Plattdeutsche Nachrichten Plattdüütsche Narichten vun'n 29. Februar 2024
Standdatum: 29. Februar 2024.
Informationen zum Audio
- Verfügbar bis: 27. Februar 2029 Informationen zur Verweildauer
Granaat in´t Wahnhus vun Ex-RAF-Terroristin Klette funnen
Berlin: De Polizei hett in dat Wahnhus vun de Ex-RAF-Terroristin Danielle Klette eene Granaat funnen. Na Angaven vun de Polizei hett man se unschädlich maakt. Vör den Insatz in de Nacht, harr de Polizei dat Huus för mehrere Parteien rüümt. Vördem harr man all in de Wahnung Wapen funnen. Klette hebbt se vör dree Dagen in Berlin, na över 30 Johren op de Flucht, to faten kregen.
Putin hollt Bericht över de Laag vun de Nation
Moskau: De Präsident vun Russland Putin hollt jüst nu sienen Bericht över de Laag vun de Nation. He will över de wirtschaftlichen, sozialen un politischen Ennen informeren. Tokiekers luert dorop, wat he dorbi ok wat över de militär`sche Laag in de Ukraine seggt. Dor hett de russ`sche Armee opletzt enige Erfolgen kregen. Dat gellt as seker, dat Putin in de kamen Maanden wedder bi de Wahl to`n Präsidenten in´t Rennen geiht.
Bovenschulte verlangt nee`en Extra-Geldputt för nee`e Utgaven
Bremen: Börgermeester Andreas Bovenschulte will över den Bunnnsrat eenen nee`en Extra-Geldputt op den Weg bringen. Dormit will he Geld in de Gesellschaft, de een Oog op den Verkehr hett, steken. Datt seggt de Weser Kurier. Ok will de SPD-Politiker mit de Krediten den Neeboe vun Autobahnbrüchen un dat op Schick bringen vun dat Nett vun de Gleisen betahlen. De Koalitionspartner Gröne un Linke in Bremen hebbt bit nu noch nix to de Plaans seggt.
Mehr wedder good maken för Lüüd, de to Unrecht achter Trallen seten hebbt in Neddersassen
Hannover: 42 Minschen hebbt in`t verleden Johr in Neddersassen eenen Utgliek kregen, wiel se to Unrecht in Ünnersökenshaft seten hebbt. Dat hett dat Justizministerium vun Neddersassen mitdeelt. Dorför hett dat Land all tosamen 345.000 Euro an de Minschen as wedder good maken betahlt. Dat is mehr as in dat Johr dorvör. In Bremen hebbt fief Minschen , in´t verleden Johr, för ehre Tied in U-Haft Geld as wedder good maken kregen. De Bunnsdag harr vör Johren besluten, dat man dat Geld, för de to Unrecht achter Trallen kamen Lüüd, düütlich hooch setten mutt.
End Of Fish- Daag
Bremen: Düütschland hett hütt, rein na de Tallen, de Fischreserven in Nord- un Oostsee för dütt Johr opbruukt. Dorop hebbt verschedene Ümwelt- un Meeresschutzorganisationen henwiesen. So ok de Bremer BUND. Dat is in dütt Johr düütlich fröher to denn so nöömten „End Of Fish-Day“ kamen, as in de Johren dorvör. De Ümweltverbännen verlangt in Nord- un Oostsee betere Fischeree op lange Sicht.
Dat Weer
Un nu een Blick op dat Weer: In Bremen un Defhold 4, in Bremerhaben un in Leer sünd dat opstünns 6 Graad. Hütt Vomdag hebbt wi noch een paar Wulken an´t Heben. Twischen de Nordsee un Bremen kann dat mal so´n beten pieseln. An´t Nomdag höört de Regen denn op un wi kriegt noch mehr de Sünn to sehn, bi 9 bit 11 Graad. Tokamen Nacht gifft dat in Ostfreesland und dat Emsland vele Wulken un dor kummt ok Regen rünner. Later lockert dat op und at hört op to pieseln, bi 7 bit 4 Graad. Morrn gifft dat eenen Mix ut Sünn un Wulken. Dor kummt blots af un an mal so´n beten Natt vun baven rünner. De Temperaturen liggt bi 10 bit 11 Graad. Sünnavend is dat jüst so wesselhaft. De Sünn kriegt wi af un an ok mal to sehn, bi 11 bit 14 Graad. Dat weren de Narichten op Platt. Tohoopstellt hett se Michael Kück. Trechtmaakt un vörleest vun Antje Kruppa.