Plattdeutsche Nachrichten Plattdüütsche Narichten vun'n 20. Mai 2025

Butenminister un för’t Verdeffendeern vun EU snackt över Ukraine

Brüssel: De Butenministers un de Ministers för’t Verdeffendeern vun de Europääschen Union snackt in Brüssel över den wieteren Bistand för de Ukraine. Nipp un nau schall dat üm militäärsche Hölp för dat Land gahn, dat vun Russland angrepen ward. De Butenministers plaant nee’e Sanktschonen gegen Russland. Thema is woll ok, datt US-Präsident Donald Trump un Russlands Böverster Wladimir Putin güstern twee Stünnen lang wegen de Ukraine telefoneert hebbt.

Israels Premier Netanjahu vergrellt wegen Andrauhen vun westliche Sanktschonen

Tel Aviv: Israels Premierminister Benjamin Netanjahu is vergrellt, datt mehrere westliche Staaten Sanktschonen andrauht hebbt. Nipp un nau geiht dat üm Grootbritannien, Frankriek un Kanada. Na Menen vun Netanjahu verlangt düsse Staaten vun Israel, datt dat Verdeffendeern vun’t egene Överleven opgeven ward. Dat würr de Hamas to wietere gruliche Akschonen inladen. De dree Länner hebbt Israel tovör Strafen andrauht, wenn Israels Militäär in Gaza wietermaakt.

Landdag in Neddersassen wählt nee’en Ministerpräsident

Hannover: De Landdag in Neddersassen wählt an’n Middag en nee’en Ministerpräsident. Na 12 Johr in’t Amt nimmt Stephan Weil sien Hoot. As Grund dorför hett he sien Öller nöömt un sien Energie, de jümmer weniger ward. Sien Nafolger schall Olaf Lies warrn, de betto Wirtschaftsminister weer. De 58-johrige SPD-Politiker ut Freesland is siet 12 Johr Deel vun’t Kabinett in Hannover.

Wedder Laway för Wohrschau bi’n Busverkehr in Neddersassen

Hannover: In veele Regionen in Neddersassen fallt hüüt un morgen wedder Bussen ut. De Gewarkschaft Verdi hett to en Laway för Wohrschau över twee Daag bi mehrere Busünnernehmen opropen. Dat geiht ok üm dat Ümland vun Bremen, to’n Bispill Oosterholt, Veern un Cuxhaben. Ok Schoolbussen köönt utfallen. De Gewarkschaft Verdi will so de Arbeitgevers ünner Druck setten, dormit de Mitarbeiders mehr Geld kriggt.

Bremer Senaat will City-Tax höger setten

Bremen: De Senaat ward in en halv Stünn woll över dat Högersetten vun de Citytax afstimmen. De Afgaav för dat Övernachten schall in’t tokamen Johr üm en halven Perzentpunkt ropsett warrn, vun 5 op 5,5 Perzent. De Landsregeern rekent dormit, datt dat een Million Euro mehr Geld bringt. Na den Senaat mutt blots noch de Börgerschaft tostimmen. De Citytax ward siet 2018 in’t Land Bremen bi’t Övernachten to’n Bispill in Hotels un Ferienwahnungen intrucken.

Dat Weer

Un nu en Blick op dat Weer: In Bremerhaben un Leer 15, in Emmen 17, in Bremen 18, un in Demhorst sünd dat opstünns 20 Graad. Hüüt gifft dat en Mix ut veel Sünnschien un lockere Wulkenfeller. An’n Namiddag kann dat in’n Süüden un Oosten vun Bremen ok dickere Wulken geven, de enkelte korte Schuers bringen köönt. Besünners in Oostfreesland bet in’t Cuxland blifft dat klaar mit veel Sünnschien. De Temperaturen stiggt op 17 bet 19 Graad an de Küst un 21 bet 24 Graad in’t Binnenland. In de Nacht funkelt in’t Binnenland de Steerns an’n Heben. An de Noordsee gifft dat aver dichte Wulkenfeller. De breedt sik bet to’n Morgen wieter na Süüden ut. Regen gifft nargens bi 11 bet 10 Graad an de Noordsee un 9 bet 7 Graad in’t Binnenland. Morgen mööt sik eerst dichte Wulkenfeller oplösen. Darna gifft dat en Mix ut Sünnschien un lockere Wulken. Besünners an’n Namiddag ward dat fründlich bi 14 bet 15 Graad an de Küst un 19 bet 20 Graad in’t Binnenland.

Dat weern de Narichten op platt. Tohoopstellt hett se Michael Kück. Op Platt trechtmaakt un vörleest vun Marc Gelhart.