Plattdeutsche Nachrichten Plattdüütsche Narichten vun'n 26. Februar 2024
Standdatum: 26. Februar 2024.
Informationen zum Audio
- Verfügbar bis: 24. Februar 2029 Informationen zur Verweildauer
EU-Buernministers snackt över Buernproteste
Brüssel: De Buernministers vun de EU snackt opstünns över möögliche Reformen för de Landwirtschaft. Dormit wüllt se op de veelen Buernproteste reageern. De EU-Kommischoon hett al hier un dor nageven un ünner annern de Ümweltoplagen für de Buern lockert. Op’n Disch liggt nu wietere Vörsläg, mit de besünners de Papeerkrieg weniger warrn schall.
Verfatensschutz will AfD woll nee intaxeern
Köln: De Verfatensschutz arbeit woll doran, datt de heele AfD as seker extremistisch Anliggen intaxeert ward. Dat vermellt de „Süüddüütsche Zeitung“ un weet dat ut interne E-Mails un Notizen vun’n Inlandsgeheemdeenst. Betto süht de Verfatensschutz de AfD blots as so nöömten rechtsextremistischen Verdachtsfall.
Bremer Landsregeern un CDU snackt över Huusholt
Bremen: De root-gröön-rode Landsregeern snackt opstünns noch mal mit de CDU över de leege Huusholtslaag. Na Informatschonen vun „buten un binnen“ drapt sik Vertreders vun’n Senaat in’t Raathuus mit de Böversten vun de CDU. Dat geiht ünner annern dorüm, wo Bremen grode Utgaven för den Klimaschutz tosamenkriegen kann, ofschoons dat de Schuldenbrems gifft un de Huusholt wenig Speelruum lett.
Flüchtlingsquarteer in Fürstenau is afnickt
Fürstenau: En Steed, wo bet to 500 Flüchtlinge in‘n Landkreis Ossenbrügge toeerst henkamen könnt, is güstern afnickt worrn. 55 Perzent vun de Wählers in Fürstenau hebbt dorför stimmt un sik dormit gegen en Börgerbegehren dörsett. Dat is dat eerste Mal, datt de Börgers in en Stadt in Neddersassen över en Flüchtlingsquarteer afstimmt hebbt.
Werser-Fährschipp Bremerhaben-Blexen fallt för mehrere Weken ut
Bremerhaben: Siet hüüt fröh fallt dat Werser-Fährschipp twüschen Bremerhaben un Blexen för mehrere Weken ut. Dat liggt na Utkunft vun’n Bedriever doran, datt de beiden Fähranlegers op Schick bröcht ward. Düsse Arbeit schall an’n 21. März fardig ween. Dormit de Footgängers ok wieterhen över de Werser kaamt, ward Buslinien as Behölp inricht.
Dat Weer
Un nu en Blick op dat Weer: In Nordholt 1, in Bremen un Bremerhaben 3, in Leer un Cuxhaben 4, un op Borkum sünd dat opstünns 5 Graad. Hüüt gifft dat twüschen Oostfreesland un Elv eerst hier un dor Daak oder hogen Daak. Anners wiest sik blangen de dichten Wulken ok af un an de Sünn. In’n Süüden vun Bremen blifft de Wulken meisttiets dicht, aver dor fallt blots enkelte Druppen. In’n Noorden blifft dat dör de Bank dröög bi 6 bet 8 Graad. In de Nacht treckt de dichten Wulkenfeller un de letzte Regen wedder na Süüden af. Mit den Wind ut Noordoosten breedt sik aver vun de Elv her wedder Wulken as hogen Daak ut, un dat lockert meisttiets blots kort op. Dat Thermometer sackt daal op 4 bet -1 Graad. Morgen hollt sik de Feller mit Daak un hogen Daak noch’n beten. Later lockert dat aver ok mal op, sodatt de Sünn ok mal to sehn is. Regen fallt gor nich bi 5 bet 8 Graad.
Dat weern de Narichten op platt. Tohoopstellt hett se Justus Wilke. Op Platt trechtmaakt un vörleest vun Marc Gelhart.