Plattdeutsche Nachrichten Plattdüütsche Narichten vun'n 21. Mai 2025

Wohrschienlich rechte Terrorzell: Junge Mannslüüd fastnohmen

Berlin. De Generalbunnsafkaat geiht gegen en wohrschienlich rechtsextreme Terrorzell vör. Bi en Polizei-Aktschoon an´n fröhen Morgen wurren in Meckelnbörg-Vörpommern, Brandenborg un Hessen fief Lüüd, de se op´n Kieker harrn, fastnohmen. Se schüllt ünner annern Anslääg op Flüchtlinge un Lüüd, de politisch anners denken deit, plaant hebben. Dat vermellt de Behöörd ut Karlsruhe.

Mehr troopsch Woolden daalslaan as noch nie

Paris. Dat Tweimaken vun troopsch Woolden weer in dat verleden Johr so groot as noch nie nich in de verleden twee Johrteinten. Dat hett de Forschungsorganisatschon World Resources Institute vermellt. Dorna wurren in dat verleden Johr 6,7 Millionen Hektar Tropen-Oorwoold tweimakt. Wenn man dat ümreken deit kann man seggen: Verleden Johr wurr jede Minuut en Landstück vun 18 Footballfellern kaputt makt. In´n Vergliek to 2023 is dat en Hoochgahn üm 80 Perzent. Binah de Hälft vun dat Tweimaken is wegen Füer. So steiht dat in de Studie.

Debatt üm Rull vun de AfD: Bunnsdagsutschüss wählen Vörsitter

Berlin. In´n Bunnsdag kamen vundag de Utschüss to ehr eerste Drapen tosamen. Dorbi leggt de Lidmaten ok de Utschüss-Vörsitter fast. Man dor gifft dat en Hen un Her üm de Vörsitterposten för de AfD. Se wüllt den Vörsitt in söss vun de 24 Utschüss. So vele stahn ehr de Tallen na to. Politikers vun de anner Partein lehnen dat aver af, AfD-Vertreder in so wichtige Ämter to wählen.

Evangeelsch Kark stellt sick nee op

Bremen. De Bremsch Evangeelsch Kark wählt vundag en neje Leit. Dorto kaamt vundag un morgen in dat St. Pauli-Gemeendezentrum in de Neestadt dat Karkenparlament, de Karkendag, as de nöömt warrt, tosamen. Wählt warrt ünner annern to´n eersten Mal en Karkenpräsident. He övernehmt denn dat Amt vun den Schriftföhrer as böverste Theologe vun de BEK. So steiht dat in de neje Verfaten. Eenzigste Kandidat is de Schriftföhrer Bernd Kuschnerus, de dat bet nu weer.

Seemannshotel makt dicht

Bremerhaben. Dat Seemannshotel „Portside“ makt to´n Johresenn sien Dören dicht. Dat hett de Seemannspaster un Statschoonsbaas vermellt. De Tallen vun de Övernachtens weern in de verleden Johrn düchtig torüchgahn. De Bedriev vun dat Hotel is so nich mehr to betahlen. Dreger vun dat Seemannshotel is de Düütsche Seemannsmission in Hannover.

Dat Weer

Un nu noch en Blick op dat Weer: In Nienborg un in Bremen-Mitt 14, in Bremerhaben 13 un in Achim sünd dat opstunns 16 Graad. Vundag mööt sick eerstmal de dichten Wulkenfeller oplösen. Wenn de Sünn denn rutkaamt stellt sick en dröge Mischmasch ut Sünnschien un lockeren Wulken in. De Wind weiht in Maten vun de West- bit Noordwesten Kant. Bi 14 bit 20 Graad is de Namiddag hell un kloor. In de Nacht to´n Dunnersdag weern de Wulken mehr un mehr. Vun de See lockern de Wulken denn wedder to´n Morgen op. Dat blifft meist dröög un de Temeperaturen gahn op söss bit thein Graad rünner. Morn geiht dat mit Sünnschien un lockeren Wulken los. An de Küst sind Regenschuer möglich. An´n Middag un Namiddag stellt sick överall en Wessel ut Sünnschien un dicken Wulken in, de den een or annern Regenschuer bringen könen. Blitz un Donnerslag mit Grisselgrussel sünd hier un dor ok möglich. Dat Thermometer wiest 12 bit 15 Graad.

Dat weern de Narichten op platt. Tohoopstellt hett se Sven Kuhnen. Op Platt trechtmaakt un vörleest vun Markus Weise.