Plattdeutsche Nachrichten Plattdüütsche Narichten vun'n 19. März 2024

Vunwegen en Streik föhrt in Bremen totiets keen Bus un Bahn

Bremen: Siet verleden Nacht staht Bus un Bahn still. De Gewarkschop Verdi hett de rund 2.500 Arbeiders vun de BSAG to´n Streik opropen. Düsse Streik duert twee Daag. Dor achter stickt de nich opkloorte Tarifstriet.

Jümmer mehr Geld för Hoochwater-Versehrte uttahlt

Hannober: Rund dree Maande achterna dat Wiehnachtshoochwaater betahlen nu Städer un Landkreisen in Neddersassen jümmer mehr Stütt för bedraapen Privaathuusholden. All tohoop sünd dat knapp 300.000 Euro, maakt dat Ümweltministerium künnig. De Noothölp richt sik an Privaatlüüd in akuten Nootlaagen, wenn Möbeln or Apparaten ut den Huusholt twei gahn sünd.

Bremer Senaat snackt över Canabis-Plaans

Bremen: De Senaat snackt glieks, Klock olben, över den Plaan vun de Ampel-Regerung, dat bruuken vun Cannabis rechtlich aftosekern. De Bremer Koalitschoon ut SPD, Gröönen un Linke will fastleggen, wo sik Bremen to dat Thema verhöllt. Tokamen Freedag snackt de Bunnsraat över dat Vörhebben. Länner so as Bayern un Sachsen lehnen de Ampel-Plaans af un verlangen en Utschuss de vermiddelt.

Ukraine-Kuntaktgrupp dröppt sik in Ramsteen

Ramsteen: De Ukraine-Kuntaktgrupp, as se nöömt warrt, is opstunns wedder in de US-Kasern tohoopkamen un snackt över wiedere Stütt för de Ukraine, de vun Russland angrepen wurr. Dorto schüllt Ministers för´t Verdeffenderen un hoochrangig Militärvertreder ut mehr as 50 Lännern kaamen. Bavenan steiht woll wo Munitschoon för de Ukraine herkamen schall.

Slichter in den Tarifstriet bi dat Lufthansa-Boddenpersonaal opstellt

Frankfurt: In den Tarifstriet bi dat Lufthansa-Boddenpersonaal hebbt de Verhannelnspartner de Slichter nöömt. De Lufthansa hett den Ex-Baas vun de Bunnsagentur för Arbeit, Frank Jürgen Weise, opstellt. De Gewarkschop Verdi den Thüringer Ministerpräsidenten Bodo Ramelow. Dat Drapen schall tokamen Week losgahn. Dormit sünd wiedere Streiks eerstmal vun Disch.

Dat Weer

Un nu kiekt wi op dat Weer: In Bremen 6 Graad, in Bremerhoben 7 Grad, in Möppen hebbt wi 8 Graad un in Emm sünd dat opstunns 9 Graad. Övern Dag wesseln sik Wulken un Sünn af, twuschen Ems un Werser kann dat ok dakig un gries ween, af un an drüppelt dat. De Wind weiht flau, an de Küst un op de Eilannen in Maaten un licht böig vun de süüdoosten bet süüdwesten Kant. Dat Thermometer wiest us hüüt 12 Graad op de Eilannen un 13 bet 16 Graad in´t Binnenland. In de Nacht mal mehr mal weniger Wulken, an de Küst sünd ok mal en poor Druppen dorbi un dat denn bi 8 bet 6 Graad. Middeweken hangt de Heven vull Wulken, in Bremen un umto un ok in süüden Bremen schafft de Sünn dat mal an de Wulken vörbi. Af un an trecken lütter Schuers över us weg un dat bi 14 bet 17 Graad in´t Binnenland un an de Küst bi 11 bet 13 Graad.

Dat weren de Plattdüütschen Narichten. Tohoopstellt vun Justus Wilke. Op Platt trechtmaakt un vörleest vun Martina Brünjes.