken, un vör allen in Bremen un umto un westlich vun de Werser kann dat af un an mal regen. En beten lacht uns de Sünn an’n Namiddag in’t natte Dreeeck un an de See. Dat Thermometer krabbelt op 6 bet 8 Graad. De Wind dorto weiht flau vun de oosten Kant. An de Küst ok frisch un in Böen. Tokamen Nacht: Dichte Wulken, un de köönt ok en beten Natts vun baven daalsmieten. Oplockern deit dat blots in’t Cuxland un langs de Elv. Bi 3 Graad över bet 1 Graad unner 0. Morgen: Vele Wulken, de eerst över Dag wat oplockert. Denn kriegt wi ok mal de Sunn to sehn. Dat Ganze bi 7 bet 10 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Sven Kuhnen.